|
Chibee Chicken and Beer：啤咩啤？美味唔使眼超超！
|
|
山區麵包王
2016-06-15
863
0
|
分享
收藏
| 早前睇過一套由李陣郁及河智苑合作嘅韓劇「愛你的時間」，女主角一唔開心，男主角就會晌天台（佢兩個嘅秘竇）請佢食炸雞。雖然，小弟唔會因為唔開心就走去食炸雞，但近排都算迷迷哋韓式炸雞，因為佢哋啲炸雞真喺口味多變。今晚嚟到Chibee，同死黨Dee Sir大大啖嚐炸雞。 餐廳先晌銅鑼灣紮根，再跳過海晌尖沙咀開分店，因為啱啱開無耐，仲喺試業階段，店名Chibee表示Chicken + Beer，相信未有酒牌，所以暫時未有啤酒賣。餐廳位處食廈H8頂層，因為之前都嚟過依幢大廈食飯，都知每層樓地方唔太大。一眼所見，大概40個位左右，以木系裝修為主，簡潔而柔和。店員都喺韓國人，所以，溝通就要以英文嘞！ 由於仲喺晌試業階段，所以，餐牌只有簡單一紙，並未好似銅鑼灣店有咁多選擇。此外，餐牌得英文同韓文，部份英文更似喺韓文拼音，其實真喺唔知乜嚟，又缺少圖片參照，所以，要向店員查詢吓，相信依個都喺臨時措施而已。 上文都講過未有酒賣，朋友就有少少失望，未能啤啤佢，唔好酒嘅我倒喺無乜所謂。最後，大家都揀咗韓國飲品CoCo Palm，老友要乳酸味，小弟就要桃味。 CoCo Plam (Peach) $18 入口好重桃味，卻又唔會過甜，而果汁內仲有啲細細粒嘅椰果，之但喺，支飲管好幼，基本上唔喺點啜到啲椰果囉，要改變吓個問題。 Corn Cheese $42 本來想搵啲沙律食吓開開胃，不過，睇漏眼原來炸雞一欄之內有一款雞肉沙律，故此，揀個芝士粟米作為代替。鐵板之上鋪滿金黃嘅粟米粒，芝士在上熱烘烘半溶半凝，可惜芝士落得唔算好多，未能拉出一絲絲嘅效果，但粟米味道清甜多汁，仍輕輕黏上芝士嘅香味。 Soysauce Garlic Chicken $178 嚴格嚟講，炸雞一共有7款選擇（$168 - $180），仲標明喺無骨雞肉，好幾款口味都未曾見過，亦頗有特色。幾經研究，覺得「醬油大蒜」應該有啲韓式風味，所以，試試依一款。 雖然餐牌無介紹得好詳細，但韓國醬油、蒜頭以外，相信都仲加有唔少醃料，因為食落好香濃，好惹味，有種鹹鮮感，加上外皮香脆，又放咗啲杏仁片增加口感，雞肉又夠嫩滑，好食喎。 炸雞另附送酸蘿蔔同沙律菜，前者酸香爽脆，後者輕怡清新，同樣都喺減膩恩物。 Budaejjigae $220 平時食韓菜睇餐牌都有中文輔助，但今次第一眼睇見依隻英文字真喺唔個知喺乜，原來喺部隊鍋。雖然去過韓國旅行，亦食過唔少次韓菜，但真喺一次部隊鍋都未食過，唔喺朋友唔啱口味，就喺怕食唔晒，今次有Dee Sir同場，佢有信心幫手清得晒，故此，今晚食我人生第一份部隊鍋。 部隊鍋喺乜唔使多介紹，而佢俾我嘅第一印象就喺令我回想返中學年代成班「中one雞」去露營，食物就喺即食麵同罐頭，比起部隊鍋就淨喺少咗啲菜，同味精湯底。 個部隊鍋都幾多料，鋪滿韓國餐肉同腸仔，仲有牛肉、餃子、金菇、韓式泡菜，實在大堆頭，而湯底自不然喺泡菜湯底，帶少少辛辣，濃香醒神。店員除周不時幫忙睇火，仲着緊吩咐我哋盡快先食啲麵，免被浸腍，雖然喺公仔麵，但確喺食落有啲彈牙。如有需要，可以加麵添。可能對好多人嚟講，二百幾蚊食鍋公仔麵，感覺好離地，但講真，個人認為食部隊鍋喺食個感覺大於實際。 食完炸雞同部隊鍋，填到個肚都漲漲，非常滿足，但老友似乎意猶未盡，提議到中村藤吉嘆杯軟雪糕先至罷手，哈哈，小弟當然樂意奉陪啦！ 個人評分 味道：8/10 環境：7/10 服務：8/10 抵食：7/10 平均每人消費：HK$260 餐廳資料： Chibee Chicken and Beer 尖沙咀厚福街8號H8 23樓 2153 1818
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | Chibee Chicken and Beer |