聞名不如一試 – 帝苑餅店 Fine Food SeeWide

聞名不如一試 – 帝苑餅店 Fine Food

我不嬲都唔係一個喜歡襯熱鬧既人，所以就算係食評網睇到有好野食，我都要先研究佢洗唔洗排隊先去食，事緣老公係7月份生日，我都要開始著手研究佢既生日蛋糕同禮物仲有食飯，蛋糕其實可以自己整，但係因為冇咩時間，同埋整好都唔知點樣收埋佢好，話哂而家係一齊住唔係好似以前咁我有我佢有佢嘛，要製造驚喜，始終有一定既難度，所以預期擺驚喜係個蛋糕到，不如擺係份禮物到，所以蛋糕我都決定用買的。

我同我老公都係一個喜歡食蛋糕既人，閒唔時得閒我都周圍去試下一D出名蛋糕店既蛋糕，某日上食評網見到近排大熱有兩間餅店，一間係帝苑餅店，一間就係係美麗華既COCO，因為尖沙咀同我住同番工既地點都唔係好就腳，所以見到帝苑有得係網上Order同埋睇款，我都優先揀左佢，因為COCO我搵唔到佢可以上網睇款既網頁，唔洗我親身踩落去一次，拎又一次嘛。

佢既Cake款都算大路 (eg 朱古力,芝士,芒果，大部份人都係咁揀)，而且都有驚喜款,好似佢個Mascarpone Cream Blueberry Tart，老實講我好有興趣架w，睇哂佢咁多Page，我老公鐘意既一定係朱古力兼冇水果，我首選就係Chocolate Napoleon，口感之選！　因為佢可以網上Order，於是Click入去填Form，用信用卡PayPal完成成個付款程序，等佢電話Reply就可以安樂等拎蛋糕！

於是就有小問題就黎喇，因為我諗住夜晚切蛋糕，但係我夜晚收工佢又關門，我番工佢又未有蛋糕，於是我就Remark蛋糕早一日預備，我第二日番工前去拎，其實邏輯上係冇問題，而我Order左第二日，佢地既職員就打俾我，話Chocolate Napoleon($300)

因為係拿破崙餅，擺過夜會影響品質，建議我轉款(講到依到我都唔好意思話俾人知我以前賣蛋糕= =連拿破崙唔可以擺過夜都唔記得…)，於是我就轉左Chocolate Truffle Cake($290)同上年一樣啊…雖然唔係同一間店/______至於價錢唔一樣，職員就話可以揀一件甜品補錢！Good!有得借D意食多件w

到拎蛋糕當日，去到餅店，我只要講番電話同貴姓就Check到你訂既蛋糕，方便！同埋要補錢揀多件甜品，之前有聽過佢有名既青蘋果，不過唔多見有，亦聽聞佢有限量出，你有運先見到(國王的蘋果w聰明人先見到www)，不過就見到粒柚Yuzu Cheesecake ($38)，我對佢既造型甚感興奮，於是就揀左佢，不過番到公司途中粒柚已經係個盒入面碌黎碌去。

好…講左N咁耐,入正題(就快俾人掟橙= =)…好首先係Chocolate Truffle Cake，裝飾係兩個朱古力波波，鏡面朱古力，簡易潔，內層係朱古力蛋糕夾朱古力忌廉，朱古力蛋糕食落比較濕潤，唔會好散又或者起筋，中層夾住既朱古力忌廉好濃郁而且好Smooth，唔會係單純可可粉加忌廉打成，雖然只係簡單兩層，但係有一定既水準，蛋糕整體甜度亦適中，食完唔會澀口，價錢黎講亦可接受，因為整貉比起某間專做朱古力蛋糕既好!

至於Yuzu Cheesecake，依個都幾有驚喜，首先佢圓碌碌既外表真係好鬼抵死，外層就係黃色既朱古力，係中間沿朱古力既黏合邊切開，就會見到入面有滿滿既Cream Cheese 同埋啡色既蛋糕碎(因為好快俾我食左~冇影相w)，雖然蛋糕碎(餅底碎?)我食唔出有味，但係將佢配埋裡面打得好Smooth Cream Cheese同埋中層既柚子醬，帶起整個甜品既口感，而且佢既酸酸甜甜既柚子層平衡左較漏既Cream Cheese，而朱古力外殼亦不見太甜，唔會有平時食到既朱古力裝飾甜到漏油既感覺，必試！

好…吹左咁耐水，我亦都好讚同Fine Food既成功，雖然亦知道背後打理的原來就係有兩間餅店既Tony Wong，不過一間餅店既成功，唔單只係蛋糕，我亦都好滿意佢地既服務，先說佢地著重蛋糕品質提議我轉款，後者我去到蛋糕店佢地既職員亦俾左相當有效率及禮貌既服務，雖然我認為我揀甜品既時候佢可以有多D介紹同Suggest，BUT整體我買蛋糕既流程都令我感覺良好。推介俾各位~~

Online Order網址: http://theroyalgardenhotel.com.hk/index.asp

地址: 尖沙咀麼地道69號帝苑酒店大堂

電話:2733 2045

~END~

商店

帝苑餅店


抱歉，發生點錯誤。重新載入


(0)	(1)	(0)