上到L3行到最入，喺Food Garden對面就係，我Booked咗7:15，其實嚟到嘅時侯都唔多人

呢度周圍環境都由好多摺紙做成，就喺門口已經見到有塊版釘住好多客人畫嘅圖畫

原來每位入場客人，特別係小朋友，都會派一塊好似杯墊嘅咭俾佢哋，喺上面可以自創圖畫

被店長揀中的話就可以貼堂，就算冇貼堂都好，佢都會花心思將佢哋貼在店內的位置

店內環境好舒服好簡潔！就連燈罩都係用摺紙造型

店內有3個榻榻咪位，我哋一場嚟到就算坐得唔舒服都想試吓佢

但係坐咗落去之後又比想像中冇咁辛苦，但係如果要我餐餐坐都真係幾攞命，尤其是我呢D肥大叔

一坐低佢哋急不及待就拎起枱上面嘅木顏色，要開始喺張咭上面畫畫

D咭本身都已經有圖案喺度！當然你都可以自創想畫咩都得

然後侍應好細心咁拓住幾隻小杯子，問我哋想要邊隻顏色嘅杯！

雖然用咩杯飲個啖茶對我嚟講真係冇分別，但係佢呢個咁細心嘅舉動正好讓客人有一種被尊重嘅感受

喺未叫Order之前已經令你對店產生好感，等你一陣叫嘢食嗰陣都闊綽D

餐牌都係靚靚的，見到都開胃！不過裡面全部係日文字，唔知係佢俾錯咗本日文版我定係只有呢一款餐牌

不過我之後好肯定係得呢本，因為我有幾款睇唔明嘅時侯問侍應佢都冇俾本純中文版我

其實都還OK嘅！總之都會識叫，而侍應都好願意回答你

呢個榻榻咪位雖然對大人嚟講會有少少唔慣，但係小朋友就坐得好舒服，特別平時嗰D坐唔定

好似哥哥成日坐得半個Pat嗰D細路，喺呢個位佢哋兩個全程都坐得好好！我都開始考慮好唔好屋企以後唔用飯枱，改用矮枱坐地下食飯！

嘢食未到，佢哋慢慢畫畫最好不過！

從另一個角度望過去我哋個位！

就連碗碟筷都好精緻！尤其我同媽咪都超鍾意個筷子拓，一小片櫻花真係好靚！好想擁有佢

唔駛5分鐘，先嚟一碟甜蝦刺身(5件) $58

連放側邊嘅配菜(好似海草的食物)都非常好食！

甜蝦非常新鮮，食落清甜！呢個價錢真係超值

跟住嚟碟黑豚生薑燒飯 $98

一上枱我同媽咪第一個反應都係「嘩！咁大碟」真係抵食

起碼以為呢D扮High Class嘅料理店，Order碟定食或飯之類一定碟餸超細碟，估唔到呢碟豚肉多到你唔信

可能你以為佢咁大碟就一定好削，但係真係好好食！肥瘦適中，口感似食緊肥牛！中間夾集一些軟骨(不過對小朋友嚟講就咬唔到，佢哋一咬到就成啖Lur出嚟話有骨喎)

如果白飯都任裝就無敵！

再嚟呢個蝦天婦羅卷 $78

每一件夾住件水牛芝士！好正好正呀

芊芊都食到好開心！

壓軸上場嘅流水機：稻庭烏冬 $98！成團麵放落去冰凍河流裡面(因為好難分開逐少落)

起初因為成個烏冬掉落水所以冇轉得咁快，但係後來食吓食吓冇咩麵後就越嚟越快

攪到人好似要快d拎佢上嚟嘅感覺，有種趕住食嘅自然反應！

不過講番個味道，配埋放喺側邊嘅芝士紫菜同葱就好香，同埋麵質經過冷河之後真係超彈超好食

最後哥哥反而喺張餐紙上畫左D公仔，但係侍應都照收喎，佢話無端客人畫喺邊佢哋都會貼出嚟！叫我哋下次嚟睇吓會唔會見到自己幅畫貼堂

下一站>>CLICK HERE!
【親子好去處】荔枝角 D2Place Emoji With You

Photo by CANON 5D Mark III, Len | EF 24-70mm f/2.8L USM

呀劍評分: 10分

呀劍評語: 味道好，賣相掂，環境正，服務態度一流！