身為一個偽日本人，去歐洲兩年係一件好痛苦嘅事，英國唔係無日本料理，但唔會好似香港咁多，質素同價錢都係考慮因素。所以當知道倫敦開左辻利，我真係返倫敦幾次就食幾次，都幾有水準，而且見到有進步。返到香港咁啱係觀塘見到辻利分店，比較一下都好。先睇吓個餐牌有幾大分別先啦。

香港餐牌

倫敦餐牌

香港分店比倫敦多選擇就梗嘅，近水樓台。計返英鎊最近低水，個價錢同香港都幾貼。

本來想點焙茶雪糕配綠茶沙冰，但店員話雪糕會融溝埋綠茶唔係咁好，最好就配返原味牛奶雪糕，但我就奇怪就算天時暑熱，我都喺冷氣地方，雪糕下邊仲係碎冰，唔會話咁快融掛？因為我都係想食返茶味雪糕，咁就綠茶配綠茶囉。

等成品就唔係等咗好耐，不過一睇個排場都幾虛，$42只係咁樣。

對比起倫敦，左邊係5.3鎊，右邊係6.3鎊，大杯之餘足料好多。

既然倫敦貴啲姑且當係平手，講返食物質素。香港果杯我一攞上手就水沉，連舖頭都未出啲沙冰已經融雪？唔好嚇我喎？咁我就先飲咗啖茶先，有茶味但好淡，再用飲管吸底部啲沙冰，濃返少少但都係講唔出濃郁兩隻字，頂多就係幾個綠茶茶包沖埋一杯嘅味道。再嚟試啖雪糕，我就明點解店員會咁擔心融雪糕問題，因為個雪糕根本唔成形。

個軟雪糕唔成形，唔夠凍係一個因素，另一個因素係佢唔夠奶兼水份多，所以佢迅速變返液態。味道唔使講，奶同茶味都唔夠濃。喺英國，奶係唔值錢，軟雪糕可以做到濃郁奶香，亦都會比較挺身，呢點香港比唔上我都會體諒，但連茶味都比唔上倫敦分店就好大問題，我唔係好相信日本總公司無畀到做軟雪糕嘅配方佢哋海外分店，我亦都唔係好相信我會黑仔到店方做軟雪糕同沙冰嘅機一齊出事。將貨就價，係我對觀塘分店嘅推測。中環分店或者會好啲，但我都係無興趣試了。

本來想話念在辻利倫敦分店解救咗我思鄉之情鬆鬆手，但諗到日本百年老字號，就更應該有穩定嘅產品質素，先至唔會敗壞名聲，都係有嗰句講嗰句好啲。