|
大熱@紅磡
|
|
MonkeyHin
2016-07-28
307
0
|
分享
收藏
返工返到攰, 真係要食返啲辣野衝擊下自己先得! 今日放工就約左媽媽去食韓國炸雞, 正啊喂! 約左媽媽7點鐘喺紅磡火車站等, 人頭湧湧... 行左10十分鐘右就到BBQ Chicken, 新開無幾耐, 間餐廳都算大, 不過二人位真係有啲迫, 你預叫3個菜加野飲張枱已經full左, 同埋無乜位擺我地啲袋... 7點3黎到, 唔係好多人, 大概有1/3人左右, 有啲女仔係度飲野傾計。餐廳啲waitress個個都好韓, 染左韓國style髮型, 再加埋啲好多部電視播緊韓國MV, 可以一路食野一路睇吓啲韓國型男, 嘻! 其實係聽吓Kpop, 都幾好mood! 好肚餓! 忍唔住一坐低就九秒九咁掃個menu! 最吸精既係佢個炸雞啦當然! 有honey, 柚子, 傳統韓辣醬炸雞幾款味, 識食梗係食正宗既韓辣醬炸雞! 仲要係"秘制辣醬", 好似好正咁! 呢排韓國芝士乜乜乜咁hit, 梗係都要點返樣黎試吓, 唔洗講, 一定揀芝士撈拉麵, 怕唔夠飽 (好似食好多野咁添 ^^"), 仲嗌左個泡菜蟹肉花卷雙拼, 即係好似sushi果啲呢~ 再加埋個韓式雜莓梳打, 喂喂喂, 夠啦唔好再嗌啦! 一黎就已經送上三小碟泡菜, 有白菜, 白蘿蔔同埋芽菜, 白菜好夠辣, 可以甜少少, 白蘿蔔芽菜就一般般...無乜味咁..菜點左唔夠2分鐘, 係, 係2分鐘, 已經黎左個炸雞同埋芝士撈拉麵! 有無咁快啊!? 啲雞好惹味, 脆卜卜既炸皮, 有啲芝麻係面, 再加上個辣醬, 好快就食左兩大件！同埋唔會好漏！不過再食...唔得啦, 真係好辣, 辣到我同媽媽都停左係度, 跟住我地試個芝士撈拉麵, 呢個堅正！成盤鐵pan上, 鋪面芝士喺啲拉麵度, 再加埋啲煙肉同勁勁勁香口既炸紫菜, 好正啊真係! 作為芝士控, 我同阿媽都停唔到口! 執邊有4舊西蘭花, 可以平衡返芝士既"漏"。飲埋個韓式雜苺梳打, good! 咦? 點解無味既??? 個雜苺梳打我地嗌左一酌, 倒左兩杯出黎仲有好多, 飲落有啲莓味, 但係無乜甜味, 好淡... 可能係因為其他野食濃, 所以野飲light D啦! 都ok! 跟住輪到啲花卷, 一碟有16件, 細細件, 試左個泡菜既先, 紫菜味濃! 泡菜味欠奉... 個蟹肉花卷...原來係蟹柳花卷, 仲以為真係係拆出黎果啲蟹肉添! 有少少失望... 食到八點, 間鋪已經full晒.. 媽媽掛住食唔記得要放啲炸雞既骨落隻杯度, 食食吓有個女侍應行過黎幫我地執枱, 佢''施施然"帶點不悅既眼神企定響我地執邊, 慢慢打開佢手上既膠袋, 將我地枱面既雞骨放入個膠袋, 之後同我地講 "你地之後可以放返啲雞骨落隻杯度" .... 佢既態度唔係咁好! 因為啲雞好辣, 我地係咁飲個雜莓梳打, 飲到個底, 勁甜, 有啲酸酸地, 原來係啲甜浸晒係個底, 但係無侍應提我地飲之前shake下佢 (因為成酌都係紫色, 根本睇唔到啲果肉/糖浸左係底), 之後都飲唔晒, 因為太甜, 同埋淨返兩隻炸雞同幾件花卷... 食完好快我地就走啦! 野食算可以, 服務就真係有待改善啦！
感謝MonkeyHin提供以上資料 MonkeyHin的網誌: http://www.openrice.com/zh/gourmet/reviews.htm?userid=533237&city=hongkong
|
~END~
人均
$150.00
| 商店 | BBQ Chicken Premium Chicken (紅磡店) |