旦那さん放假，我哋諗住落太古新開嗰間沾麵舖試新嘢啦。
新開幾日已經有晒心理準備要排隊，但同時我哋一致認為如果等多過15分鐘就轉場。

開門後20分鐘我哋去到，仲未到lunch hour，未行到門口已經見到有大概20人喺度排緊。
排龍尾嗰位本身行喺我後面架，可能佢feel到我都係去沾麵舖，所以跑快我幾步去排。

喺一列餐廳廚房抽氣出風口嘅位置排隊，我哋兩個排唔夠3分鐘就投降。
焗到抖唔到氣，熱到一隻嘢咁，就算排到入去食，碗麵幾好食我都唔會食得出。

2016.06.15 명가

行過兩條街我哋轉場去食韓國嘢—名家。
之前都曾經喺太古名家食過，都係一樣食早輪12點嘅lunch。
但今次一入門口就話1點鐘前要交枱，之前都無呢樣嘢嘅。
聽到我哋話會食燒肉之後，無再要哋1點前交枱啦喎。

【燴牛肉片套餐】
旦那さん㨂咗Bulgogi套餐，個肉無咩特別，不過跟餐個湯好好飲。
個湯淨係見到白蘿蔔片、少少牛肉、少少雞髀菇片。
揭吓個menu，應該係是日餐湯嚟，即係例湯啦，單叫要$15。
旦那さん不停讚個湯好飲，於是我每飲一啖都不停諗個湯點煲，睇吓可唔可以喺屋企自己煲到。

另外加多咗個梨汁。
以前係罐裝，而家變咗係斟出嚟嘅，感覺唔係咁好。

【牛肋骨 (無醃)】
旦那さん一直想試名家呢個Saeng Galbi。
我鍾意原條燒到咁上吓先剪，但香港通常都係一上枱之後跟手就會剪晒。

無醃嘅肉可以食真啲個牛酥味，肉好腍。
雖然無日式燒肉食嘅牛肋肉咁多油花，正因為咁我覺得無咁食到一口油淋淋。

【牛肋骨湯】
我叫咗個牛肋骨湯，因為我想試吓泡菜湯同大醬湯以外有咩韓國湯我係可以發展下。
呢個湯都ok，不過佢有落咗一條仔參喺入面，所以輕微有啲藥材味。
但旦那さん覺得是日餐湯更加好飲。

就係咁我下一個要試整嘅嘢食就係名家嘅「是日例湯」啦！

====================================

感謝 tabitachi 提供以上資料

tabitachi的網誌: http://tabitachi.wordpress.com/

====================================