麥當勞簡直就係我嘅兒時飯堂，但今時今日去食麥記幾乎變成係一種獎勵，雖然的確唔係好健康，但係麥當勞俾我嘅回憶唔單止係漢堡飽，仲有以前嘅經典玩具。

我由太古城中心一期入去商場，喺門口已經見到好多玩具樂園嘅籏仔

原來一入到嚟即戲院隔離已經有間開心樂園餐屋仔，裡面全部放咗麥當勞Hello Kitty系列嘅公仔玩具

唔知大家儲咗幾多隻呢？連我自己都換過幾隻，相信每個香港人都曾經換過

落咗兩層之後見到全新麥當勞太古店開張！大家仲記得好耐以前嘅麥當勞係咩裝修嗎？

玩具樂園經已開幕！快D落去集體回憶吓先

位於一期廣場有對超大嘅麥當勞叔叔鞋！同埋隔離有部大投影機

原來佢個名堂係「麥當勞人物變身器」只要你企喺投影機前，投射到熒幕的身影會變成其中一位麥當勞人物，跟住你所有動作。

睇嚟如果我玩應該一定射出嚟係「滑嘟嘟」

今次玩具樂園由兩位收藏家借出私人珍藏，加加埋埋過千件經典精品

先周圍逛逛睇吓唔同嘅拍照區！薯條汽水一定唔少得啦

呢個火車頭都係經典佈景之一，不過我就冇咩印象，可能連我都未出世！

想當年我勁鍾意嘅「啦啦球仔仔」都有！(其實我唔知佢正確官方名係乜) 

即使寫住「請勿攀爬」但係小朋友都唔理咁多爬哂上去玩

嘩！最經典都莫過於呢棵蘋果樹同漢堡飽櫈，如果你唔想俾人知自己係70's後，千祈唔好話你見過呢棵樹

呢度有幾間屋仔裡面放咗好多經典玩具，睇吓有幾多款係你哋記得嘅！

呢款麥當勞變型鐵甲人(1991) 當時真係儲唔齊，我只係得巨無霸同薯條機械人

90後最深印象一定係呢套史諾比世界系列(1998)，當年慘不忍睹睇住D人為咗換佢成個餐掉落垃圾筒(我夠膽講我一隻都冇)

仲有101斑點狗系列(1997)

呢D就好近期嘅系列，各位女仕記住話「我剩係見過呢幾款咋喎！」

另外樂園仲增設一個小遊戲，就係於樂園裡尋找QRcode，集齊5個就可以換$4.8優惠餐券，不過每日得100個名額(仲要得番三日至7月3日)

不過又唔駛愁，換完哂之後每日都有500個名額換特別版書籤！

頭4個都好易搵，不過你真係搵唔到都可以問職員，佢即刻帶埋你去嘟都仲得！

呢個喺換領處的QRcode先係最唔覺眼

好嘢我集齊5個啦！可以去換靚靚特別版書籤

提提你如果喺指定日期及時間內嚟到現場仲有機會遇到麥當勞人物㗎！

哥哥妹妹今日都冇機會嚟！唯有番到屋企將書籤送俾佢哋啦！