好食冇服務 – Harlan’s Cake Shop[好長篇] SeeWide

好食冇服務 – Harlan’s Cake Shop[好長篇]

如果你冇行過尖沙咀依個商場，有可能你都唔會聽過或者見過依個品牌既蛋糕，雖然佢品牌首要唔係賣Cake而係高級餐廳，但係佢既蛋糕相唔會輸蝕俾比較有名既個體蛋糕店！

我認識依間蛋糕店既原因，係因為我都係附近番工，佢既位置係商場既4樓與食市同層，簡潔亮麗既裝修，令到你１上４樓就能夠容易咁發現到佢既存在，單層蛋糕櫃，佢既右手邊係幾張細枱可供堂食加杯咖啡，不過可惜環境比較窄而且係主要通道則邊，所以我自己黎講就未曾坐低食過！而Harlan’s既業務除左蛋糕店，係同場既19樓亦都有一間高級日本餐廳同西餐廳，係銅鑼灣既世貿中心亦有其他種類既餐廳(都係貴野~~)，所以Cake Shop只係副業-v-

我係依間Cake Shop亦已經試過３次蛋糕，分別係佢地著名既Sexy Lady，伯爵茶朱古力蛋糕，藍莓牛奶朱古力蛋糕，佢地既蛋糕亦都冇令我失望，只係佢地蛋糕店俾我既服務都令我相當有”喜感”，先講蛋糕啦！藍莓牛奶朱古力蛋糕($238/1P)，佢既蛋糕係半圓形，蛋糕面上有幾粒朱古力既小花同埋星星心心既裝飾，好簡單，但係亦都顯得蛋糕高雅，蛋糕切開入面層次十分分明,面層藍莓Jam，藍莓果肉，藍莓mousse，牛奶朱古力mousse，朱古力蛋糕及餅底，全部藍莓都係果肉味並唔係香油味，甜度亦都好適中，即使出面係以Jam做鏡面但係唔會甜到漏，配合內層打得好軟滑既牛奶朱古力mousse同埋中層果肉，酸甜程度調合得好好！千其唔好俾佢鏡面呃到以為甜到漏！

第二個蛋糕係伯爵茶牛奶朱古力蛋糕，唔好意思依個冇相~(我老公冇影相就切左蛋糕= =威威~~)圖片來自Harlan’s Cake Shop FB Fans Page!，依個蛋糕有賣點就係伯爵茶係用德國品牌Ronnefeldt既伯爵茶茶葉取其味(姐係唔係香精囉~)同埋法國品牌Valrhona 朱古力既mousse，當然，前者後者夾埋打做既蛋糕味道極為香濃，但係最突出既我認為係佢係朱古力既mousse中間放入南瓜籽，將蛋糕既口感提升，令到除左食到本身mousse軟滑口感亦都加番小小脆脆既咬口，甚感歡樂！面頭就係用馬卡龍同埋小許朱古力裝飾，不過因為蛋糕本質好食，馬卡龍比下去了w~~

到最後係佢地既皇牌SexyLady，佢既賣點就當然係佢既70% Dark Valrhona chocolate同埋用Italian balsamico 浸製既紅桑莓，同埋佢果條長長既朱古力女人腳啦w 佢面層簡單地只係用朱古力忌廉做蛋糕裙，糖片做裙，朱古力片做腳，裝飾本身已經有喜感，內層亦都唔會令人失望Valrhona Chocolate打出黎mousse比起之前兩次食佢既朱古力蛋糕味道更濃厚，配埋醋浸過既紅桑莓果肉亦都係酸甜合一，但係要著名既係，如果要試，請先認定你自己係朱古力愛好者，因為唔鐘意朱古力既人，係未必會接受依個蛋糕果種濃厚既朱古力味！請三思！

介紹左佢3個蛋糕，眼見我對佢既蛋糕都有讚冇彈，當然就去到服務啦，我前文講到佢俾我既服務相當有喜感，梗係唔係好野啦！如果唔係因為我媽咪生日我認為佢既蛋糕特別，其實，我未必會幫襯佢！以下內容係包括左我3次去到佢間店俾我同樣既感覺，我每次行到去佢蛋糕店都係已經預備左要訂蛋糕，所以我集中左係佢擺完整個裝蛋糕，即係右手邊雪櫃果到睇，佢係門面既Staff唔多，我經過同我幫襯既幾次最多都係得2個人係到，有一次只係得1個，但係每一次都唔會有人過黎serve我，OK，頭兩次都係有目標地訂蛋糕，於是我好快揀左就訂，但係今次想睇多D款(要就太多人唔食既口味= =)，於是我終於開聲問佢會唔會有蛋糕既Menu俾我可以揀，Staff A話冇，要上Facebook睇番~囧姐係我係你公司面前但係我要上FACEBOOK睇你蛋糕款…會唔會太有趣?? 然之後Staff A話其實細件蛋糕既款可以訂個裝，所以可以睇岩口味再幫我訂…哦～～～～但係…都唔齊款喎=___=其實俾人揀款訂蛋糕唔係基本Cake Shop有既咩=_________=?! OK!到最後我都係揀左Sexy Lady訂。

依件事反應左D咩??首先公司配套不足，訂蛋糕，基本上係Cake Shop好基本既生意，連俾人揀既Menu都欠缺，失敗，其次，好喇你冇Menu都算，員工可以口頭推銷，或者主動D介紹，冇，D Staff除左成戇居居企係到你望我望你，我唔到開口問，都唔會知道係有其他蛋糕款，或者轉磅數會轉形狀等等既資料，失敗，最後，員工培訓不足，同前者有小小相同，員工一D都唔主動，即使有個客兜口兜面企左係你前面，都真係企係到，唔Sell唔講唔理，唉～３次失敗既服務態度之後，尋日我老公去左攞蛋糕，巧合地有個西裝友Staff係入面，仲主動撩我老公講野，因為我老公都係相當滿意佢地既蛋糕，所以就同西裝友吹起水黎，西裝Staff主動俾左85折既餐廳Coupon俾我老公，仲介紹佢地既餐廳同埋佢地蛋糕既資料，仲話黎緊9月請左個日藉師傅黎做一條新Line既蛋糕，又話今年月餅請左半島既師傅黎做，推銷我老公試，如果長期有一個咁既Staff我相信佢地既生意會好D= =…以食黎講，佢真係好食，以服務，佢仲衰過美心聖安娜。

地址:尖沙咀彌敦道100號The ONE 4樓L411號

電話2914788

~END~

商店	Harlan's Cake Shop


抱歉，發生點錯誤。重新載入


(0)	(0)	(0)