2016.06.03 うふふカフェ香港店

近排好有食神，禮拜一先食完Buffet，禮拜五又出去食過。
收到PR嘅邀請，上個禮拜五同旦那さん兩個去咗喺尖沙咀新開嘅Ufufu Cafe參加試食活動。

嚟自日本九州佐賀縣嘅Ufufu Cafe，繼2月喺澳門店開設首間海外店之後，今個月喺香港開設第2間嘅海外店。

當朋友知道我去咗Ufufu試食時，第一句問我嘅就係：「聽聞有百幾款揀喎，你揀咗邊款？」

【UFUFU招牌咖啡／うふふオリジナルコーヒー】

我呢個咖啡人第一時間就當然係㨂返杯咖啡飲先啦！
要試一個地方嘅咖啡我習慣叫熱嘅，凍嘅總覺得試唔真。
呢杯咖啡果酸少、質地較薄，中規中矩啦。

【抹茶忌廉拿鐵／抹茶クリームラテ】

當日成32℃咁熱，喺條間度曬完加蒸完一輪，真係諗都唔洗諗係會揀杯凍嘢嚟飲。
如果我唔係想試咖啡我都想揀凍飲去降吓溫。

旦那さん鍾意飲抹茶嘅飲品，揀咗呢杯Matcha Latte。
雖然知道Latte大概2/3杯都係鮮奶，但飲落始終嫌佢抹茶味唔夠，差咁啲。

【蜂蜜芝士薄餅／チーズ＆ハニーピザ】

曾經睇日本Youtuber食pizza時加蜜糖，見到menu真係有個蜂蜜pizza喎，於是揀咗呢款。

蜜糖係有個細樽仔裝住，可以因個人口味作出加減。
唔試過都唔知，原來蜜糖加芝士真係幾好味。

芝士有啲似我哋平時用嚟整Cheese Toast嘅Raclette Cheese。
因為聞落有陣芝士除，不過唔算勁。
試過呢個pizza之後，即刻覺得平時喺屋企整芝士多士可以加埋蜜糖食，好邪惡！

【漢堡扒拼熟成牛腹扒 配UFUFU招牌汁／ハンバーグ＆熟成ハラミステーキ withうふふオリジナルソース】

想試牛扒又想試漢堡扒，好在有得一個鐵板兩樣都要晒。
醬汁有Ufufu招牌醬汁同九州特色醬汁，我哋揀咗招牌醬汁。

食鐵板餐最怕淋汁時俾啲汁彈到落身同整污糟件衫。
日本人嘅細心，準備咗圍裙俾客人，咁就可以放心食啦。

鐵板可以揀跟SET，有沙律、飯呀、酥皮湯咁。
我哋另外叫咗個蛋包飯，所以無揀到跟SET。

多數出面餐廳食到嘅漢堡扒都較乾，呢個唔乾仲有啲肉汁。

【明太子忌廉汁蛋包飯／明太子クリームオムライス】

蛋包飯嘅汁大致可以分咗洋風同和風。
多數接觸到嘅都係洋風，好似白汁、茄汁同ハヤシソース（牛肉汁）咁，至於和風相對較少接觸。
今次見到有明太子嘅蛋包飯，於是就揀咗呢個試吓。

我鍾意蛋包飯嘅蛋係滑蛋而唔係蛋餅，飯係茄汁炒飯，不過個飯濕咗啲。
平時唔鍾意食大葉嘅我，今次呢個配搭我又覺得OK喎。
至於個明太子忌廉汁我同旦那さん都覺得咸咗，就算配埋蛋同飯食都覺咸。

【焦糖軟雪糕牛角包／キャラメルクロワッサンソフト】

近幾年我好鍾意焦糖味嘅嘢。
食Cornflakes要揀焦糖味；飲Caramel Macchiato要將個vanilla syrup轉埋做caramel syrup！

打開個dessert menu除咗有百幾款Parfait之外，最吸引我嘅就係呢個軟雪糕牛角包。
有我愛嘅牛角包配埋焦糖雪糕同焦糖醬，諗都唔洗諗，佢一定係今餐其中一個甜品。

牛角包係熱，軟雪糕係凍，影慢啲個雪糕都會開始融！
因為個軟而雪糕凍嘅關係，面頭嗰個焦糖醬變咗脆身，好正好好食。
初頭覺得個牛角包會俾雪糕整到腍咗，但又無喎，牛角包暖暖哋，仲食到鬆軟嘅。
我好少話會鍾意食啲又熱／暖又凍嘅甜品，因為我覺得係唔夾同怪，但今次呢個係例外，佢真係好味。

【士多啤梨酥餅軟雪糕芭菲／ソフトクリームストロベリーミルフィーユ】

除咗個牛角包又點少得佢哋主打嘅Parfait呢。
有成115款嘅Parfait，係真係會有選擇困難症。
Parfait大致分咗水果、乳酪、和風、焦糖、朱古力、粟蓉、咖啡、牛奶軟雪糕同埋MIX 9類。
分類都分咗咁多，再要細揀，真係心大心細有排揀。

我認為Parfait係要有士多啤梨嘅，唔想太複雜，所以喺menu上面揀個淨士多啤梨嘅。
雪糕係用3.6北海道牛乳軟雪糕，中間啲脆脆配埋個雪糕食幾得意，而最底就係生果。

除咗百幾款Parfait之外，仲有另外香港限定嘅4款Parfait。
每日每款限定20客，一見到限定，雙眼都會發光。

【日本蜜桃芭菲／ももパフェ】

我哋兩個都好鍾意食日本桃，加上每年5月到9月先有桃，可以話係限定中嘅限定，無理由唔揀呢個吖！
每杯都用一個整個桃去整，桃夠多汁同清甜，無咩渣。

我哋1人拎咗一舊桃肉之後發現，原來桃嘅入面係一個桃嘅sorbet。
呢個sorbet好味，食落好清新，用佢嚟做成餐嘅ending好啱。

整體嚟講凍飲同parfait唔夠凍，如果夠凍應該會好味好多。
食咗咁多樣我覺得焦糖軟雪糕牛角包係最好味，食完嗰刻我已經想再食。

うふふカフェ香港店
香港九龍尖沙咀金馬倫道5號太興廣場5樓

====================================

感謝 tabitachi 提供以上資料

tabitachi的網誌: http://tabitachi.wordpress.com/

====================================