|
潮州米芝蓮
|
|
MonkeyHin
2016-02-24
292
0
|
分享
收藏
生日一向都應該慶祝，特別係我Dearest媽咪既生日，就更加要慶祝啦!一家人一齊去食好野!!呢間米之蓮推介一直都想搵日試下，今日終於有機會啦! 荷包白鱔湯: 一開波就飲啖湯先，寫菜時侍應話呢個湯係潮州既名菜，我地諗都無諗，梗係叫啦!其實呢個湯係用荷葉包住白鱔去煲，起初我地唔知係呢個好似大碼生菜包既葉食唔食得，因為平時食荷葉雞都唔會食D荷葉架嘛，細問之下原來係食得既!今晚真係第一次食荷葉咋XD平日我都好少食鱔，因為怕多骨，呢個白鱔肉，肉厚嫩滑，色澤純白，係新鮮既鱔肉，個湯味道十分鮮甜，十足老火湯既味道，荷葉同白鱔肉都煲得好林，大人小朋友都容易入口，不過要小心魚骨呀! 凍花蟹: 蟹既營養價值高，所以我一直都中意食。呢個花蟹保留左D天然蟹既風味，口味純正，肉質肥﹑堅實，唔會同一般蟹肉咁一咬就散晒!D花蟹仲好大隻，蟹鉗都容易處理，每隻都內含肥美既蟹膏，真係無得彈! 滷水鵝片: 完全同一般潮州打冷店無得比，份量夠，我地12人都食唔晒! 鵝片厚薄適中，可以感受到師傅既刀功，每塊鵝片都充滿住香濃既滷水味，肉質都解嫩，汁多美味。我最欣賞鵝片肉多過肥肉，食起上黎都比較健康。呢個滷水鵝片我媽咪都讚好!唔怪得可以攞獎啦J 滷水千層峰拼鵝腸: 呢個菜式我真係從來都未食過，呢味菜係由豬耳合拼成為一個豬耳凍，再以正方形既SIZE切開，真係好考心思同刀功!每個正方形既豬耳凍都內藏幾件豬耳，師傅要保留完整既豬耳真係唔容易!豬耳柔韌爽脆，雖然凍食，但都不油膩。鵝腸好爽脆，煙煙韌韌，有嚼感，但放入口中又容易咬碎，呢個菜式真係令人回味無窮! 潮陽炸雙棗: 媽咪一聽到我地點呢個菜就話唔好叫，一定係炸紅棗同蜜棗XD，但係我地覺得好特別，又唔貴，所以叫黎試下。黎到好彩無令媽咪失望，原來係炸蝦棗同蟹棗!!!蝦棗係圓形，蟹棗係方形，好有心思!咬開黎試下，係蝦丸同蟹丸混合左D肉去炸，蝦蟹肉都好新鮮，亦幾彈牙，最好既係D肉係新鮮肉，無霉，食起上黎好滋味!雖然D丸炸過，但係一D都唔油! 子母龍鬚蝦: 呢個菜黎到既時候，我心諗:做咩咁似人地擺酒上既炸蝦丸呢XD，一食之下先發現完全唔同!所謂既龍鬚其實係一堆炸絲包住D大蝦肉，龍鬚炸絲卜卜脆，非常香口，表妹仔仲一條一條咁食，食得好滋味!唔好以為同普通炸蝦丸一樣喎，呢個炸蝦肉中間仲有蝦膏同蝦籽，蝦肉用蝦膠製成，新鮮就唔在講，仲肉厚又彈牙! 蝦膏同蝦籽簡直就係精華，非常滋味之餘，仲有陣鮮甜味。一個簡單既炸蝦蝦可以食到蝦肉﹑蝦膏﹑蝦籽，真係成隻蝦咁品嘗! 百樂潮洲你係掂既!有創意有心思!
感謝 MonkeyHin 提供以上資料 MonkeyHin 的網誌: http://www.openrice.com/zh/gourmet/reviews.htm?userid=533237&city=hongkong
|
~END~
人均
$385.00
| 商店 | 百樂潮州酒樓 (銅鑼灣希慎道總店店) |