|
小欖港式燒烤場
|
|
Yan_PIG
2016-04-24
555
0
|
分享
收藏
| 四月天氣常常不穩定又落雨，同家人今晚有一點小幸運呢 無落雨之外經過雨後天氣比較涼快，可以舒舒服服BBQ。 講番小欖燒烤場樂園，以我所知呢到都開左好多年，近幾年我都少左黎呢邊，大概係近年多左好多重慶燒烤場，所以久違了的港式燒烤別有一番風味。 坐巴士起「警察宿舍」站落車，跟住指示行五分鐘左右就到燒烤場地點易搵。 至於收費方面分兩個價錢成人就＄110，細路長者就＄80 開爐費就＄30，每個爐包兩包炭，之後再買就每包＄16。（今次我地燒左3個鐘到，基本上三個鐘兩包炭夠燒有淨既，呢到既炭都幾耐用） 入場後每人就包一支水一罐飲品，飲品都係大路嘢啦汽水呀檸檬茶菊花茶綠茶都有得換嘅。 選好要邊個爐我哋就開始出去拎嘢食啦，我哋揀咗有電視睇嘅位置可以一路燒嘢食一路睇電視。 講番呢度食物有咩種類，有麵包、丸類、肉類、蔬菜類 詳細可以睇返我影既相 想要嘅食物就同職員講，佢哋負責拎比我地。 值得一讚呢度啲食物都醃得幾入味而且食完唔會好口渴。（因為我好怕加過太多味精嘅食物，食完要係咁飲水） 選好野食就馬上開動BBQ 燒雞翼我鍾意食～ 呢度有個比較特別嘅口味，沙薑雞翼，燒完之後味道好香，雞翼皮脆肉嫩呀！ 雞全翼有沙嗲口味!! 比較惹味 推薦大家試吓呢度嘅山賊味牛柳粒，醬汁味道甜甜地，牛柳粒肉質比較軟林，以燒烤場質素睇，肉味都唔錯。(另外，呢到有牛扒，但味道同肉質都唔比上呢個牛柳粒，唔推介!) 呢個金沙骨燒左一次不過燒完比屋企人食咗， 賣相很好，肥瘦平均，呢到金沙骨肉算多，值得一讚。 蔬菜類呢到有茄子、翠玉瓜、青椒同粟米，蔬菜新鮮~ 留意番薯係唔包嘅＄10一份。 呢個燒烤場設施整齊又乾淨，食物大路款式有齊晒，最重要食完唔會覺得口渴相對感覺比較健康，起屯門黎計性價比滿意既燒烤場。
感謝Yan_PIG提供以上資料 Yan_PIG的網誌: http://www.openrice.com/zh/gourmet/reviews.htm?userid=151904&city=hongkong
|
~END~
人均
$110.00
| 商店 | 小欖燒烤樂園 |