|
歐洲古堡* Frites Belgium on Tap
|
|
暴食小公主
2016-05-10
466
0
|
分享
收藏
星期5收工之後梗係要約埋幾個好姐妹去happy Friday啦 地點就揀左希雲街既Frites Belgium on Tap 餐廳係我上次食完氷屋之後行過見到 當時正係睇個門口已經覺得好Grand好有氣勢 所以一有機會，梗係要快手去試啦 入面裝修以紅木為主，而且樓底極高(真係極高) 個感覺就好似入左去間外國既古堡咁 而且空間好大，每張枱都好寬闊，一d都唔會覺得迫夾 呢到係賣比利時菜既，除左朱古力之外 其實比利時既啤酒都好出名架 所以呢到有成幾十款既啤酒比你揀 而且全部都係由比利時/歐洲入口，出面比較小見 Arlevelda Grand Cru $75 本身我就唔係太鍾意飲啤酒，因為覺得苦苦澀澀，好難入口 當晚其實都真係抱住 ’咁特別就試下啦’ 既心態 係menu是但點左一支，估唔到又真係幾有特色幾好飲 首先大家唔好比佢既顏色呃左 以為咁深色一定就係好苦好重味 一飲落口你係會feel到好重麥香 再飲真d，係會有少少麥芽糖同拖肥糖既味道，甜甜地咁 而且個texture係比一般既啤酒醇厚 就算我平日真係唔太好啤酒，但都覺得好飲 朋友有叫其他試 (不過我唔記得影相) 而且有d果味仲好重，好似cider咁 Crab Tian $120 一開始當然要叫D Starter食下 crab tian用新鮮蟹肉加埋青瓜，豆同香草而製成 入面蟹肉落得好多，而且拆肉拆得仔細 完成唔會有任何穀或者軟骨係入面 欣賞佢用既所有配料都係好清新同比較淡味 所以蟹肉既鮮甜味唔會被蓋過，但又同時食到蔬菜既清甜 配埋麵包一齊食，又脆(麵包)又軟(蟹肉)又爽(蔬菜) 成個配搭好有層次，好值得一試 Mussel Pots (Mariniere) 1/2kg $235 比利時除左啤酒出名之外 青口都係另一個好傳統好能夠代表佢地既菜式 呢到既青口煲有幾個唔同既汁 我地叫店員推介，佢就介紹我地試呢個最傳統同比較多人叫既白酒汁 因為煮既時候酒精都揮發左，酒味唔會好重 加埋D香料同蒜頭，個汁完全唔Heavy反而好清新 不過最重要都係呢到既青口好新鮮 隻隻都好肥，D肉脹卜卜咁 半kg其實每人都可以食到至少5-6隻，其實都幾抵 仲要有埋薯條同麵包 麵包質地比較鬆軟，可以吸好多醬汁 用黎點充滿鮮味既青口汁食真係一流 750Gram Roasted Pork Knuckle $245 咸豬手皮好薄，唔會好厚咬唔開 而豬肉就仲係好嫩滑，一D都唔會乾 不過我地最欣賞係佢底下有好多烤蔬菜 你知女仔食得多肉好易會濟 有番D蔬菜平衡下好好多 而且全部都係勁甜，好似係D有機農場摘出黎咁 Flemish Short Rib Stew $295 呢個慢煮牛助骨真係好食到不得了 每件牛助骨都有少少肥 當D肥肉溶化、D油香慢慢充斥個口果種感覺真係好正 另外因為佢用左D蔬菜一齊炆煮 所以又會有D蔬菜既甜味中和番 但個薯蓉我個人就麻麻地 雖然個Texture係好滑，但佢加左d松露油 個松露味太重，反而有d奇怪 我地幾個都覺得食物好出色 而且feel到佢地係好用心經營 例如:每個牌子既啤酒都會用番同品牌既酒杯 (請注意佢有成幾廿個brands) 又例如:食物既配菜全部都好高質，完全唔馬虎 雖然你睇個價錢可能會覺得有少少貴 但其實佢既份量真係好大，由其是d mains (唔通呢個都係比利時style??) 所以計番開，其實價錢都好合理 而且我好鍾意佢呢到個氣氛 唔會好似d fine dining咁好拘謹 但又唔會好似d酒吧咁嘈， 成個環境靚得黎同時又好causal 如果想帶另一半去d靚靚地既地方食飯，但又唔想咁拘謹 又或者想同一大班fd慶祝生日呀/升職呀 呢到都係一個好適合既地方，推薦
感謝暴食小公主提供以上資料 暴食小公主的網誌: http://www.openrice.com/zh/gourmet/reviews.htm?userid=58662494&city=hongkong
|
~END~
人均
$250.00
| 商店 | Frites Belgium on Tap (銅鑼灣店) |