|
悠閒生活此中尋
|
|
mjqueen7e
2016-03-06
308
0
|
分享
收藏
| 每個人對悠閒生活都有一個憧憬，唔使做，揸住開篷跑車四圍去固然是不少人的夢想，但如果億元彩金夢碎，暫時無米買跑車的話，學筆者咁，放假去 Café 「Hea」吓，食件熱呼呼的窩夫，過個輕鬆的週末，也是個不錯的節目。 事緣早前在 Instagram 見友人 post 咗張珍珠奶茶班戟相，見照片上的三層班戟，上面淋滿奶茶忌廉，並鋪上一粒粒黑珍珠，外型挺有趣，一問之下，原來出品是來自以慢享生活為主題的餐廳《RBTea》。本來打算這個星期六去佢尖沙咀店一試，豈料在網上一查，發現原來餐廳近日剛在銅鑼灣開咗新分店，嘩！啱曬我這個港島人，一於拉埋老公去嘗新。 新店座落於銅鑼灣記利佐治街金百利廣場三樓，店面貫徹以柔和的綠色為主調，配上用餐區的原木椅桌、淺灰色的矮身梳化卡座、雙人情侶韆鞦椅、日式木製樹幹、雀籠吊燈、馬頭壁燈和錯落有致地穿插於整個環境的花花草草，色調綠意盎然，舒服寫意，令人有置身於大自然中的感覺。 餐廳採半自助形式，食客要先去 counter 落單，店員隨後會將食物一一送上。先翻開 Drink Menu 細閱，款式勁多，足足有 37 項，由大熱的現泡花果茶、特調鮮果茶、冰雪樂、梳打特飲、濃醇咖啡、岩鹽系列，以至經典之選的奶茶、蘆薈茶等，全部有齊。兩口子一向愛喝凍飲，所以亦二話不說，第一時間剔了兩杯 Smoothies 冰雪樂。 單以冰雪樂一個 item 來說，店裡就已經有 7 款選擇，包括芒果、草莓、藍莓、抹茶紅豆、柚子及我倆點的 Oreo朱古力冰雪樂 ($52) 和益力多香橙冰雪樂 ($48)。兩杯飲品端上來時，見造型幾奪目，甚具欣賞性，同餐廳的時尚優美環境頗配合。朱古力沙冰上插有一塊 Oreo 迷你小餅乾，先啜一口，巧克力味道好濃好 Rich，配上一球 Mövenpick 雪糕，質感既幼滑又香甜。也試了老公點的益力多香橙沙冰，味道夠天然，而且甜度亦較朱古力低，啖落更湧出濃濃的橙香，感覺輕巧又解渴。 主食方面，先來一客香腸西蘭花芝士薄脆 ($42)，薄脆一份有 5 件，外形有點似切開咗的 Pizza，薄薄的餅底非常脆口，而且食落沒一般薄餅咁乾身。餡料方面只有西蘭花、香腸和芝士，說不上豐富，但咬下番茄味充足，而且芝士的分量亦控制得唔錯，名乎其實既薄且脆，用作餐前小食一流。 煙三文魚沙律脆香吐司 ($48)，多士一客 3 件，連同一小杯香草薯角，以木砧板端上，賣相骨子。拉近一看，多士烘成一個蓮花杯子模樣，內裡加入沙律菜和番茄粒，面頭再放上捲成玫瑰花狀的煙三文魚，造型挺美。拿起入口，吐司烤得非常焦脆，吃起來又酥又香，加埋頂頭味道鹹香的煙三文魚和微酸的番茄粒，食味非常豐富。至於旁邊的香草薯角，筆者就稍嫌佢有點腍身，唔夠香口，但老公反而收貨，說薯角咬下夠粉綿細滑，帶薯香之餘亦留有水份，吃起來不會乾巴巴，味道都唔錯。 近年興食鹹味的夾心窩夫，所以亦特別揀了這款外形既新穎又攪鬼、勁有創意的脆香鬆餅三文治，夾心餡料可以選煙鴨胸、厚切吉列豬扒同黑椒牛肉，全部都配脆薯角一杯。點了這款黑椒牛肉鬆餅三文治 ($56)，窩夫端上桌時已經切成兩半，外表有點像港式格仔餅，餅身較厚，不過格子面積唔算好大。用雙手拿起，豪邁地大口咬下，鬆餅吃起來唔算好脆口，不過質地幾柔軟，而且口感亦較普通窩夫煙韌，食落更充滿蛋香，配微辣的黑椒牛肉、新鮮生菜、番茄和芥末沙律醬吃，別有一番滋味。 日式咖喱炸魚柳飯 ($72)，成品送上時，見魚柳只得一塊，而且體積唔大，不過就配上一大兜看似濃稠的咖喱汁和面頭鋪上炒蛋的白飯。先切開魚柳一試，魚肉雖未至於入口即融，但咬下外脆內軟，既 Juicy 又唔乾身，加上外層炸衣夠薄，入口新鮮熱辣，食味亦不俗。稍嫌飯面的炒蛋不夠香口，而且沒豐盈滑溜的蛋汁，幸好用來配飯吃的咖喱汁，帶香味之餘又有蔬菜的甜味，即使怕辣的朋友都會容易入口，配米飯吃更加一流。 本來還想點珍珠奶茶班戟作飯後甜品，不過這頓午餐實在吃得太飽了，還是留待下次吧！結賬時發現原來只要惠顧滿 $128，就即送 $1 輕食鬆餅券一張，實在太好了，可以下次再訪時享用。
感謝 mjqueen7e 提供以上資料 mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong
|
~END~
人均
$159.00
| 商店 | RBTea (銅鑼灣店) |