店內裝潢簡潔，黑與白，仿磚牆，最引人眼球喺近廚房位牆上嘅黑白、彩色照片，一張又一張窩夫美食照，狀甚吸引，不過，都唔使羨慕，等陣我哋都可以嚐到多款窩夫美食。但喺，相信基於租金昂貴嘅關係，鋪仔細細，就安排咗14個位，枱櫈排得頗密麻，餐枱亦都較細，不過，幸而侍應非常醒目，逐道菜逐道菜慢慢上，免得一枱都喺嘢擺都擺唔落。

晌門口見到店家應該最近嘅推廣喺「饅頭窩夫漢堡」，不過，小弟就稍為鍾情另一款鹹食嘅「暖心窩夫」。一大張過膠餐牌，顯示晒各類出：窩夫烤餅沙律、暖心窩夫、饅頭窩夫包 、鮮果甜心窩夫、多款窩夫甜點、各式飲品……等等，創新有心思，驚喜滿fun。

窩夫烤餅沙律配香烤雞肉 $88

究竟喺窩夫，定喺烤餅？點解會叫窩夫烤餅呢？口味上，有香烤雞肉、煙三文魚及巴馬火腿可供選擇，後兩者都喺即切現成材料，所以選雞肉，睇到佢哋煮嘢嘅手勢。

個沙律都幾豐富，沙律菜中仲添加咗蕃茄、青瓜、甘筍絲、青橄欖、洋蔥及忌簾芝士，伴上自家製蘋果麵豉沙律醬，似似哋常食到嘅油醋，味道清新得嚟又有少少甜味，頗得意；而其他材料又食得出好新鮮，如沙律菜，爽脆非常，蕃茄、青瓜都好新鮮。香烤雞肉嘅做法帶點日式，煎得外皮幾焦香，肉質又唔嚡，糝上少許芝麻，整體味道又真喺幾好。

「白潺潺」嘅窩夫烤餅口感有啲似厚身嘅餅乾，又有啲似烘脆咗嘅比得包（Pita Bread）或卡巴皮（Kebab），壓烘成窩夫形，總之薄薄脆脆，咬落又有啲咬口，因為喺即叫即製，要趁快食，一攤涼就變腍。由於佢本身無乜味道，強烈建議好似我咁夾少少沙律菜、雞肉、忌簾芝士及其他配料，效果不俗，份外好食。如果啪散件窩夫烤餅，撈勻啲沙律食，唔知效果又點呢！

比利時佛蘭德風味豬肉暖心窩夫 $62

暖心窩夫有兩款口味：印度馬薩拉風味雞肉及比利時佛蘭德風味豬肉，由於沙律要咗雞肉，個鹹食窩夫就順理成章揀豬肉。

暖心窩夫以紙盒裝住，中間位紙條拉開就可以將紙盒打開，焦香嘅窩夫就呈現眼前，切開就見到窩夫內塞滿手撕豬肉，豬肉鹹鹹香香，極之惹味，而且以手撕製作，非常有咬口，再者，窩夫有蛋香，兩者配合真喺好好食。不過，溫馨提示吓，咪睇佢個外觀平平無奇咁，一放入口就知佢有幾熱辣辣，小心食，咪熨親。

焦糖杏仁布魯塞爾窩夫配香蕉焦糖餅乾雪糕 $65

作為焦糖死粉，二話不說就相中依一款甜點，當然有假咨詢問過表姨甥女，哈哈。晌餐牌裡，會有兩個價錢，初頭研究過餐牌睇極都唔明，侍應解釋喺選擇雪糕球嘅分別，平嘅喺揀本地雪糕，貴嘅喺揀比利時雪糕，啊！原來如此，仲以為喺份量嘅分別。此外，另有額外配料添加，如額外雪糕球、新鮮生果、醬料……等等。

先唧上焦糖醬，再放下一大塊長形窩夫，簡單灑上糖霜，配上香蕉焦糖餅乾雪糕及杏仁碎，就成為我哋最後嘅一道菜。窩夫入口十分之脆，質感極為輕柔，好似一朕風，富蛋香，沾一點焦糖醬，放啲雪糕上面，再搽少少忌廉，一啖入口冷冷暖暖嘅感覺真喺無得彈。況且，個香蕉焦糖餅乾雪糕確喺正，香甜有蕉香味，雪糕內有點點餅乾碎，食得過癮。

甜點又點可以唔配杯熱飲，小弟一望個餐牌就已經好想試佢哋嘅焦糖杏仁雪糕咖啡，至於表姨甥女就鍾意熱食窩夫配凍飲，一杯奶昔就最啱佢。

焦糖杏仁雪糕咖啡 $38

杯雪糕咖啡嘅面層唧上忌廉，加上焦糖漿，再撒上杏仁碎，賣相認真吸引。基本上佢喺杯Affogato，濃縮咖啡加雲呢嗱雪糕，但賣相再做得靚仔啲。大可先撈底滔啲雪糕試試，夾雜咖啡及忌廉，感覺唔錯。再攪勻後，由於既有雪糕，又有忌廉，所以入口好滑溜，卻仍不失咖啡香味。

香蕉朱古力奶昔 $38

雖然無親身試過，但聽表姨甥女講，口感順滑，朱古力味濃郁，唯獨香蕉味比較弱，再加強啲就夠晒平衡。

今晚所試到嘅幾款窩夫菜式，的確各有特色，鹹甜皆出色。不過，始終地方淺窄，亦不宜坐太耐，幸而飯市時段客唔多，可以慢慢坐，悠閒食！

個人評分
味道：9/10
環境：7/10
服務：8/10
抵食：8/10
平均每人消費：HK$145

餐廳資料：
Waffills
銅鑼灣禮頓道124號地舖
2613 9600