|
[石硤尾] 糖室 ‧ 90後年輕人所打造的「舊邨新式」甜品店 | 兒時的味道~檸檬味心太軟
|
|
糖小妹
2016-06-09
841
0
|
分享
收藏
作為一個愛吃加上相機食先的人，口袋裡常常會袋住一堆長長的to-eat-list。但好多時好快又遺忘左個堆「舊既新店」，收收埋埋最終又無去到甚至已結業！不過今次呢間甜品店，見到網上平台好多人分享，樣靚又好食，所以急不及待立即約個時間去食嚕！ (喜歡的，請按讚支持，是給我很大的鼓勵啊 ) Connie's Food and Life Corner 一放工立即坐地鐵去石硤尾的南山邨，做左廿幾年人真係第一次踏入南山邨，感覺好陌生，好彩有明燈帶路，其實間店都相當易搵又好近地鐵站！間店就係邨內的麵店隔離，完全估唔到係個個位置會有間這樣骨緻的甜品店，一唔留意好易走漏眼 （小妹就係咁落左去街市搵...)。 店子分室外和室內，室外位置放了一張吊床作裝飾，係咪覺得好特別呢？原來這間「糖室」同觀塘「躺室」（以吊床為主題）係由同一班有著理想的九十後年輕人一同開設的，以「舊邨 | 新甜」為題在這裡開了這間甜品店！ 店內環境不大，以木紋作為主調，木桌、木櫃、木地板，簡約的裝潢和擺設，望落令人舒服，中間有條柱大大隻字印上店的名稱，還滿型格的。 店內供應的甜品款式貴精不貴多，心太軟、梳乎里、吐司、茶味奶凍、水果冰等，有西式也有中式糖水，連芋圓都有；而且餐牌上美美的甜品相片讓人每款都好想試啊！客人在落單紙點好後交給店員便可。（客人也需自行到收銀處賣單） 由於係抱住甜品當晚餐的心態衝著來，所以便點了三款甜品+一杯飲品，以晚餐來說其實叫的不算多。 德國蝴蝶脆餅花生醬奶昔 $36 前排與他在另一間cafe飲左杯超滿意的花生醬特飲，所以見到這裡有又決定要試下。 奶昔上放了一塊沒什麼味道的德國蝴蝶餅，相信只是用來裝飾用的。奶昔入口打得很細滑，花生味滿濃郁的，味道也不錯！ 一口菠蘿煙肉金寶 $38 一碟有四小個用了小砵子盛著的金寶，賣相可愛！面頭的金寶焗的很香脆，底下係清甜的菠蘿肉，配埋少少煙肉碎，鹹甜交雜好滋味！ 檸檬夾心餅心太軟配蜜糖乳酪雪糕 $46 係出面比較少見其他味道的心太軟，所以就算有綠茶都唔揀要試試其他味！ 心太軟一切開檸檬漿即刻傾湧而出，很澎拜！外皮軟熟，少左點微脆的口感，食落較似蛋糕，入口唔似平時食開既檸檬甜品的酸度高，真係好似食開的檸檬夾心餅的味道甜甜的又唔會過甜，又有少少檸檬餅的味道。 小妹唔會覺得佢假，係小時候的味道！配埋球乳酪雪糕，解膩又解暑，不過蜜糖味偏淡。 即烤荷蘭班戟配雜莓楓糖燕麥 $68 (需等35分鐘) 用左原個煎pan熱辣辣上桌 （小心超燙手），賣相鮮豔，上面鋪滿左大量藍莓同大大粒的士多啤梨，仲有中間的楓糖燕麥，原來仲有層見到雲呢拿籽的吉士醬，未食都覺得吸引！超期待的荷蘭班戟，邊邊位煎得帶點脆口感，不過食落無咩蛋香，似一團沒什麼味道的麵粉，是一個沒靈魂的班戟，說真的滿失望。 所以轉戰左食水果，藍梅都是甜的，士多啤梨有點酸，楓糖燕麥香口好食，但個班戟有進步空間。 整體的甜品水準都不錯，感覺係用心經營的小店，今次由於身體不適無緣食到水果冰，所以一定會搵多次機會再黎食，更期待店子推出更多新款甜品！ 糖室 地址: 九龍石硤尾南山村平台商場C4 電話: 5260 8053 營業時間: 星期日至四: 15:00-00:00 星期五、六及假期前夕: 15:00-01:00
感謝 糖小妹 提供以上資料 糖小妹的網誌: http://concon2016.blogspot.hk/
|
~END~
| 商店 | 糖室 |