|
Prost by King Ludwig：悠然自德
|
|
山區麵包王
2016-04-20
884
0
|
分享
收藏
| 有時真喺好奇，有啲地方菜式平日好少食，唔喺唔鐘意，只喺朋友少揀，就好似德國菜，其實過往幾年都無乜點接觸，繼年初嘅生日飯及三月初嘅好友聚，點知今年一而再，再而三，幾個月內就食咗第三次德國菜。地點就喺美麗華商場新開嘅Prost by King Ludwig，多得好友安排，再嚐德菜。 晌商場轉兩轉就搵到餐廳，門面以紅磚配黑色木框，趟開嘅木窗，甚有歐陸風情。入到店內，更有氣氛，啤酒屋常見嘅大型木枱，天花黑色工業鐵通，昏黃帶有油燈感嘅吊燈，好有一種德國嘅工業風感覺。坐在其中，甚有悠然自得之感！ 而入門口就見到一個開放式廚房，部份菜式就喺晌度製作。 再直行，有通道走出露天花園，未出去之前，酒吧區就設晌室內用餐區及露天花園之間，而且，裝修得美輪美奐，單單嚟飲番杯都唔錯。 至於講到個露天花園，真喺別有洞天，地方好大之餘，更有架大型快餐車，就算唔喺真喺有嘢食賣，都已經喺一種養眼賣點。據店員介紹，架快餐車遲啲真喺會提供服務，主要喺應付露天花園食客嘅需要。無論室內、室外都咁好氣氛，好啱一大班老死嚟食飯。 既然喺德國餐菜，豬手、香腸就唔使講喺店中主打，此外，菜式仲有惹味佐酒小食、什錦輕食、沙律、頭盤、麵包、德式風味脆烤餅、傳統德式麵條、德式意粉、湯、特色主菜、德國手工薯餅、烤扒，以及多款配菜，睇見都流晒口水。 講到德國菜，又點可以唔介紹埋啤酒，飲品餐牌中，除多款德國啤酒外，仲有非常多選擇，雞尾酒、香檳、紅白餐酒、烈酒、啡酒、汽水……等等。 Sapphire Punch $65 可惜，酒就唔多啱我，不過，非酒精嘅雞尾酒小弟就幾喜歡。店中最近新推出嘅夏日雞尾酒，就有一款喺非酒精類。以菠蘿汁、青檸汁、芒果汁打成嘅賓治，入口以芒果味為主，細嚐慢慢就會有菠蘿嘅清香，味道酸酸甜甜，讓人感覺好醒胃，質感有少少以奶昔，準備踢走炎夏。 Berry the lover $50 純粹睇個名就知喺乜，以幾款野莓製作，兩位老友都鍾情乜莓物莓，佢哋話個味道都唔錯，莓味天然唔會好假，酸香清新。 Banana Split $50 依個可以講喺介乎沙冰與奶昔之間嘅特飲，入口冰涼透心，香蕉味好濃郁，不過，此外就似乎再唔覺加入咗乜嘢。 脆皮燒豬肘配酸椰菜及薯仔 $225 咁大隻鹹豬手以依個價錢，喺抵食價。豬手送上枱，晌燈光光照下，份外金黃，店員好醒目，俾我哋影完張「全相」，再幫我哋切為細件，期間更講解佢哋豬手嘅製法。豬手嘅外皮蠻脆口，食落又唔覺肥膩，肉下脂肪猶如食下骨膠原，肉質又幾軟腍，配蜜糖芥末或單單英式芥末都唔錯，稍嫌唔知點解層皮食落雖然脆，卻有種韌嘅感覺。此外，酸椰菜及薯仔都好好食，尤其前者，可以幫助消滯，後者就絕對令大家更飽肚。不得不提，餐牌話喺1-2位用，外國人嘅話都可能喺，但我就覺得夠4-5人用，食落無咁滯，除非你真喺打算只食一客豬手，加杯冰凍啤酒。 德式風味脆烤餅配黑森林風腿 $125 + $40 方形嘅脆烤餅有啲似意式薄餅，餅底配以酸忌廉、洋蔥及煙肉，亦可加蕃茄醬，既然想食得德式風味啲，就唔好加蕃茄醬。另外有5款配料供選擇（$30-$60），我哋依個就加上黑森林風腿，嚟到似喺巴馬火腿，入口油潤甘香，而脆烤餅口感有啲薄批與厚批之間，外層有啲脆口，食落又有啲麵包嘅感覺，由於混入酸忌廉、洋蔥，所以，味道較輕盈。 烤德國雞配新奧爾良焗飯 $195 以原隻煎盆，半隻烤雞配焗飯上枱，再伴有珍珠筍、秋葵、檸檬及焗蒜，非常有睇頭，個新奧爾良焗飯好好食，帶有少少燴飯嘅效果，唔會太濕，又唔會過乾，微辣惹味；至於件烤雞，睇佢焗到咁焦香已經好期待，簡單一句皮脆肉嫩都絕對無講錯，當然，啲雞肉未至好細滑，但做得算好出色，唔喺又乾又嚡嗰種。 Prost by King Ludwig所賣嘅菜式絕對稱得上外國人份量，咪睇佢成日話1-2人，查實3-4人都夠，份量大堆頭，味道又唔錯，夠氣氛，招呼到位，一大棚老友嚟就實開心，就算三幾個，一樣可以食得悠然自得。 個人評分 味道：7/10 環境：8/10 服務：8/10 抵食：8/10 平均每人消費：HK$220 餐廳資料： Prost by King Ludwig 尖沙咀彌敦道132號美麗華商場3樓3013A&B號舖 2473 0168
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | Prost by King Ludwig |