|
老夫子餐館 OMQ Diningroom：老掠民心
|
|
山區麵包王
2016-08-16
908
0
|
分享
收藏
| 從60年代開始，當時資訊無咁發達，睇漫畫喺嗰時幾多細路仔嘅樂趣，講到本土創作嘅漫畫，生於60、70、80年代嘅人，相信無乜邊個唔識「老夫子」，稱為絕大部份香港人嘅集體回憶，應該都無乜人敢反對。但咁代表性嘅漫畫人物，到今時今日先有其主題餐廳，雖然嚟得晚咗，但依然引起好多人「潮聖」嘅興趣。 對我嚟講，嚟致敬大過潮聖，老夫子漫畫最鍾意以四字成語為題，非正式統計，「耐人尋味」更絕對喺用得最多嘅題目。點解要向佢致敬，除咗佢啲內容生活性唔離地之外，咪睇漫畫學成語囉，小弟讀書唔算叻，不過，晌老夫子度就學咗唔少成語喇。 的確好多人嚟「潮聖」，上到餐廳門口真喺多人到不得了，足見佢幾能擄掠人心，可以講喺訂咗枱嘅都要等等。 等位期間，除影吓唔同擺設、公仔同裝修外，不時，有店員會捧住大籃幸運曲奇請大家食，算喺緩和一下大家嘅情緒，而曲奇內紙條嘅內容，所指蠢事就喺講緊我哋晌度等緊位嗎，哈哈！ 既然以老夫子為主題嘅餐廳，相關老夫子嘅元素肯定無處不在，由地下至門面，數個1:1嘅老夫子漫畫內嘅主角模型已經喺亮點，內裡嘅裝修的確喺其賣點之一，牆身、天花、枱橩無處不在，影相位之多實謀殺唔少記憶卡容量。 老夫子、大蕃薯嘅模型，以及內部特色擺設裝，就肯定唔可以拎走，但等位期間，睇到門面設置幾個櫥窗、飾櫃，放有唔少跟老夫子相關嘅精品，統統都可以買走。 卒之可以走入餐廳裡面，我諗好多人都寫過佢個環境，小弟就唔再多講。 食物方面，老夫子喺打正旗號賣港式豉油西餐，有唔少老派食物，卻有唔少新派嘢，記得諗起曾光顧過嘅金記、南龍、老鳳……等懷舊餐廳。又一影相位，咪就喺餐牌封面，成個老夫子頭像，菜式類別分別有湯、小食、沙律、鐵板、主菜、焗製、咖喱、素食、三文治、甜品、冰沙、奶昔、果汁、茶花、果茶、特飲玩意、茶啡檸水。豉油西餐最懷念就喺鐵板，所以，今晚變成鐵板之夜。題外話，每道菜式都額外加有一個成語別名，與其話喺搞吓「花臣」卓頭嘢，其實就有啲「九唔搭八」，因為一嚟同個菜式無關，二嚟點菜時用成語名啲店員喺唔明嘅。 就連餐碟、盛菜嘅餐具都印晒老夫子餐館嘅標誌，兼且好多晌設計上都花過啲心思，但有啲就覺得掗掗拃拃。 有營蕃茄忌廉湯（別有洞天）$36 湯品共有4款，分別喺羅宋湯、南瓜湯、蕃茄忌廉湯及忌廉雞湯，小弟所試嘅蕃茄忌廉湯質感偏杰身，雖然蕃茄味足，但感覺唔喺鮮活嗰一種，唔知喺唔喺打得「麵撈」同落忌廉落得多，個人而言，屬中規中矩；餐湯配一小個竹炭包，雖然唔暖，但好軟熟，不過，啲牛油一打開已半溶，唔喺太理想。 煙三文魚沙律（原來如此）$78 沙律類有成6款可供選擇，因為一陣都食鐵板餐，所以，沙律就唔揀肉類，既然煙三文魚沙律喺店家嘅推介菜式，應該最穩膽。個沙律賣相都幾靚仔，沙律菜墊底，上面鋪滿煙三文，份量而言喺抵食之選。最貼心個油醋汁另上，落多落少可以自己嚟，沙律菜食落爽脆新鮮，煙三文算不俗，夠油潤。 烤紐西蘭羊扒配薯菜（順手牽羊）$198 扒餐不外乎雞、牛、豬、羊，仲有白鱈魚扒。既然喺豉油西餐，鐵板就例可以選黑椒汁、燒汁或蒜蓉汁，我哋要咗蒜蓉汁，羊扒要五成熟。份烤紐西蘭羊扒賣相真喺做得有聲有色，一淋上蒜蓉汁，吱吱聲咁響，蒜香四溢，一件扒4支骨，夠晒足秤，而且，伴有唔少薯菜（炸薯角、薯蓉、甘筍、西蘭花、蕃薯、蕃茄），講番件扒，真喺掂喎，外層焦香，肉質既嫩又富肉汁，嗰份羶香越食越滋味。而墊底嘅木板，一樣印有老夫子餐館標誌，可見事前開鋪做咗幾多準備功夫。 香草蒜茸燒雞配薯菜（半斤八兩）$168 對比起紐西蘭羊扒，份燒雞嘅質素就落差較大，其實，成隻燒雞上，同樣配上大量薯菜，份量十足不用懷疑唔夠食，不過，肉質的確有啲嚡，口感唔太討好！ 嚟之前，對食物嘅水準都唔會抱於過高期望，始終喺衝着老夫子而嚟，不過，食物比預期唔錯，加上環境確喺幾得意。仲見，有唔少人會點店家嘅巨型香橙梳乎厘當生日蛋糕嚟慶祝，亦喺賣點之一，作為老夫子嘅擁躉，都值得走嚟一趟，不過，建議訂到位先嚟就免排餐懞之苦。 個人評分 味道：7/10 環境：8/10 服務：7/10 抵食：7/10 平均每人消費：HK$190 餐廳資料： 老夫子餐館 OMQ Diningroom 太子彌敦道777-781號安寶樓1樓 3702 1678
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | 老夫子餐館 |