|
意想不到的驚喜
|
|
mjqueen7e
2016-10-17
462
0
|
分享
收藏
天氣逐漸轉涼，又是烚烚吓的好時候，不過今次要介紹的，並非雞煲火鍋。之前曾和老公到訪過位於太子的《米走雞》，近日從食評網得知，餐廳於銅鑼灣開設了新分店，取名《米走雞 Deluxe》，而且除了晚市供應芝士雞煲外，午市更增設西餐，所以趁老公這天清假，就決定兩口子外出拍吓拖，順道過來吃頓午餐。 餐廳座落於銅鑼灣渣甸中心，店內環境舒適，裝潢以啡褐色為主調。甫踏進店，即見靠牆位置擺放了一列長長嘅梳化椅子，設計乾淨俐落，而且空間廣闊，加上暗黃燈光營造浪漫氣氛，若非一早知道這裡是間吃雞煲火鍋的店子，還以為自己置身於一間意大利餐廳添！ 安坐後先拿起檯面的餐牌細閱，店裡的午市套餐，選擇不多，只有 5 款，不過價錢相當經濟，由 $74 至 $138 不等，而且仲要免收加一。不過如果想吃得豐富一點的話，可以另 + $28，加配精選甜品及將是日餐湯升級為蟹肉海鮮濃湯。 點完餐後，侍者先為我倆送上一籃麵包，麵包噴香誘人，拿上手還是暖暖的，而筆者就尤其喜愛當中的乾果提子包，吃起來不但紮實足料，而且外脆內軟，再配上少量牛油，食味令人滿意。 是日餐湯是蘑菇湯，搶先呷了一口，果然真材實料，原來這客湯唔單止以蘑菇打成，入面仲加咗好多菇菌粒，所以喝起來滿口菇香，加上端上桌時仍熱辣辣，令菇香味更勝一籌。至於 Upgrade 的蟹肉海鮮濃湯，用料亦絕不欺場，只須淺嘗一口，濃郁的蟹鮮味便即湧入喉頭，滋味滿分。 主菜方面，首先出場的，是老公點嘅安格斯肉眼扒配炒雜菌 &薯蓉 ($138)，肉眼以木砧板盛上，Size 比預期大，面層呈清晰格仔紋，而且看起來非常厚身，氣勢十足。立即切開試試，肉質腍滑，入口富肉汁，而且油脂分佈亦十分均勻，吃起來滿口油香肉香，非常好味，以這個價位來說，絕對交足功課。而旁邊的炒雜菌，吃起來夠惹味之餘，入口亦菇汁滿溢，加上墊底的香滑薯蓉，味道匹配。 至於我點的阿拉斯加鱈魚配紫薯蓉 ($98)，擺碟亦甚為精美。厚厚嘅鱈魚柳十分之有睇頭，而且廚師十分細心，早已將魚柳一分為二，方便食用。叉起入口，魚柳煎得皮脆肉滑，油脂不俗，毋須蘸點任何醬汁吃，已很美味。當然墊底的紫薯蓉，亦功不可抹，入口不但質感綿滑，而且紫薯味濃郁，教人回味。 另外跟餐的蒜香炒意粉，水準亦不賴，以爆香蒜片炒的意粉，一上檯便香氣撲鼻，而且麵條煮得恰到好處，食落外軟內硬，既煙韌又有咬口，是正宗的意大利的製法，唯一要挑剔就是比較鹹。 加配的精選甜品是香芒芝士餅，用意大利奶油芝士打成的餅身，質地非常香軟，而且芒果的甜味與芝士互相配合，食落甜中帶酸，襯上充滿牛油香的餅底，味道剛好。餐後各自點了熱檸茶和凍咖啡，每人百三蚊左右的消費，以食物水平來說，絕對超值。
感謝mjqueen7e提供以上資料 mjqueen7e的網誌: http://www.openrice.com/zh/gourmet/reviews.htm?userid=66478&city=hongkong
|
~END~
人均
$132.00
| 商店 | 米走雞 Deluxe (銅鑼灣店) |