|
高質中菜*景逸軒
|
|
暴食小公主
2016-04-27
516
0
|
分享
收藏
| 上星期有D開心事慶祝 所以就同屋企人出左去食飯喇 天文台道有新既商廈開左 入面仲有好多新餐廳，所以就去左試下喇 景逸軒係紅磡都有一間 當晚食飯果時講起其實家姐就係o係紅磡果間擺酒 因為尖沙咀店真係好新，同埋配合大家擺酒用 裝修都比較高雅同grand 配埋落地長窗，雖然無海景睇，不過個感覺都好開揚 除左正常menu外，都仲有推介menu同埋套餐 其實套餐都幾抵食，$200一位有湯有魚仲有翅 如果唔想諗叫咩菜，都可以試下 足料老火靚湯 $138 黎之前聽人講過呢到d湯幾正 點知menu睇黎睇去都搵唔到有湯 所以就問下店員，呀姐好爽快就話有湯呀 因為老火湯日日唔同，當晚我地飲既係日本南瓜煲雞 正係睇碟湯料都feel到佢地既誠意 湯料切好仲要砌埋咁上枱，好有heart 日本南瓜食落爽爽地，有少少似合掌瓜 但係就再甜d，同平時食到既好唔同 個湯推出黎果時仲係熱辣辣 (你睇下張相d煙) 味道好好，好甜，一d味精味都無 好有住家湯既感覺 最正既係，我地4個人去，每個人可以飲到2碗幾 而呢煲野竟然只係收$138 其實自己買料煲都唔只呢個價 黎呢到食飯記得一定一定要叫個湯 脆皮素鵝 $48 對腐皮食品無咩抵抗力 雖然佢個餡有好多料 不過腐皮太薄同唔夠脆，都有d失望 鮮果拔絲黑豚肉 $88 本來掙扎緊叫唔叫咕嚕肉 之後見到menu有呢個，就決定試下 第一時間梗係要試下係咪可以拔到絲先 果然係可以既，而且糖既比例好好，唔會太多，又唔會太少 係岩岩好夠裹住件肉 黑豚肉食落仲有驚喜，肉質爽中帶腍 個質地有少少似豬頸肉，但又再腍d 而且一d都唔油膩，必食推介! 蟲草花野菌蒸比目魚 $128 魚扒厚肉而且得條主骨 就算老人家/小朋友都一定食到 魚肉嫩滑帶少少魚油既香味，好食 除左條魚，配角野菌都好好食 野菌片片都好厚肉同本身有調味 食落又滑又香又鮮，好食到唔知點形容 濃湯桃膠浸菜心 $88 桃膠即係桃樹既天然分泌物 係呢一兩年既新興健康食品，功用有D似雪耳 都係有好多植物膠原，有養顏既作用 之前都有食過桃膠糖水，其實桃膠本身就無咩味道 所以呢到用濃湯黎煮，係好適合既做法 雖然主角只係好普通既菜心，但而家加左湯，桃膠同埋竹笙 就令成件事唔同哂喇，配搭得好好 羊肚菌百合鮮准山 $98 鮮准山同荷蘭豆夠爽脆 百合新鮮又帶少少甜味 唔單止賣相好吸引，味道都一樣都好清新 美中不足既係羊肚菌可能比較吸味，所以咸左少少 圍村蒸滑雞 $88 雞肉唔單止有少少荷葉香 仲有d臘腸既香味 出面d滑雞多數都食到成口油 但呢到油既量係可以接受 而且每件雞都好滑 我唔知圍村係咪真係咁蒸雞 不過我以後一定會偷師試下咁煮 杞子桂花糕 $25 桂花糕用個心心碟裝住，又幾有心思 不過唔係好夠甜同桂花香，質素一般般 原個椰皇燉鮮奶 $28 因為係即叫即燉，所以都要等成30分鐘 建議可以食飯食到一半就order定 鮮奶加埋梛青水一齊燉 食落夠滑而且甜味比較清新，正 呢到既食物唔單止著重味道 擺碟同埋食物既配搭都睇得出係有花心思 另外要讚既就係服務，每個員工都好有禮貌 而且全部員工既儀容都好整齊 制服好直，女員工仲會化淡妝 雖然出去食飯，好食先係最緊要 但如果一間餐廳連呢d咁仔細既位都顧及到 你就可以知道佢地唔係亂黎，係有用心去諗每一個細節 其實係呢個區，呢個地段，價錢真係好合理 如果你想搵個舒服，有質素既地方食下中菜 小公主真心推薦你黎呢到試一試。
感謝 暴食小公主 提供以上資料 暴食小公主 的網誌: http://www.openrice.com/zh/gourmet/reviews.htm?userid=58662494&city=hongkong
|
~END~
人均
$200.00
| 商店 | 景逸軒 (尖沙咀店) |