其實，吉利尼一啲都唔嘢少，歷史悠久，佢嘅分店已過百家，仲遍佈東南亞，只喺小弟有眼不識泰山而已。

因為都嚟得早，所以，客人未多。店家以小店格局經營，地方唔大，木枱木櫈，排得有點逼。晌收銀位落單後，食物都會由店員送上，餐具、紙巾全自助，需要自取。

餐牌細細底面兩頁睇晒，面頁喺各式套餐或新加坡風味美食，背頁喺各類飲品，選擇非常簡單。其實，嗰時去新加坡嘅熟食中心或小檔，所賣嘅嘢都喺三幾樣主打，唔會好似港式茶記啲嘢多到過百款。

新加坡叻沙 $62

其實揀吉利尼都有少少原因，就喺老婆好想食吓喇沙，嗰時晌新加坡玩就好鍾意食。簡便嘅餐牌以外，仲有本書仔介紹店家嘅招牌菜式，喇沙喺其中一樣。

賣相就好對辦，橙紅嘅湯底，從店方嘅介紹，喺以蝦乾及多種香料熬成，加埋椰奶，所以，香氣四溢，味道唔會好辣，但有香料嘅層次感，又帶嚟淡淡椰奶香；配料亦都好豐富，有炸魚片、豆卜、雞蛋、銀芽及鮮蝦，啲蝦確喺幾鮮甜，炸魚片亦好爽口，豆卜吸滿叻沙湯，正呀；而麵條有啲似米線，但口感應該喺幼身少少，卻喺同樣滑溜爽口！

傳統咖椰多士 +$14

叫餐可以用優惠價點一客，否則，正價買喺要俾$22。多士可以再烘燶多少，不過，依家塗滿香甜嘅咖椰醬，夾住厚薄剛好嘅牛油，入口先有一朕牛油嘅鮮香，慢慢滲出斑蘭嘅清甜味，實在美妙嘅組合。題外話，其實我個人覺得，我哋港式嘅奶醬多亦一樣唔失禮㗎！

法式燒蛋多士配咖椰 $24

其實，就喺我哋晌茶記慣常食嘅西多，不過，糖膠換成斑蘭醬。佢哋強調啲斑蘭醬絕無添加人造色素，又無落防腐劑，故自然食得更安心。

比起傳統咖椰多士，依一款多士就相對更有蛋香，此外，斑蘭醬及牛油放晌邊，沾多少隨意，好似我老婆唔太鍾意食牛油，就可以搽少啲。

淡奶咖啡（跟餐）

除鮮奶咖啡外，其實小弟都喺白咖啡粉絲，嗰時去大馬、星州一帶旅行，差唔多日日嘆一杯㗎，貪佢無咁傷胃，咖啡因相對又含量低啲。不過，今次卻喺試試淡奶咖啡（Kopi-C），醇香而帶點苦。

講到白咖啡，又即時想番起兩年前到訪過檳城、浮羅交怡、吉隆坡……等地，一行4人玩得好開心，有機會真喺要走訪吓白咖啡嘅發祥地「怡保」！

個人評分
味道：7/10
環境：7/10
服務：7/10
抵食：8/10
平均每人消費：HK$50

餐廳資料：
吉利尼 Killiney
尖沙咀加連威老道100號港晶中心6-8號地下
2723 4333