|
[上環] Oldish ‧ 周末寫意之選 | 走進懷舊復古味的咖啡店~份量超豐富的全日早餐，仲有勁流心的炸吉列芝士漢堡!
|
|
糖小妹
2016-04-25
646
0
|
分享
收藏
星期六日平時鍾意宅係屋企既小妹，呢日咁岩有事外出，見出開街又好耐無係假日出港島行下，所以便與他決定去上環同大坑走一趟。兩個地方都有小妹想去的食店呢，涼住超勁冷氣坐大約45分鐘巴士就到。上環係以前小妹返工的地方，所以都叫做熟。這間餐廳就係上環東街，沿住上環街市過對面馬路，會寧寧舍舍見到窄巷中有條樓梯，直上就是了。 (喜歡的，請按讚支持，是給我很大的鼓勵啊 ) Connie's Food and Life Corner 餐廳就在一條斜路上，外觀的復古味超濃，還有不少外國人在內，不細心環觀四周，真係有去左外國的感覺，超寫意的。 中間放了一張大長檯，側邊還有兩、三張二人檯，還有向外街的高檯座位。我地揀左高檯位置，高檯位置有四個，有兩個係面向大街位，而我們坐的位置就係望住透明玻璃，由於當日天氣有點熱，所以呢個位置無風吹入，冷氣不夠是有點焗。 餐廳內的環境感覺係有好多野睇同影相，有很多復古的裝潢、小擺設和海報；連餐桌都覺得很有味道。 看看餐牌總共有四頁，包括有套餐選擇、沙律、小食、意粉/主菜、甜品、咖啡/茶和酒類飲品等；而且數款主菜中竟然也有泰式串燒和冬蔭公醬汁的意粉供應，頗特別呢! 假期梗係要點返杯Caffe Latte $45 慢慢嘆，所以他就點了呢杯。奶泡算打得細滑，咖啡味較重，岩晒佢。不過係呢個相機食先既時代，個拉花圖案就唔夠靚嚕。 因為天氣有點熱，所以小妹就叫左杯凍的Oldish Pink Lemonade $45，用上新鮮檸檬汁同紅桑子汁打成，所以杯野係呈透明現紅色的！飲落酸酸咪咪，開胃又解渴。 悠閒的星期日，來一個超級豐富的全日早餐如何？平時食Cafe 都好想叫個 Alldaybreakfast 黎食，不過最終都會揀第二樣，因為無咩邊次係價錢同食物成正比，不過 Oldish 既早餐小妹真係覺得滿豐富的！ Oldish All Day Breakfast $138 (供應至5PM) 加$10-$30可選一杯不同種類既飲品。 材料包括炒滑蛋、兩條煎香腸、兩塊煙肉、煙三文魚、炒蘑菇、焗茄汁豆、烤蕃茄，兩塊炸薯餅和Ciabatta Bread，連薯餅都有兩塊，望上去好豐富啊。 雖然All Day Breakfast既早餐大多係煎下腸仔、炒下蛋咁，不會太複雜。不過好多時因為要分開唔同食材去煮既關係 ，上檯既時候食物都已經冷卻晒，而這裡的雖算不算熱辣辣，但還是有溫度的。 要說說炒蛋炒得頗滑，有牛奶香；香腸煎至外皮帶微脆又不會乾爭爭，好食；炒蘑菇咬落帶汁又有牛油香；薯餅炸得夠乾身，香脆又不油，仲要有兩塊添，好開心！係Ciabatta食落乾左少少，如果可以有果醬提供就好喇。 呢個早餐對於女仔黎講真係超飽，不過老公就話呢個份量對男士黎講係岩岩好，哈哈！ Beef Burger with deep-fried Cheddar Cheese Steak & Pineapple with Thick-Cut French Fries $138 (供應至5PM) 頗有厚度的漢堡，材料有成寸幾厚既牛肉漢堡、菠蘿同一塊炸吉列車打芝士。漢堡棄用片裝芝士轉成一塊厚厚的炸芝士確實吸引啊！ 麵包有經烘過，切開後見到有澎湖的芝士流出，比起平時的半溶芝士的份量更多；主角牛肉漢堡本身雖然牛味重，但食落係有點乾，不過配上菠蘿後，便豐富了肉汁，食落無咁膩之餘仲多左重清新的果香；真係幾好食。 Oldish 地址: 上環東街53號地鋪 (港鐵上環站 A2 出口, 步行約8分鐘) 電話: 2697 3313 營業時間: 星期一至六: 12:00-22:00 星期日: 10:00-18:00
感謝 糖小妹 提供以上資料 糖小妹的網誌: http://concon2016.blogspot.hk/
|
~END~
| 商店 | Oldish (上環店) |