|
好時沙嗲:經濟實惠既好姊妹談心夜
|
|
Iki
2012-08-31
366
0
|
分享
收藏
好時沙嗲 Good Satay
好時沙嗲係一間人氣高企食星馬菜既餐廳, 曾經有好多次都想黎好時潮聖,但最後要到今個星期五先黎到 要同姊妹們HAPPY FRIDAY 已經預早(雖然講緊都係2,3個鐘頭前)打黎訂個位, 訂既係8點鐘,但店員都講左訂左位都要等一等 雖然已經有心理準備,但依然俾呢度既人龍嚇親 絕對係稱得上係人頭湧湧 相信呢度係成個好時中心最多人既地方 佢好似一個大型大排檔咁, 幾乎佔據晒成條走廊 係等既時候見到係玻璃上貼滿左各大雜誌既報導同獎項 相信佢自打出人氣之後,已經到左一個有麝自然香, 唔憂做既地步 門口貼住OPENRICE上有超過200個笑瞼既貼紙呢! 而家已經有超過400個笑臉了 雖然人山人海,但訂左檯既原因,真係有優先, 15分鐘後就有位了 (所以建議先訂位) 但因為要人齊先入既關係,要等姊妹黎齊先入得 最欣賞既係佢冇限過左幾多個唔可以排,後黎仲主動問我人齊未 係人齊後亦好快可以入到去 呢度裝修簡約,冇咩野花巧既裝修佈置 好幸運可以坐係餐廳既一角,可以放聲聊天 預早已經做好研究,呢度出名既係星洲炒蘿蔔糕,海南雞飯,串燒,叻沙 講緊每個菜都係幾十蚊,有平過出面唔少 上菜都上得幾快 串燒: 一客6串可有3種口味(豬,牛,羊各2串) 肉烤得唔錯,有鎖住肉汁,肉質亦唔硬 配合特製的沙嗲汁會布畫龍點睛之效 星洲炒蘿蔔糕:呢一味係呢一餐我最喜歡既菜式 一黎係分量很多,毫不吝嗇 蘿蔔糕既大細係差不多"一口"既 蘿蔔糕炒得夠香夠入味 豐富既配料令成個菜式生色不少 有蝦,雞蛋,香蔥,微量辣椒,菜甫粒 很好食, 稍嫌可以更熱 海南雞飯: 賣相很好 海南雞肉較薄身, 下面墊住左唔少既蔬菜, 但雞肉都尚算夠香滑 相比KITCHEN 65既,好時既雞肉薄身一半,但較有香味 有3個醬汁配合,最鐘意紅色哥個微辣既,啲啲辣,很開胃 油飯有微微既雞油香,唔會好油膩 飯粒亦係粒粒分明既 叻沙: 大件夾抵食之算 椰汁味很香 有雞絲,豆卜,魚蛋,鮮蝦 麵條係幼身既,吸左湯汁之後味道更濃郁 另外仲嗌左一杯椰汁飲品,清一清熱氣 但個椰汁冇咩甜味 亦冇咩椰香, 唔算十分好飲 呢度收得比較早,10:30PM就清場了 雖然唔算嗌左好多野,但以女仔既分量大家都飽得要捧住肚子走了 平均消費: $78
感謝 Iki 提供以上資料 Iki的網誌: http://ikiyeung.blogspot.hk/
|
~END~
| 商店 | 好時沙嗲 |