|
形神俱似
|
|
愛食
2016-09-28
423
0
|
分享
收藏
| 女友人WK早前約我食生日飯,我話想食齋,搵到荃灣呢間自助餐,重要有乳酪o既,即刻兩眼發光,約定23-9-2016(Fri)晚o黎食,由於驚多人,我就打o黎訂位先. o個晚我o地都早到,睇吓佢啲o野食,唔係好多,WK問睇o左食評好似唔係好掂.驚唔驚中伏?我答唔怕啦,試.於是就攞位,佢o地都好好,俾我o地入座,重俾兩張枱我o地揀. 安頓好後影佢啲食物先,驚唔記得食o左咩嘛.但由於時間關係,我變o左邊影邊攞. 我o地食o左: 1. 九州熊本燒元貝 呢個口感彈,味道仍好,唔錯o既,不過係凍晒. 味道:4分 2. 黑椒素豬排 口感好飲,呢個唔太辣,口感亦似豬排,好味. 味道:4.5分 3. 素魷魚圈 彈彈地牙,OK似樣. 味道:3分 4.烤豆卷雞槌 形狀極似,食落,內裡o既’肉’紋亦做得非常似,同時亦食到有’骨’,’骨’係咩o黎?原來係雪條棍, 感覺唔太環保.至於味道,因為佢一早寫明係豆卷,所以味道千真萬確係腐皮. 味道:5分 5. 菠蘿素排骨 唔…呢個有啲似食芝麻合桃,只係唔係硬,酸甜味冇. 味道:1分 6. 焗吉列素魚柳 呢個正常,我蘸食熱狗o既黃芥末醬食, 黃芥末醬好味. 味道:3分 7. 香(手春)手抓餅 緑緑地色,質地似印度油鬆餅,食落味道亦似,要蘸啲醬汁食,我又蘸既黃芥末醬,好味. 味道:4.8分 8. 尼日尼亞烤薯角 由於我驚呢個係辣,所以我只攞一個同WK share.原來唔係辣而係甜甜地, 薯角腍晒,呢個一般. 味道:2分 9. 沙爹烤串燒 一食落去,食到羊羶味,應該落o左孜然粉吧,口感麻麻,沙爹醬亦唔好味. 味道:0.5分 10. 唔知扮咩o既丸 佢o既造型係橢圓形有條好短o既尾巴,由於有辣椒o係上面,我覺得會好辣.果然都幾辣吓,而呢粒o野口感味道極似魚蛋. 味道:3分 11. 梛菜炒素羊肉 呢個好好食,口感又鬆. 味道:5分 12. 肉骨茶 我只夾肉骨茶裡面o既肉同唔知咩o野,o個件唔知咩o野軟硬適中;而豬肉好鬆軟.不過兩樣o野o既味道都幾清淡. 味道:4.8分 13. 法式焗彩椒 唔知o係紅椒上放o左咩o野,但食落又幾得意. 味道:3.5分 14. 素肉醬意粉 呢個要另外自己叫侍應俾,我只叫一個就夠喇.茄醬味好濃,可能重手o左,意粉腍. 味道:2.8分 15. 唔記得木耳咩浸勝瓜 既然唔記得係咩o黎,就算吧,反正都係普通. 味道:3分 16. 泰式檸檬魚 造型比寶蓬齋廚o既更神似,紫菜唔鯹,口感亦正常. 味道:4分 17. 豬大腸 造型同口感都似,不過味道唔夠. 味道:4分 18. 粉絲煲 粉絲粗身,豆卜正常冇問題. 味道:3分 19. 素魚腐 印象唔太明顯,普通. 味道:3分 20. 黑松露雞脾菇 食到黑松露o既香味,OK. 味道:4分 21. 素燒賣 普普通通,冇問題. 味道:3分 22. 豆角 食一條我已經唔食,覺得一般. 味道:2.8分 23. 哈蜜瓜乳酪 終於到最期待一定要食o既乳酪, 哈蜜瓜味濃,乳酪滑,唔酸好味,不過好悻溶.我o地之後各人都食多一杯. 味道:5分 我o地已經食到好飽,但要清我攞定o既沙律,佢自家製千島醬味道好似有啲怪,係咪被乳酪影響o左呢? 24. 桂花冬瓜素肉鬆 呢個其實我冇乜興趣,感覺怪怪,但WK拎錯俾我,唯有食.果然味道係唔夾. 味道:1分 25. 白胡椒蘿蔔 蘿蔔幾靚幾甜,可惜用o左白胡椒煮,辣. 味道:3分 26. 冬蔭公肉丸湯 我怕辣,但見顏色唔紅,覺得唔多對版, 我只食肉丸,肉丸用叉拮唔到,係我太眼瞓拮唔到?咁用湯匙勺啦,最後拮到o黎食,彈牙,係非常彈牙,係唔正常o既彈牙,感覺唔太討好. WK就飲o左啲湯,佢話唔係好辣. 味道:1分 Encore o左九州熊本燒元貝同香(手春)手抓餅, 九州熊本燒元貝其實有幾種味道,芝麻味道就最濃. 我o地真係食到好飽,飽到冇飲過合掌瓜湯,冇食到瓜菜,叉燒包,奶黃包同班蘭包. 除o左熱住o既o野外,其他熟食多數都凍晒,我諗呢點佢o地要諗諗點攪,但同時亦欣賞佢啲素肉唔係一味只食到豆味,而係多樣化. 服務: 我出去攞哈蜜瓜乳酪時,由於唔多識整,女職員就主動幫我整,但踫o岩部機出問題,佢就叫同事,佢同事問我坐邊張枱,佢整俾我,我話要兩杯. 咁食食吓o野至記得我杯乳酪,我出去整吧,個女仔就俾一大杯我,我話兩杯,佢即刻整多一杯俾我,兩杯都大大杯,好好. 密密收o野,唔錯o既. 環境: 坐o係舖入面食,原來覺得闊落,但因一張圓枱客坐得唔到,令通道窄o左,攪到啲人踫到我. 燈光暗o左啲,建議較返光啲. 價錢: 一去到就先要俾錢,呢晚竟然有88折,因為九龍城店開張,咁原價$180.00,就即係變o左$158.40一位.
感謝 愛食 提供以上資料 愛食的網誌: http://www.openrice.com/zh/gourmet/reviews.htm?userid=46226&city=hongkong
|
~END~
人均
$158.40
| 商店 | Red Mango (荃灣店) |