|
當放題遇上鐵板
|
|
mjqueen7e
2016-03-12
780
0
|
分享
收藏
又來到 Wonderful Friday，見兩口子已很久沒吃放題，決定上網做吓 research，看看有甚麼新開放題店值得一試。從食評網找到這間滿屋飲食集團的新分店《御滿屋》，原來餐廳於去年 12 月中才開幕，據說店子首創以放題 X 鐵板燒，而且現在期間限定，幫襯仲有 6 折體驗價優惠。另外發現這間新店竟然可以食足 3 粒鐘，其實平時食放題只得兩粒鐘，感覺有點趕頭趕命，呢間咁筍，一於提早一點下班，同老公齊齊去放縱吓，癲番晚。 餐廳座落於旺角胡社生行 1 樓，即九龍匯豐總行與雅藺中心之間，離港鐵旺角站 E1 出口只是 1 分鐘路程，交通挺方便。是晚我倆被安排坐於走廊位的一張二人卡座，剛好可以看到幾位壽司吧的師傅，埋頭苦幹。 先介紹一安吓這裡晚市放題的價錢，原來是分為兩個時段，頭輪由 5:30pm 食到 8:30pm，足足有 3 個鐘，比起一般任食 2 小時的放題，時間更充裕，而第二個時段就由 8:45 pm 吃至 11:15pm。至於收費方面，就要視乎入座的日子及時間而定，以成人價為例，由 $228 至 $248 不等，另收加一服務費。另外店子還設有一個勁抵子夜放題時段，由 10:30 pm 食到凌晨 01:30am，定價更低至 $168 一位。 先翻開兩本夾滿放題紙的厚皮簿細看，一數，共有十三張，全部以不同顏色由 A 至 L 劃分，分別有刺身、壽司、火炙壽司、創作壽司、卷物、手卷/軍艦、小食、燒物、炸物/天婦羅、一品料理、鐵板燒和主食。餐廳另設有自助飲品及甜品櫃，除汽水啤酒任飲外，所有小甜點、芝士餅、奶凍等都是任攞任食。 就一於趁未上菜先拿幾罐飲品埋位，發現有這款泰國進口的 Joos 果汁，味道唔錯，帶水果的天然香味，店裡有蘆薈白葡萄、橙和蜜桃三款口味可供選擇。 先來一些刺身打開胃口，點了三文魚、北海道帶子、油甘魚、鮑片、北寄貝同赤貝，幾款當中，最愛吃的當然還是三文魚刺身和油甘魚刺身，前者三文魚刺身入口新鮮肥美，肉質細嫩，加上切得勁厚身，口感一流。至於後者油甘魚刺身，油分雖然唔算好豐滿，不過肉質勝在夠彈牙。如果大家愛吃刺身，其實落單紙上還有章紅魚、吞拿魚、希靈魚、甜蝦和赤蝦等。 壽司方面，其實選擇都幾豐富，店裡除了有一般大路的壽司供應外，更設有多款極具創意的壽司，例如泰式生蝦壽司、XO 醬風腿壽司同黑松露油甘魚壽司等。另外仲有 5 款創作壽司，用咗「極」、「御」、「品」、「尚」、「匠」為名，睇圖都覺得幾吸引，不過由於想留肚吃炸物和鐵板燒，所以只點了卷物中的芝士軟殼蟹卷和加州香芒三文魚卷。前者芝士入口又香又軟滑，芝味香濃，配上飯粒入面包住的香脆炸軟殼蟹和清爽的青瓜，口感豐富；而後者香芒亦夠鮮甜滋味，加上肥美的三文魚和頂頭彈牙的微鹹黑魚籽，味道配搭出色，值得一嘗。 手卷方面，選擇不多，只得三文魚、海膽、軟殼蟹和吞拿魚腩 4 款，不過見外形咁小巧的骰，即管一試。小試牛刀，點了三文魚手卷和軟殼蟹手卷兩款，食落完全無驚喜，軟殼蟹分量還可以，但入口唔夠脆卜卜，而三文魚就勁迷你，無乜口感可言。 還是火速進入燒物環節，揀了鹽燒牛舌、燒紐西蘭羊鞍同燒有機菠蘿。鹽燒牛舌質感幼嫩，入口完全不帶臊味，質地跟雞腎有點像，爽爽脆脆，頗有嚼口，只是味道略嫌調得有點過濃。燒紐西蘭羊鞍賣相勁瘦弱，但估唔到肉質幾嫩滑，入口仲散發著淡淡的羊羶香，味道不俗。至於燒有機菠蘿，菠蘿端上來時見切得非常厚身，而且底面兩面也燒至微焦，挾起入口，又甜又多汁，勁 juicy，是用作間場的不二之選。 來到炸物同天婦羅，先介紹蝦天婦羅同日本番薯天婦羅，碟上的蝦天婦羅放上檯時，雖然已經攤凍咗，但咬下不覺油膩，而且皮薄香脆，入口鬆化，唯一不足是稍嫌蝦隻不太彈牙，可幸蘸點汁料後，仍算可口。蝦隻下面是番薯天婦羅，炸過的紫心番薯，入口微甜脆香，番薯味勁濃，加上中間亮麗的紫色，著實教人動容。 炸黃金白飯魚平日較少機會食到，所以特別點來一試。炸過的白飯魚，咬下外層香脆、而且肉身飽滿，雖然食落無椒鹽白飯魚咁惹味，但炸到脆卜卜，連骨食，入口 juicy 鮮香，水準亦不俗。 至於其他點吃了的炸物，仲包括有紫心香芋丸、吉列魷魚圈、自家製吉列蠔同芝麻雞翼。香芋波波外層香脆，而內裡的芋頭蓉，入口亦夠軟綿細滑，不過食落就稍嫌有點味淡；吉列魷魚圈頗煙韌、而且肉質彈牙可口，脆漿亦不會很厚。反而自家製的吉列蠔，外層炸衣唔得，過厚，好彩一入口蠔汁即時標出，味道都算唔錯。芝麻雞翼向來是筆者心頭好，加上成品炸得非常香口，屬必食之選。 鐵板燒方面，一共有 9 款選擇，包括美國薄燒牛肉，鐵板醬汁魷魚筒、鐵板燒香蒜青衣柳、鐵板大蝦、鐵板岩鹽焗牛舌、鐵板炒雜菜、鐵板牛油香蒜帆立貝、鐵板炒野菌、鐵板牛柳粒。試了當中 4 款，薄燒牛肉最正，入面卷咗炸蒜粒同蔥花，肉質雖然唔算好嫩滑，但食落幾有肉汁。青衣柳分量極多，一客 4 件，大大碟，肉質飽滿滑嫩，而且魚味都唔錯，幾濃，面頭淋咗香蒜汁，入口夠曬甜香，是很有水準的作品。岩鹽焗牛舌反而麻麻，雖然幾香軟腍甜，不過筆者還是較鍾情於爽口又唔韌的燒牛舌多一點。帆立貝以鐵板煎至 8 分熟，口感嫩彈，而且食落多汁，帶陣陣濃郁的牛油蒜香，頗惹味。 其實餐廳出面仲有個自助區域，除了冷盤吧外，仲有好幾款生果、粟米羹、花生糊，同小朋友最愛的朱古力噴泉和泡芙等供應。不過兩口子食力實在有限，所以只拿了幾款紅豆水晶餅、朱古力 mousse、水蜜桃楊枝甘露、奶凍等小甜點埋位品嘗。朱古力慕絲最有驚喜，巧克力味超濃，而且質地幾滑，朱古力迷千祈唔好錯過。 最後當然要留肚食埋杯 Movenpick 雪糕，不過每人只限一杯，而且只得瑞士朱古力、士多啤梨同雲呢嗱夢幻三款口味可供選擇。整體來說，這裡的食物，水準唔錯，而且價錢都幾合理，雖然有漏單情況，而且上菜效率唔算高，不過如果來食頭輪的話，可以食足三粒鐘，的確是物有所值。
感謝 mjqueen7e 提供以上資料 mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong
|
~END~
人均
$273.00
| 商店 | 御滿屋日本料理 |