|
Kowloon East Kitchen：再廠東九
|
|
山區麵包王
2016-08-18
739
0
|
分享
收藏
| 去工廠大廈搵食已經唔喺咩新鮮事，不過，所認識嘅親友中都仲有唔少人喺未去過依一類帶少少神秘感嘅餐廳，所以，兩年前曾到訪過Kowloon East，記得環境唔錯，食物做得有水準，故一行3人到訪，再次睇睇佢哋嘅水準有無跌。 事隔兩年，環境無咩點變，一出電梯都喺灰灰黑黑嘅大鋼閘，然而Kowloon East嘅紅黑白門面，非常搶眼，推門而入，則別有一番景象。一室都以白與黑，配少少紅，鋪上水泥地，少少掛畫，再以燈光營造氣氛，簡約舒服。 餐牌設計簡單，白底黑字，紅星標誌就喺廚師推介，前菜、湯、沙律、意大利粉、肉類及魚類、伴菜、甜品及飲品，4頁紙睇晒，選擇唔算好多，不過，睇菜式就幾精，稱得上貴精不貴多。 另外，牆上仲有一個是日精選嘅餐牌，有齊前菜、主菜、甜品，不過，其實睇落又唔喺好特別，所以，就晌番主餐牌度揀菜。 意大利香草包 等上菜，先嚟一小籃意大利香草包配黑醋橄欖油，香草包質感軟熟，淡淡香草味。 炸魚柳甜蕃薯條配檸檬乳酪醬 $98 先嚟一客炸魚薯條，不過就喺炸蕃薯條，魚柳或蕃薯條都炸得金黃，兩者入口都唔覺油膩，証明炸功了得。不過，無問到喺採用咩魚種，但幾可肯定唔喺龍脷或青衣，因為肉質較為挺實，唔喺細嫩嗰類口感，魚味卻重啲；炸蕃薯條都唔喺第一次食，之前曾晌荃灣Doodie食過，喺度再遇上，一樣做得好食，外脆而裡面粉甜。而所配嘅醬汁，亦非一般普普通通嘅沙律醬，而喺檸檬乳酪醬，酸爽輕盈。 紅菜頭南瓜沙律 $88 食完啲熱氣嘢再食番啲沙律平衡吓就最好不過，以款沙律以依一款最感興趣。以紅菜頭、南瓜、牛油菜沙律、羊奶芝士、炸藜麥所組合而成，淋上少少油醋，酸香醒胃。紅菜頭食得出喺新鮮貨，咬落軟腍卻帶少少爽口感，如罐頭貨一般都喺浸到腍透；南瓜亦處理得好，唔會過腍而爛溶溶，不過， 本身都鍾意食藜麥，但炸嘅 藜麥就覺得麻麻哋，口感好硬。 什錦海鮮闊麵、香辣蕃茄醬 $128 睇落你會覺得簡單，但細心品嚐就會發覺唔一樣。個闊麵質感極具咬口，事後先知喺自家製，好有誠意，而個香辣蕃茄醬汁底好好食，因為睇得出用新鮮蕃茄做，內裡混有唔少茄肉，唔喺就咁茄醬茄膏，故茄味鮮活濃郁，嗒落仲慢慢滲出少少辣勁，正；至於啲海鮮料，有大蝦、魷魚、蜆肉，用料有水準，新鮮爽甜，尤其啲蝦肉，有鮮甜蝦味，應該唔會喺雪藏貨 。 紐西蘭肉眼扒 $178 肉眼就肉味濃啲，西冷就軟腍啲，一致通過大家想食濃味嘅肉眼扒，一客註明8安士份量，所伴嘅時蔬有意大利青瓜及扒蕃茄。佢哋大部入菜式都唔太講究賣相，就算依一道肉眼扒亦然。 肉眼選上五乘熟，煎得啱啱好，切開一睇，色澤嫩紅，但又唔會出血水。入口真喺好濃香嘅肉味，雖然用唔上嫩滑嚟形容，但又唔點韌喎，算軟腍好切。 忌廉菠菜 $45 點咗主菜，可以減$10點配菜，揀咗忌廉菠菜，因為上次食過覺得好食，想翻兜。啲菠菜煮得好綿，加入忌廉汁底，有種奶滑嘅感覺，令我想起滬菜嘅奶油津白，有點異曲同工。 麵包布甸伴雲呢拿雪糕 $65 甜點方面，原本喺想試店中推介嘅特濃朱古力撻，點知話無貨，退而求其次就揀暖果仁朱古力餅伴雲呢拿雪糕，又話轉咗款，故「退而求其三」試咗依一款麵包布甸伴雲呢拿雪糕。個麵包布甸做得幾好，入口軟熟有蛋香，玉桂味非常突出；雖然無查問雪糕採用咩品牌，但睇到粒粒雲呢嗱籽就知喺有質素嘅貨色，再者，雪糕嘅質感柔滑富奶香。 比起兩年前到訪，價錢貴咗好多，例如當時賣嘅甜點一般都喺$45一客，但依家賣到$65，唔知喺咪廠廈嘅租金都搶高咗好多！但食得出佢哋用料仍然有堅持，食材都喺靚貨。 個人評分 味道：8/10 環境：7/10 服務：8/10 抵食：7/10 平均每人消費：HK$200 餐廳資料： Kowloon East Kitchen 觀塘觀塘駿業街66號巧運工業大廈5樓C室 3468 5383
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
| 商店 | Kowloon East Kitchen |