|
抵食火鍋套餐
|
|
mjqueen7e
2016-08-04
422
0
|
分享
收藏
自從老公調咗去何文田上班後，兩口子就多咗來旺角覓食。見剛打完風，天氣無早兩天咁悶熱，決定下班後齊齊去打邊爐，烚吓烚吓。本來打算近近地在附近找個地方吃頓火鍋放題，不過原來老公早幾天放工時，路經彌敦道，發現這間《新南苑》的易拉架，得知這裡晚市有半任食火鍋套餐，覺得都幾抵食，提議一試。 原來店子是位於彌敦道華僑商業中心 3 樓，面積頗大，佔地全層，雖然店內佈置唔算特別，只是一般酒樓格局，但環境唔錯，尤其是用餐區以白色牆身配上搶眼的橙色座椅，裝潢新簇，乾淨企理，加上座位設計寬敞，桌子之間亦空間十足，令人坐得舒服。 安坐後，服務員先遞上餐牌，除了有老公想試的海鮮火鍋半放題外，原來還有海鮮蒸氣鍋供應，不過見前者較為經濟，只是 $258 一位，便有齊火鍋湯底、海鮮拼盤、火鍋配料、手切牛頸脊、甜品及任飲自家製涼茶和汽水等，所以還是決定點這個套餐試試。 原來招牌麻辣雞煲要三位或以上，才可免費享用，也不打緊，反正一心來吃火鍋。湯底五揀一，選了澳門豬骨濃湯窩底，點餐後，店員隨即送上前菜，有香脆花生、大豆芽和豆角，不過每客就要另收 $20。 趁空檔先去取飲品，原來除了罐裝飲料外，雪櫃入面還有清熱降火的自家製檸檬薏米水供應。至於醬油及調味料 (每位 $10)，花款雖然唔多，只有蔥花、芫茜、辣椒粉、芝麻醬、指天椒、生蒜、炸蒜、沙茶醬等，不過客人可因應個人喜好，自行混醬，調校出心中醬料。 吃火鍋前，店員先送上一客鱆紅魚刺身，分量不多，只得四件，但每片魚肉都切得厚薄一致，入口肉質鮮嫩富彈性。 窩底選了澳門豬骨濃湯，湯窩用料非常豐富，除咗有兩大件豬骨外，還有勁多超甜粟米、薯仔、番茄、白蘿蔔、芹菜等。舀起一碗試試，湯底果然濃郁鮮甜，難怪服務員說是店裡的人氣「滋」選。 至於個生猛海鮮拼盤，分量亦絕不欺場，有龍蝦、鮑魚、螺、蟶子皇、海蝦、元貝、脆鯇片等。當中最讚自然是龍蝦和鮑魚，尤其是前者龍蝦，特別好肉地，以豬骨湯輕灼後，入口鮮甜彈牙，蝦味濃郁；而後者鮑魚，雖然唔算好大隻，但和龍蝦一樣，同樣是這晚的 highlight，吃起來肉質結實有咬口、而且爽身得來又唔韌。 其實蟶子皇和海蝦，質素亦不俗，灼熟後蟶子仍然大隻巨型，入口啖啖肉；而蝦隻就肉質嫩滑，鮮甜度攞滿分。 吃火鍋怎能沒有牛呢？套餐包本地手切牛頸脊一碟，牛肉已切成薄片，肉質肥美嫩滑，灼幾灼即食，入口牛味濃郁兼富嚼勁，毋須蘸點醬油吃，已經夠曬滋味。 除了海鮮拼盤和牛頸脊只限一次過外，其餘火鍋配料全部任點任食。數一數，共有 33 款，選了魚皮餃、韭菜餃、芝士丸、貢丸、海膽丸、鮮蝦雲吞、墨汁墨魚丸、豚肉、龍躉片、炸魚皮、響鈴等一大堆。值得一讚的有墨汁墨魚丸，入口爽滑彈牙不在話下，咬下更有濃郁墨汁香；而魚皮餃個皮亦包得幾薄、中間餡料足。如果愛吃流心或有特色之物，推介試試芝士丸和海膽丸，前者一咬即有澎湃芝士汁流出、而後者海膽丸，面層以彈牙墨魚肉包裹，咬開入面是軟綿綿的海膽，入口帶甜味，勁邪惡！此外，非吃不可的還有入口脆滑的龍躉片和脆薄鬆化的響鈴，質素甚高，也值得一試。至於炸魚皮就稍有油膉味，但可接受。 餐廳設有蔬菜自助區，客人可以因應自己的食量和喜好，自行挑選。走近看看，蔬菜種類雖然不多，但全部都好新鮮，即灼即食，爽脆鮮甜。臨走前記得食埋個北海道 3.6 牛乳奶凍，入口滑嘟嘟、涼浸浸，奶香十足口，令人吃不停口。整體來說，食物質素唔錯，海鮮料同蔬菜都好新鮮，而且環境幾舒服，冷氣充足又有電視睇，值得再訪！
感謝mjqueen7e提供以上資料 mjqueen7e的網誌: http://www.openrice.com/zh/gourmet/reviews.htm?userid=66478&city=hongkong
|
~END~
人均
$306.00
| 商店 | 新南苑私房菜火鍋鷄煲 |