|
水準發板*褔村日本料理
|
|
暴食小公主
2016-05-16
548
0
|
分享
收藏
一年入面梗有幾個重要既日子要好好慶祝 對於一個標準吃貨黎講，呢D日子當時係去搵好(貴)野食既機會 食野之前當然要做好準備功課 上網睇到中港城呢到有間日本餐廳 而創辦人係元老級既日本菜司傅西村先生 所以就決定黎試一試啦 店內裝修同一般既日本餐廳無咩分別 吧枱位置比較少，得5、6個左右 因為小公主好鍾意睇住佢地整壽司 所以就揀左坐吧枱喇 日本菜又點少得新鮮既海鮮 *隻螺就算冰住，但都不斷係到爭扎 當日叫左2位Omakase ($1,200/位) 重要日子當然要食豪d啦 前菜 前菜靚到好似個藝術品咁，就咁睇仲以為自己食緊法國菜 除左賣相吸引之外，食物都好出色 先食淡味既豆腐，豆腐好重豆味 而且質地同一般食開既好唔同，就好似一個濃縮左既版本咁 蕃茄一定要一口食，因為會爆汁 口感好飽滿，而且清甜到不得了 最後食埋個糖煮栗子 栗子粉糯既質感，加埋獨特既香甜，有多幾粒就好喇 成個前菜每一part都好細緻，好有心機 沙律 食完個咁精細既前菜，就黎番個粗獷d既沙律 菠菜新鮮爽甜，蟹柳絲鮮味冰凍 雖然唔算驚喜，不過都好開胃清新 剌身拼盤 男友既剌身拼盤 每件都立立令，唔駛講都知用料新鮮 我試左少少牡丹蝦，肉厚味甜 而男友話最欣賞係兩件魚:油甘魚同拖羅 兩種魚都充滿魚油的香味 但同時一丁點血腥都無 特別是拖羅入口即化，果種滿足感雖然我唔明 但佢食果時個享受既樣，我都相信d剌身真係好高質 七彩炸蝦 因為我唔好生野，所以廚師另外預備左個炸蝦比我 有別於一般天婦羅，呢到用左日本米通黎做個粉漿 日本米通有唔同顏色，所以望落去好colorful好得意 不過可能米通太厚，反而令人食唔到蝦肉既質感同味道 雖然做法幾特別，不過好似有少少可惜 反而天婦羅蕃薯仲有驚喜 炸過既蕃薯少左水份，所以食落勁粉嫩更甜 蜆煮銀鱈魚 銀鱈魚先用鐵板燒燒過 再放入洋蔥湯同蜆一齊煮 燒過既銀鱈魚表面仲有少少脆 魚油既香味同洋蔥湯既甜味相得益彰 另外配角蜆都一樣好食，脹滿鮮甜 個人覺得如果可以配埋飯一齊食，真係一流 煮春菊 食完一味比較濃味既食物，就黎個菜清一清味蕾 煮春菊既材料雖然好簡單 但係佢加左少少蝦米落去煮 所以即使佢無落咩調味，都覺得好清甜 鮑魚汁煮牛脷 鮑魚汁濃稠鮮味，配搭無咁多油脂既牛脷 即使個汁比較濃，都會覺得好膩 而且牛脷煮得軟腍，絕對唔需要刻意咀嚼 壽司 - 福村生菜包 生菜包住白飯同灸燒過既三文魚 司傳話做法係由佢地獨創，感覺都幾新鮮 呢到既生菜係由日本運到，完全唔會有澀味 而同時減低左三文魚既肥膩感，唔錯 壽司 - 火炙吞拿魚腩壽司 因為燒過，所以未食之前已經閒到好香 一放入口，D油魚係口腔爆發出黎 果種滿足感真係好正 壽司 – 白蝦壽司 壽司底既檸檬片除左令成件事更靚之外 其實個飯都會索到少少檸檬既香/酸味 (男友) 白蝦雖然味道清淡D 但上面加左海膽同魚子 就令成件事豐富左好多，味道好有層次 壽司 - 火炙左口魚 左口魚魚肉比較嫩滑 而且估唔到會咁重魚油香，味道好特別 味噌湯拉麵 最後食番個拉麵 湯底濃郁，簡簡單單加D蔥花就已經好正 日本蜜瓜、紅豆奶凍 蜜瓜多汁到好似想滴出黎咁，甜度極高 紅豆綿密，調味唔會太甜 加埋香滑既奶凍，十分之配合 由前菜到甜品都係有誠意之作 好多食物既烹調手法好似比較簡單 但簡單之中亦見到係花左好多功夫同時間 間店而家已經係由第2代去打理 雖然位置唔算好方便 但我都推薦比所有想食有水準日本菜既朋友
感謝暴食小公主提供以上資料 暴食小公主的網誌: http://www.openrice.com/zh/gourmet/reviews.htm?userid=58662494&city=hongkong
|
~END~
人均
$1200.00
| 商店 | 褔村日本料理 |