同期入嚟教書嘅同事，唔係做咗panel head就係committee嘅assistant head，只有我，咩title都冇，閒人一名。雖然我樂得唔駛點做admin嘢，但一諗到自己冇嘢孭，某程度上係學校唔重視自己嘅表現時，心入面不由得好難受。我自問工作態度同能力都不遜於佢哋任何一個，但點解機會就係輪唔到我﹖

我好清楚我走嘅唔係academic路線，但committee方面呢﹖我同英語曼達一齊入組，佢雖然同我係同期，但因為教學年資俾我耐，一入組，女俠已經安排佢去讀有關課程，我係等佢讀完，第二年先得去讀。年資淺，女俠睇好佢，我明。但呢幾年，我睇到俾我遲入組嘅小肥，不斷獲得機會，負責大大小小嘅project，其實我好唔開心。我唔係妒忌我個朋友，我只係為自己得唔到別人嘅賞識而心傷。我深信自己嘅工作能力，但好似得唔到他人認同……雖然女俠同亞頭會讚我，但我心裡明白佢哋最睇重嘅都係小肥，佢哋就算點話小肥做嘢唔達到佢哋嘅期望都好，最後都係會搵佢負責大project。而我……只能成為小肥呻辛苦嘅對象，有時佢對我講話唔公平，佢要做呢樣嗰樣，我真係好想話佢知，佢得到上位嘅機會，係我恨都恨唔到嘅。

學期開頭，亞頭好緊張小肥幾時去見校長，仲專登同佢食lunch，為嘅就係要小肥向校長明示要升職，但佢只係喺我見前，輕輕問吓我會講咩，其實我當時好唔開心……聽到佢話自己同小肥講，佢再唔積極，就會被我爬頭，我更加覺得佢一直以嚟都將我放喺一個比小肥次等嘅位置。佢呢句話令我唔開心咗好耐，喺屋企喊咗好多次。亞頭一向對我好好，可能就係因為咁，佢呢句話先更傷我心。

舊年十月到，我有一段時間，冇咩點出聲，女俠同亞頭都有搵我傾過，我冇透露太多內心想法，只係表示覺得工作去到樽頸位，冇突破。之後，我如常同佢哋傾偈，冇再將情緒浮面，但其實我一直都唔開心。呢幾日，唔開心嘅情緒又再出嚟，只能對同樣不受大佬睇中嘅拾爺呻，原來拾爺都會為大佬唔賞識自己而有少少唔開心，不過，佢睇得化過我，覺得冇辦法改變人哋嘅諗法，所以就唔多諗。

====================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

====================================