|
專業勝於一切
|
|
Jackiess
2016-08-29
803
0
|
分享
收藏
| 男友出左bonus，毫不留手請我去食由師傅發板的壽司，記得之朋友問我有邊間壽司舖係食呢啲高級壽司，由於我知道朋友住元朗，所以就推介佢嚟呢間食，而自己都決定為呢一餐寫返篇食評。 前菜係宮城縣嘅生粟米同埋靜崗縣的蕃茄，生粟米清甜爽口，而且咬入口仲有奶白色的粟米汁，而這客蕃茄沙律，皮薄果肉厚，而且加上葱碎和醉汁，相當醒胃的前菜。 之後的左口魚刺身，為左入口無咁漏，廚師灑上酸汁，已經夠味道，入口即溶的魚油，完全不需點任何的豉油同埋wasabi~ 平時食嘅左口魚我都數都會點炙燒，不過呢一客竟然唔使燒都入口即溶~ 正 下一道的深海池魚刺身，可以話相當肥美。除左魚身嘅油份之外，魚肉亦相當爽口。 令我覺得驚喜嘅係呢一道新鮮嘅銀鱈魚，因為我平時無諗過銀鱈魚可以係一道刺身，佢落左少少芥末醬炙燒，令魚油輕輕滲出，魚肉入口非常柔軟，而魚皮亦十分香口，不過食完真係有少少漏~ 由於銀鱈魚太漏，跟住落嚟嘅象拔蚌就相對地清甜可口，入口爽口，處理得恰到好處，雖然清甜，但竟然有少少腥嘅味道~ 食完4道刺身之後，就嚟到壽司勒。我其實唔係好分得清真鯛同埋伊左目，嗱~ 呢一道就係真鯛，師傅用熱水炙過魚身表面，令味道更濃，入口時魚味真係非常濃烈~ 師傅話呢件壽司個名叫伊左目，面頭係有薑嘅花冧，入口有少少辣，魚味不算太濃~ 平時我唔食Toro ，不過師傅話呢一件係Otoro，係toro最肥嘅位置，有少少筋，但係入口唔燒都有魚油，滑到不得了~ !!! 佢嘅紋理有緻，入口軟滑，加上紫蘇葉嘅味道中和左佢肥美的魚肉漏嘅地方，真係好好食 ! 經過一輪肥美的魚油攻擊，終於中場休息嚟一客和食 --- 燒黃魚，魚皮炸得好煙韌，而且燒出嚟嘅香味，好似鯖魚一樣，灑上海鹽，整客和食無需再點任何調味，話時話，我其實係呢一餐都無點過豉油。 下半場開始就有白蝦壽司，師傅話係香港貝沙灣特產，上面灑上岩鹽(又係唔使點豉油) 及以紫蘇葉花，入口清香，而且蝦肉滑多於彈牙。 清一清個味道之後，就到左赤鯥嘅出場，表面被炙燒過之後，魚油滲出，令魚肉十分嫩滑，半溶係口嘅感覺更加好吃。 最後的海膽壽司係來自北海道根室，入口清甜，而且完全無腥味~ 真係一個好好嘅壽司終結啊~ 天婦羅方面，佢有海蝦、舞茸、冬菇、南瓜同埋茄子，我唯一覺得美中不足就係呢一部份，其實我覺得呢度嘅天婦羅唔係真係幾好食，我覺得個天婦羅粉好似炸得好煙韌咁，但其實我覺得唔應該係煙韌嘅質地。 不過呢一款嘅舞茸比較特別，平時多數都係俾冬菇，但係呢一間用舞茸去取代，口感較RICH ，而且其營養價值都比冬菇高，呢個都係顯出呢餐飯有不同嘅地方。 呢一個魚湯其實已經係食左咁多之後，沖洗一下啱啱食左天婦羅油油膩膩嘅腸胃，魚湯上面除左有兩片翠玉瓜之外，其實上面七彩嘅米花都係相當吸引，而且還加了葱絲令整個魚湯無咁漏，飲完個湯都覺得幾飽。 我好少聽到有餐廳有士多啤梨雪芭，所以一聽到有呢個選擇，即刻眼睛發光 !!! 入口的士多啤梨味道不算太人造味道和太濃，清清甜甜，問侍應生是這裡師傅做的還是出面拎貨，侍應生好honest咁答係日本訂返嚟，唔怪得特別好食啦~ (崇洋~ ) 其實都幾羡慕元朗呢個地區，竟然有咁多間出名嘅壽司舖，我覺得每個人大約1,000倒食一啲咁有質素嘅壽司，好過出求求其其食buffet ~ 如果士多啤梨雪芭有得外賣就好~ 另外，值得一讚嘅係，而家好多餐廳嘅侍應生都係好業餘，例如佢地係唔會知今日入左啲乜野係新鮮，呢啲食物嘅產地係邊度，但係呢度嘅侍應生就完全可以答到哂呢啲問題，而且佢地仲會好清楚啲日文字點寫。 所以話真係好難唔俾5星啲服務。
感謝Jackiess提供以上資料 Jackiess的網誌: http://www.openrice.com/zh/gourmet/reviews.htm?userid=151264&city=hongkong
|
~END~
人均
$1000.00
| 商店 | 寿司の神 God Of Sushi |