|
鮮材入鍋＊富足盛宴
|
|
mohkc
2016-02-24
451
0
|
分享
收藏
喺香港餐廳中要食一餐十全十美嘅廣東菜，唔係容易嘅事，蒸、炒、燒、炸、燉、烤、焗，幾乎所有餐廳都識得，也同樣識做各種菜式，一定有一點餐廳特別專長做，另一類酒家又未必有這些菜餚，更有一些以湯水見稱，所以話係要食一桌完美嘅菜式，倒不如我哋去一間餐廳就食佢哋專注而善長嘅煮食方法。 由大廈搭幾層升降機，踏出後就到餐廳，店員親切嘅歡迎，確認booking後就帶我經過魚缸進入餐廳，聞到淡淡嘅稻草味，樓底高位置之間寬躺，選了大堂中央嘅位置，都唔會感到壓迫，仲有電視可以一邊睇劇一邊係食飯！裏面有三間房間，私人度較高，可不比客人訂位，大堂有八張圓枱，跟窗邊就有可以坐六人嘅卡位。 食清蒸嘅菜式，除咗係對火候嘅考驗，對食材嘅新鮮程度亦係關鍵之一。海鮮食材每日下晝新鮮送到餐廳，店員都話佢哋做蒸鍋嘅，無咩特別嘅烹調，賣嘅就係各種新鮮海鮮！ 呢個好似草帽嘅，就係鍋蓋，密不透風保持著高溫，下面有接近380度嘅蒸氣熱力，向上不停蒸煮，鍋具嘅旁邊有計時制，先可以煮到最適當嘅程度，比起九層塔或另一間連鎖酒樓形式嘅石氣鍋都嚟得更方便。 Sparkling water $38 會個位都有一個茶几房，鉗子用不同顏色區分，用來分別生與熟嘅食品，奇怪見到下面有一疊嘅碟，原來每當食完一道菜色，如果食到貝殼類嘅海鮮，店員都會幫我哋替換，各種安排到顯得餐廳特別細心。 頭盤小食有蜆肉豆豉，咸點味道濃郁，蜆內帶點咬口，配搭爽口蔬菜。仲有指天椒、蒜蓉同XO醬，等待一陣食嘢嘅時候可以加落去。好！睇睇下菜牌先，用上紅色包裝分類清晰，蒸氣石鍋名菜分兩個大小份量$ 98-188起，貝殼種$48-148/隻款式都好多。 鮮腐竹新鮮排骨粥 $68 天氣咁冬，大家先選擇粥底，用鮮豬骨可再配腐竹或南瓜，先將佢哋放落鍋底，最後先為大家分解！ 清蒸紐西蘭鑽石蜆 $148 食係一種藝術，識得食、食得精，如果餐廳安排得好，一餐飯嘅過程就會大大加分。識得食，就係要識得分食材何時為時令、食得精，就要選擇食材中最好嘅產地。紐西蘭水域清潔，令蜆中鮮甜，蒸好後蜆殼幫助保持原汁原味，我一手拎起，先嚐嚐肉汁，非常清甜！ 六頭南非鮮鮑魚 $ 68/ 隻 提起鮑魚，自然會諗起各款矜貴菜餚，好多時係餐廳食到唔同嘅鮑魚，云云之中，最令我印象深刻，就係呢到嘅南非鮮鮑魚，豐厚真為上品，烹調後非常有咬口。配上蟲草花，雖然冇特別嘅味道，但營養豐富可以化痰止咳，對氣管都好好。 紐西蘭蟶子王 $48/ 隻 蟶子，學名縊蟶，體質狹長形，蟶子王又長又肥大有三寸長，好似手指公咁粗，有兩片瓣狀薄貝殼，當係海鮮市場見到蟶子排成整齊，白色軟滑嘅肉就會突出嚟，蟶子穴居於沿海泥沙中，所以係在烹調食用前一定要用清水養三、五小時，比佢吐盡沙，咁食起上嚟就唔怕啦！味道鮮美豐彈性，再配蒜蓉粉絲，食上嚟再更香口！ 手剁惠州梅菜豬肉丸 $78 前輩講過，以往餐廳聘用一位廚師前，會有一場測試，當老闆嚐試過後，認為滿意才會正式雇用。所謂嘅考試，其實就係煮一餐飯，要佢煮幾道菜試試味道，其中一道就係蒸肉餅，呢道菜差唔多每個廣東人都識得煮，邊個都食過嘅家常便飯，而測試就可以試到廚師嘅刀工，要食起嚟鬆滑、有咬口。 蒸肉餅，可以話係我係屋企最鍾意食嘅菜式，蒸肉餅嘅配搭層出不窮，就好似男人嘅浪漫豆腐火腩飯咁，所有配菜都係肉餅嘅好朋友，鹹魚、馬蹄、鹹蛋等，都能成為一道又一道餐桌上搶手嘅小菜，而餐廳選用我哋喜歡嘅甜梅菜，將佢切碎後匯入豬肉中，當店員送上嘅時候肉質仲係好鮮嫩，睇得出手打嘅肉丸皺理比較多層次，當蒸熟後我哋每人有三粒，做成圓形嘅肉丸，切出嚟都更加厚身，夾埋梅菜就更有口感，自家製口味更特別，甜梅菜平衡到肉丸咸味，口味層次豐富。 青蒸瑤柱蘿蔔片 $78 文章上面提過要吃得時令，冬天最適合食蘿蔔，入秋之後，就係盛產嘅季節，天氣愈凍、蘿蔔就愈靚，自古以來都有「佳蔬良藥」之稱，亦係窮人的人蔘，將快到中國新年，最記掛嘅就係臘味蘿蔔糕，冬天嘅時候食盆菜時，最底都會有蘿蔔，因為水分多又可吸收到個款食材嘅精華。簡單配瑤柱，建議將佢蒸好後再焗一下先食，先會更容易蒸熟，少量瑤柱就可帶出蘿蔔清甜，令一餐過後感覺暖身。 到最後，食完一整餐都好滿足，最底一層有之前就準備嘅鮮腐竹新鮮排骨粥，用高溫煮了幾個小時，令到粥底好軟綿綿，排骨肉質半肥半瘦，全份都可以食晒，建議可簡單加啲鹽，提升一下味道，而腐竹就帶出甜味，係個唔錯嘅選擇。 簡單生果盤作結：） 最後建議餐廳，當食客點好食物後，店家都太快將佢拎出嚟，但係我哋張枱嘅位置唔多，要放係茶几到，要等一道菜色蒸好後，先接着另一道，個人應為反而會影響新鮮程度，簡單稍作安排，就可改善到。 平均消費$484/位，2位，5個菜式＋1份粥底＋2個飲品 喜鍋 海鮮.點心.活刺身 蒸氣石鍋專門店 星期一至日: 11:00-16:00; 18:00-02:00 尖沙咀天文臺道8號2樓2號舖 Tel: 2682 2628 / 6179 5622
感謝 mohkc 提供以上資料 mohkc 的網誌: http://www.openrice.com/zh/gourmet/reviews.htm?userid=717759&city=hongkong
|
~END~
人均
$484.00
| 商店 | 喜鍋 海鮮.點心.活刺身 蒸氣石鍋專門店 |