因為已經唔喺第一次嚟廠廈食飯，所以，都知道由大堂、上樓到走廊，都一如一般工廠大廈咁，簡陋基本，不過，入到餐廳就會有種別有洞天嘅感覺。K2 Kitchen以黑、白、灰為主色調，雖然裝修簡約，但配合一點燈光，都不失氣氛，天花上嘅薄紗布，亦增添點點美感。而且，席間見唔少客人跟店長寒暄，相信都得唔少熟客支持。

入門口時，除掛上餐牌之外，亦見到午餐及晚餐都有晌指定時間前結帳8或9折優惠，不過，向店員查詢後，午餐只有星期一至五供應，星期六、日不設午市，優惠未有機會享用到；至於晚市個優惠，我諗同區工作又收工早嘅朋友可以把握到。

此外，餐廳歡迎客人自携餐酒，更唔收開瓶費，啱晒喜歡小酌幾杯嘅朋友。

餐牌散點嘅菜式種類，都一如常規包括前菜、湯品、小食、主菜、甜品及飲品。但點計，晚市套餐最划算，4道菜，定價於$188~$268，視乎所選擇嘅主菜。此外，又可以用個優惠價$20額外點多一客小食。

除咗主餐牌之外，晌入門口位，更會登出一啲是日嘅廚師推介，有前菜，有小食，甚型甜品。當晚，我哋就遇見托托蜆及橙酒煮班戟。

白酒煮紐西蘭托托蜆 $108

店長嘅極力推介，因為，啲蜆不時返貨，賣完就無，未必次次遇到，搞到我哋心郁郁，雖然，可能都喺銷售技倆，但記得曾經晌中環Chateau Aqua Oyster & Wine食過一次，同樣都喺白酒煮，印象深刻，所以，一於再試。上枱時見啲托托蜆大到咁，朋友都即時嘩嘩聲。一客有6大隻，隻隻無花無假，都夠晒肥大肉厚，蜆肉入口帶點忌廉香氣，食落鹹鮮，感覺充滿海洋味道，而且更滲出淡淡白酒香，實在令人回味。

北海道甘蝦伴蘆薈沙律

前菜有兩款選擇，先試個甘蝦，賣相非常吸晴，大大件嘅甘蝦，以刺身形式登場，味道鮮到不得了，口感帶點膠質，而蝦頭更有唔少蝦膏，友人超讚；伴油醋沙律菜都喺頗大路嘅處理，不過，再加入蘆薈粒就增加咗口感同新鮮感。

燒有機紅菜頭伴羊奶芝士、北海道帆立貝、檸檬泡沫

個名就超複雜咁，但其實個沙律賣相立體精簡。單單清甜嘅紅菜頭之上，伴上濃香嘅羊奶芝士及爽甜嘅帆立貝，味道豐富，口感有層次，而且，用料不賴，好有心思嘅一道前菜。

黑魚籽鮮蝦忌廉蛋 +$20

之前，講過可以優惠價加配小食，選擇包括黑魚籽鮮蝦忌廉蛋、羅勒鹽燒有機溫室大傘菇、自家煙燻三文魚伴血橙。我就無點試，友人就揀咗「忌廉蛋」，評語喺極為欣賞，賣相精緻，黑魚籽鹹鮮味吊起蛋內嘅忌廉蛋白，當中又有鮮蝦粒，沉底嘅蛋黃漿激發出濃濃蛋香。

牛肝菌榛子蓉湯

睇樣好似好粗，但入口一啲都唔喺，幾順滑，而且，啖啖充滿菌香，味道一流；而湯中混入榛子蓉，有啲粒粒，增添當中嘅口感之餘，亦令菌中有淡淡榛子香滲出，喺一道好有亮點嘅餐湯。

南瓜忌廉湯（廚師餐湯）

賣相平實唔花巧，只配一條脆餅乾條，但一上枱已聞到濃濃南瓜香，用料不賴，質感幼順，甚有水準。

主菜由A-F共6款，有牛柳、豬鞍、鹿架、扁意粉、波士頓龍蝦及海鮮飯，相信都迎合到大部份人嘅口味。

威靈頓紐西蘭牛柳 $258
依家都唔喺咁多餐廳肯做威靈頓牛柳，因為麻鬼煩，鋪上鵝肝醬、野菌，又要加巴馬火腿，包酥皮，又煎又焗。難得主菜有得揀，小弟都算算哋食肉獸，就心水依一道菜啦。賣相精中有細，件牛柳裁得幾大件，仲包到成個心臟咁，切開嗰吓已感到肉質軟腍，色澤唔單止粉嫩，入口真喺好嫩滑，又有肉味，夾埋其他配料，味道好有層次，加上個酥皮又脆喎！

海膽忌廉煮北海道刺身帶子扁意粉 $188 

單睇食材成份，喺一道非常吸引嘅菜式，不過，用咗熟海膽加入扁意粉中，出嚟嘅效果唔及一瓣瓣海膽擺出嚟咁吸晴，但喺，個扁意粉仍然有唔嘅表現。扁意粉煮得好有咬口，忌廉汁中混有海膽，再者，加入蟹籽，刨咗啲巴馬臣芝士，又有新鮮嘅帶子粒，食味不俗。

焗原隻波士頓龍蝦配牛油松露醬 $258

無花無假原隻嘅波士頓龍蝦一定喺搶鏡啲，淋上忌廉汁，撒上車打芝士，份外香濃，而龍蝦肉爽口鮮甜，鮮得啲芝士都冚唔住，加上大啖大啖肉，食得真喺夠爽。之前講過佢哋菜式嘅賣相喺「精中有細」，所謂「有細」喺指啲伴菜：木耳、車厘茄、白蘿蔔、西蘭花，雖然喺普通嘅食材，但加以修飾，再塗上唔同色彩嘅菜蓉，感覺變好唔同，又健康啲。題外話，考吓大家，碟中青綠色嘅會喺咩菜蓉呢？我哋都研究咗好耐，最後都要問店長，原來喺青豆蓉呀！

上甜品前先嚟幾杯餐飲，我哋叫咗鮮奶朱古力、朱古力咖啡及鮮奶咖啡，稱唔上好好，叫做不過不失咁啦！始終唔喺正式嘅咖啡店，晌依方面唔喺咁強。

精選甜品

套餐所包嘅精選甜品只喺士多啤梨慕絲蛋糕，其實質素只屬一般，因為慕絲夠軟滑，海綿蛋糕底卻有啲乾，但賣相搭夠，砌到幾意境咁，有樹、有花、有石，仲有蝴蝶「翩翩起舞」添。

橙酒煮班戟伴雲呢拿雪糕 $88

食完上述個指定甜品大家真喺意猶未盡，而女生嘅「第二個胃」又可以無限發揮，所以，再嚟一客橙酒煮班戟。由於個班戟喺堂煮，估唔到既然喺由店長親自操刀，一路講解、一路煮，讓小弟學到唔少技巧，因為，既要煮黃糖，又要下牛油，仲有橙汁、橙酒、橙青、白蘭地……等等，先後有序，睇佢煮到火光熊熊，感覺都過癮。

成品擺得靚靚，再加份雲呢拿雪糕（不過，雪糕球之下墊啲沙律菜就有啲搞嘢），啲班戟非常好食，充滿橙香，又帶幾分酒味，口感柔軟而煙韌。一客有4件班戟，除勻都喺廿零蚊件，絕對好值得試。

今晚食得非常稱心，服務亦唔錯，喺後尾上餐飲及甜品有啲亂同慢，後尾店長解釋話今晚特別旺，所以，人手都有啲緊，有咩待慢咗都唔好意思，你咁講都已經算有份心。有啲餐廳嘅店員認真倒老細米，正所謂生命無take 2，如果服務唔好就肯定翻兜無take 2啦。

個人評分
味道：8/10
環境：8/10
服務：7/10
抵食：8/10
平均每人消費：HK$340

餐廳資料：
K2 Kitchen
觀塘巧明街106號冠力工業大廈13樓6室
27159777