2016.7.20 喜來稀肉

旦那さん成日都話想去食一次喜來稀肉，呢日出開尖沙咀，有機會去試啦。
為咗唔想排隊等位，我哋6點半就坐低食，但限時食個半鐘。

前菜有泡菜、醃洋蔥同辣芽菜蔥絲。
爐邊嘅蛋有淨蛋同泡菜兩款，另外仲有生菜，全部都係放題任添。
我鍾意食「稀肉」嘅泡菜，試過自己一個人食咗兩碟，仲有3轉泡菜蛋同兩籃菜。
我成日講笑話，淨係食呢啲都夠晒飽。

我哋好鍾意食牛肋肉，每次試一間燒肉都會揀份牛肋肉。
不過呢個牛肋骨肉無咩特別，中規中矩。

之前同朋友去食「稀肉」時試過佢哋招牌嗰個喜來稀肉，印象中係一啲牛味都無。
見佢話豬嘅護心肉又係招牌，咁試埋啦，點知都係無特別，唔覺得真係咁「招牌」。

食到一半，我哋叫多個「牛五花」，牛五花即係雪花肥牛／牛胸腹肉。
呢個牛有醃，個醬汁醃得好好味亦唔會過咸，但食極都估唔到個醃醬係咩嚟。
肉食得出好鮮甜，輕輕燒到五六成熟，油花好香而且肉好腍，用塊肉包住辣芽菜蔥絲嚟食好好味。
因為佢我哋好想再嚟食過。

個地方唔夠冷氣，我哋少有地叫咗支啤酒嚟飲。
可惜支啤酒係唔夠凍嘅⋯⋯

限時個半鐘，我哋兩個人叫3碟肉都唔夠時間食。
開頭叫咗個白飯但漏單，要再追先有。
每次叫人換鐵板都要等一輪，搞到更少時間去燒。
碟牛五花食到一半已經有侍應行埋嚟拋低一句「time’s up」就行咗去！！

如果唔係碟牛五花，我哋應該唔會話再想去食「稀肉」。
而家會想再去食，但唔會㨂呢間。

喜來稀肉
尖沙咀金巴利道79-81號金栢閣1樓連地下

====================================

感謝 tabitachi 提供以上資料

tabitachi的網誌: http://tabitachi.wordpress.com/

====================================