|
屋喔 O'Casa：台屋小天地
|
|
山區麵包王
2016-06-19
661
0
|
分享
收藏
| 好耐無同表哥一家食飯喇，當然，大時大節嘅家族飯都有見面，但人多未必同枱，可以傾偈嘅時間唔多，都喺寒暄兩句。今次，就真喺專登約佢哋出嚟食飯，談談近況，兼傾吓旅行嘢，皆因佢哋首次自由行，份外緊張。小弟算自由行多年，叫有啲心得，希望我嘅個人意見佢哋用得着。台式Cafe「屋喔」就晌旺角朗豪坊隔離，交通方便，大家都就到。 雖然午飯時間都好旺，不過，我哋嚟到都1:30pm，陸續都有客埋單交枱，所以，好快有位。而已，話就話個半鐘交枱，但食到兩點半左右，都已經未有新客，故坐到過時都唔使話要交枱。 餐廳環境都幾細，主要以卡位為主，四人枱真喺大隻啲都唔夠坐，不過，一大邊玻璃窗，透入燦爛陽光，讓人充滿活力，況且裝修都算幾清雅。 其實，餐廳外有個露台位，地方比室內闊落，架起帳篷，配上寫意木枱、木櫈，不過，咁嘅大熱天時，仲要喺正午，開盡風扇都仲喺悶悶熱。如果秋涼嚟，應該會悠閒寫意正好多。 雖然餐廳以台式為主打，但加入唔少洋食。分類有佔兩大版嘅台式美食、沙拉、洋風烤排、洋風滋味及甜品類。 而飲品方面同樣台式為主打，如花茶、珍珠奶茶……等等，亦加入洋風款式，如沙冰。 此外， 有一個特別餐牌，可以睇為當日供應嘅套餐，A-G共7款選擇，定價$46-$58，配柳丁綠茶（凍）或蘋果雪梨烏龍茶（凍），旺區計，好平實。另外，可+$10轉配$30或以下飲品，$30以上再補差價。 義式鮮蝦茄茸義大利麵 $58 表嫂揀咗個F餐，其實，佢食嘢一向隨和、健康，所以，鮮茄茸義大利麵頗啱佢。個麵做得非常有水準，麵條咬口無過腍，條條都掛晒汁，個蕃茄汁底酸香鮮活，蝦隻夠鮮又大隻，無欺場，表嫂大讚好食。 蜂蜜桂圓紅棗玫瑰 +$16 因為個餐跟嘢飲，凍飲免問，所以，佢揀杯 （壺）蜂蜜桂圓紅棗玫瑰，原價本身要$36，但跟餐+$16就可以。以原壺上，並以蠟燭保溫，小弟就無試，但表嫂又讚，佢話既有濃濃桂圓味，又有紅棗及玫瑰幽香，帶點點密甜，既補又潤，好啱女生飲。 台式糖芯蛋肉燥飯 $58 表姪女就三心兩意，揀嚟揀去，可能台灣嘢佢好少食，所以，覺得樣樣嘢都好有新鮮感。結果試試肉燥飯，以小型鐵桶盛載，別緻得意，咪睇佢好似細細兜，表姪女話食完好飽。飯粒好軟綿，混和肉燥 、雪菜，佢話好好味，加埋隻糖芯蛋，蛋黃綿香流心，正！大讚無得頂。 棉花糖巧克力 $28 上次晌長沙灣一間咖啡室，表姪女試過杯棉花糖巧克力，就對依款飲品滿滿偏愛，所以，今次佢又喺揀嚟重溫。熱巧克力面上滿充彩色棉花糖，感覺萌萌，但佢話味道無上次嗰杯咁好飲，主因喺味道無咁濃。 烤大蝦花枝墨汁義大利麵 $88 表哥就晌洋風滋味一欄選取墨汁義大利麵，食到一口烏咀狗，搞到接姪女猛笑佢。碟麵嘅賣相非常好睇，夠立體感，隻大蝦好有睇頭，質素不賴，彈牙爽鮮；此外，仲有唔少魷魚圈，不過，都喺「黑掹掹」而唔顯眼啫，整體味道中上，麵條滑溜有咬口。 黑松露野菌蚵仔燉飯 $72 燉飯即喺我哋常講嘅意大利飯，睇開小弟食評都知我都幾偏愛意大利飯，以台式蚵仔入饌，來一個台意融和。其實佢個飯本身都加入黑松露去煮，成品無手緊再晌飯面加一抹黑松露醬，嘩！真喺幽香都不得了，上枱陣味已好突出，入口更加唔使講，再者，飯粒濕潤煙韌，極具水準；飯內有唔少菇菌，而蚵仔粒粒都咁飽滿，帶點鮮甜味，值得推介嘅菜式。 百香果菲芒沙冰 $36 本來打算點杯拿鐵飲吓，但大熱天時，真喺唔搵杯凍飲降降溫就勢喺假。店家有數款沙冰，亦甚有特色，如紫芋、洛神花，不過，小弟鍾情芒果，所以，揀百香果菲芒沙冰，即喺熱情果配菲律賓芒果。賣相清新討好，口感綿滑，由頭飲到尾都唔覺有冰粒打唔勻嘅情況，芒果味濃郁，又滲出熱情果嘅酸香，冰涼醒神，而且裝得滿滿無欺場，炎夏消暑奇「冰」。 屋喔窩夫 $68 唔怪得表姪女食兜飯仔都話飽飽，原來留肚試甜品，佢都喺窩夫迷，所以，點一客「屋喔窩夫」共享。以為淨得窩夫，原來仲有一件士多啤梨甜圈，又可以試多一樣嘢。 件窩夫唔喺普遍所見嘅格仔型或水滴型，而喺壓有店家名字嘅啤酒杯型，賣相已別樹一格。為咗方便大家食，切成細細粒，沾蜜糖，配雪糕，不得不提，蜜糖喺蜂蜜，非糖膠，清香脫俗，而雪糕內含士多啤梨果肉，又富奶香，配合鬆軟富蛋香嘅窩夫，真喺食出環環心思。 至於件甜圈，即喺港人較多叫嘅冬甩，以為只得面層有士多啤梨朱古力醬，點知切開仲有士多啤梨果醬，認真滋味，依個我哋就沾忌廉食，可以減減甜膩。 雖然只喺小店一間，但出品及服務一啲都唔失禮。菜式有心思，製作認真，而服務到位，睇到一班年輕人，好有活力，雖然只點甜品一客，都幫我哋換晒啲新碟。 個人評分 味道：8/10 環境：7/10 服務：8/10 抵食：8/10 平均每人消費：HK$120 餐廳資料： 屋喔 O'Casa 旺角砵蘭街215號朗晴坊4樓 2321 5131
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | 屋喔 (旺角店) |