抱歉,發生點錯誤。
重新載入
Casa Fina Seafood & Oyster Bar:分蠔不差
山區麵包王
2016-09-20
598
0
分享
收藏
今晚嚟到Casa Fina,目的之一就喺嘆生蠔,不過,朋友推介佢嘅原因,就喺佢哋煮嘅歐陸菜亦有一手。比起好多食廈,亨利中心比較無咁雜,進駐嘅餐廳亦屬中高檔,所以,排隊等電梯都無混亂嘅場景出現。


雖則話餐廳佔足大廈全層,不過,大廈本身唔喺好大,所以餐廳嘅面積都唔喺好大,但侍應唔少,故服務都好妥貼。一入門口就見到廚房,不過就隔住塊玻璃,蠔吧、師傅做菜就在眼前。(註:環境比較幽暗,小弟啲環境相影得有啲懞,請見諒。)





室內裝潢型格,晌柔和嘅燈光下,環境就極富情調,設計上用上一啲通花屏風間隔出唔同區域,稍稍加強少少私隱度。而每個座位都加墊咕臣,坐得人頗舒服,整體感覺輕鬆自在。





先介紹吓主餐牌,類別分咗冷盤、熱盤、湯品、意大利飯、意大利麵、主菜及甜品,所以,唔食海鮮一樣有不少選擇。另備有酒餐牌,香檳、紅酒、白酒……等近30款餐酒。







既然蠔吧喺主打之一,海鮮及生蠔固然選擇多多,從餐牌所見,足有15款生蠔,6款凍海鮮,當然,當日確實有咩時令嘢提供,則需要問問店員。而生蠔嚟自世界各地,如美國、南非、愛爾蘭、西班牙、法國等地,定價$58-$78,依家仲買一送一,非常抵食。此外,如一次過想多試生蠔及凍海鮮,又鍾意襯杯餐酒,大可「蠔」不猶豫考慮佢哋嘅海鮮拼盤($568-$1,568)。




bowl
自選生蠔及海鮮 生蠔、凍海鮮及其他食物,攞個平衡位,揀兩款生蠔再搭一隻淡水龍蝦仔,因為友人未試過依一種龍蝦仔。一大盆冰鎮即開海鮮,以檸檬角做起點,順時針數起由淡至濃,分別喺兩隻西班牙嘅Arousa,中間喺南非嘅淡水龍蝦仔,再落嚟喺兩隻法國嘅Gillardeau。淡水龍蝦仔開邊,而生蠔開得乾淨俐落!

食海鮮嘅佐料,有檸檬角、自家製雞尾茄醬及青芥末醬油,友人話未試過食生蠔沾醬油,小弟更正話,啲青芥末醬油喺用嚟隻龍蝦仔嘅。


bowl
Arousa $65 / 隻 體形大,肉厚而嫩滑帶點黏,但蠔味較清淡,故加少少雞尾茄醬吊起啲蠔味,而相對海水嘅鹹味濃啲,整體喺讓人覺得較為輕盈易入口。


bowl
Gillardeau $78 / 隻 被稱得為法國蠔后,絕對唔喺流,所以,輕輕唧丁點檸汁細意品嚐,蠔肉口感好爽脆,兼且蠔味重,持久有餘韻。




bowl
Scampi $160 / 隻 淡水龍蝦仔色澤鮮艷新鮮,蝦肉輕易就可以刮出嚟,塗上少少青芥末醬油,令蝦嘅鮮甜味更為突出,肉質帶點黏,有別一般食蝦常有嘅爽彈感覺。




bowl
黑松露什菌忌廉湯 $88 個黑松露湯一上枱,菌香四溢,除咗因為見到有好多什菌粒外,更因為湯面再加多一抹黑松露油,變得氣味更幽香。入口湯嘅質感十分順滑,湯中菌粒切得幼細,令口感更有層次。跟渺件蒜蓉包,暖暖哋,烘得平均金黃,充滿,蒜香。


bowl
白酒羅勒煮蜆 $178 白酒煮蜆喺幾常見到嘅菜式,而今晚道白酒煮蜆亮點就在於以紐西蘭托托蜆入饌,托托蜆非常大隻,數一數共有7隻,托托蜆浸晌以白酒、羅勒、洋蔥粒、蒜粒及車厘茄所做嘅湯汁,色澤鮮明吸引。而蜆隻肥大厚肉,食落鹹鮮,感覺充滿海洋味道,卻又滲出淡淡白酒及羅勒幽香,啲蜆果然喺靚貨;個湯汁亦唔好錯過,絕對可以當湯飲,酸酸甜甜嘅湯汁帶出微微嘅白酒香。






bowl
露絲瑪莉燒原隻去骨春雞 $298 主菜中,喺廚師推介嘅菜式之一,雖然喺春雞,但睇落唔算細隻,燒得外皮帶焦香而甘脆,食落好有露絲瑪莉香味,雞胸位稍微有啲實淨,但脾位真喺好嫩滑;伴菜唔喺啲普普通通嘅薯菜,荷蘭串茄喺烤焗過,茄味更濃縮鮮甜,仲有烤蒜、意大利青瓜及黃青瓜、滑溜得緊要嘅薯蓉,睇得出一絲不苟嘅心思。






bowl
意大利芝士餅 $88 一大件意大利芝士餅,加上少少士多啤梨粒、藍莓粒、草葉做裝飾,外觀可以變得好唔同,從橫切面可見,件芝士餅餅底用上薄薄嘅海綿蛋糕,中層則改用手指餅去做,但同樣浸足咖啡酒,濕潤軟綿充滿咖啡酒香;而夾晌中間嘅馬卡風芝士部份做得非常軟滑,面層又鋪滿唂咕粉,充滿可可香味。





Casa Fina個環境固然幽靜好氣氛,食物更喺做得好出色,而且,服務非常熨貼,一道菜完咗先接一道菜,亦幫我哋換上新碟食下一道菜,感覺稱心,各方面都稱得上分毫不差。
個人評分 味道:8/10
環境:8/10
服務:8/10
抵食:7/10
平均每人消費:HK$575
餐廳資料:
Casa Fina Seafood & Oyster Bar
銅鑼灣恩平道42號亨利中心13樓
2504 2928


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 Casa Fina Seafood & Oyster Bar