|
潮濠城酒樓 Hover City Chiu Chow Restaurant：心血来潮
|
|
山區麵包王
2016-04-09
1531
0
|
分享
收藏
| 離開求學階段之後，都好耐未接觸過啲運動會之類，適逢教會搞咗個大型運動會，讓小弟再次踏入深水埗運動場，有唔少細胞小組組員參加咗親子比賽，小弟就當然要嚟撐吓場打吓氣啦。完咗運動會，就同佢哋一齊過嚟長沙灣廣場嘅潮濠城大擦番一餐！ 始終喺午市，人氣有番咁上下旺，加上附近有住宅，有廠廈，而中式酒樓晌茘枝角區競爭應該唔算太大，所以，生意應該唔憂。格局就一般嘅中式酒家，四平八穩，無咩特別，一張枱拍一張枱，唯通道都算闊落。 咪睇潮豪城個名好似好「娘」，其實晌度消費都唔平。睇睇張點菜紙，小點$16、中點$22、大點$28、特點$32、頂點$38，茶位$12，佔座位就大小同價，出面有啲酒樓如見喺太細個仲坐緊BB櫈，多數都唔收茶錢，另外仲月潮式烚花生$10碟，好似我哋一行8大4細，未見官，先打$174（3碟花生）。 因為都喺純粹搵個地方飲吓茶，食吓點心，所以，就算嚟到潮濠城，都無話要特別試啲乜。不過，見午市有啲孖寶（$98），今日仲喺蠔仔肉粹粥，又有灼時蔬，幾啱口味，就不妨點一份。 蠔仔肉粹粥 撈一撈，都見有幾多蠔仔，絕無欺場之感，而粥底喺潮式嘅粥水，但啲米粒都煮到爆米花，整體味道唔錯，有份鹹香味。 灼生菜 只要啲生菜本身唔太差，基本上一碟約灼菜唔會有太大問題，而啲生菜食落仲帶有少少脆口，就算喺交足貨。 輪到講講點心，一張點心紙交待晒有咩類別、有咩選擇！ 特製蝦餃皇 $32 確喺有啲質素，餃皮好薄、好透，外面都已經睇到內裡塞滿蝦肉，爽口彈牙。 鮮肉小籠包 $28 呢個無食，睇外觀包得不俗，同樣皮薄，睇到組員一咬爆晒汁，但味道、口感就無多口一問。 家鄉燒賣 $28 又喺無試到嘅點心，所以唔知點家鄉法，跟廣東嘅唔知有咩分別，擺埋出嚟當個記錄。 薑蔥牛栢葉 $22 啲點心一嚟到就被我極速先影相，但碟牛栢葉好似被人偷食咗少少咁，份量有啲縮水，還好牛栢葉爽口。 金沙流沙包 $22 有別常見嘅流沙包外表，一身金黃，包身更鬆軟，而流沙餡好甘香，不過，個「流沙」程度就唔算得好澎湃。 蠔皇叉燒包 $22 幾個細路嘅恩物，所以，無同佢哋爭，味道喺點？我諗就算問佢哋都只會答好好食。 鮮蝦時菜餃 $28 依個時菜餃好食，餃皮搓得晶瑩薄透，鮮蝦跟時菜嘅份量好平均，味道清新、鮮甜！ 潮州粉果 $22 做番潮州嘢果然撚手啲，粉果皮入口煙韌而唔黏牙，餡料大細適中，既有口感，又唔會太細碎。 家鄉糯米卷 $22 啲組員似乎比賽完幾肚餓，轉眼無晒，試都無得試。 沙嗲金錢牛肚 $28 牛肚炆得幾腍，不過，個沙嗲個人覺得麻麻，做得較粗，但味還是香濃。 芋絲春卷 $22 平時啲春卷都喺啲冬菇、蘿蔔、筍絲之類，依個帶潮式風味嘅裡面全部喺芋絲，鍾意芋頭山嘅人應該幾對胃口，否則你會覺得有啲乾。 蜜味叉燒腸粉 $32 叉燒確喺放得唔少，可惜喺腸粉皮較為厚身，而味道還可以。 香茜牛肉腸粉 $32 雖然都喺腸粉，唔知點解依一碟個腸粉皮就拉得稍為削，影響咗個口感，只可以解釋為水準不穩。 椒鹽九肚魚 $48 啲九肚魚非常嫩滑，炸得香脆，又一啲都唔油，椒鹽味重身啲都無妨。 脆皮燒腩仔 $48 賣相雖然有啲麻麻哋，但質素又唔喺咁差，外皮幾脆，腩仔肉肥瘦相間，肥肉部份又唔算多，所以，食落唔會太覺得佢肥。 陳皮牛肉煲仔飯 $32 初時會諗住啲陳皮會軋得細碎加入牛肉度，打個煲蓋先知喺迤做，就咁陳皮切絲放上面，所以，陳皮嘅香味未喺好完全融入牛肉中，不過，牛肉本身打得鬆化。雖然話煲仔飯，但明顯喺搵個煲仔載住做嘅「盅頭飯」。 家鄉炒麵線 $98 我覺得逢有「家鄉」兩個字都有少少「賴野」，其實個炒麵線無乜料，可幸個麵線炒得唔差，食完都唔會碟底泛油。可能叫個荷葉飯啱大家啲，仲要比炒麵線平$10添。 餐後迎來消滯解膩嘅功夫茶，苦中有回甘。 因為小組人多勢眾，今次都已經喺未出齊，所以，基本上每個月份都梗有人生日，故此我哋又順道為3、4月生日之星慶賀一番。大家果然好有心，一次過預備咗兩個細蛋糕，一個嚟自美心，另一個嚟自Lassana，無論邊一個，大家都大讚好味，而蛋糕嘅食評就另文再分享。 個人評分 味道：6/10 環境：7/10 服務：7/10 抵食：6/10 平均每人消費：HK$85 餐廳資料： 潮濠城酒樓 Hover City Chiu Chow Restaurant 荔枝角長沙灣道833號長沙灣廣場1樓 2745 7655
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | 潮濠城酒樓 Hover City Chiu Chow Restaurant |