羽壽司@藍田 SeeWide

自從藍田開左尼間日本嘢後, 其餘既食市都唔駛排隊就有位坐, 方便左好多人, 但.......人就係咁衰既, 越多人排隊就越想去試, 尼間都唔例外, 我想去好耐勒啦, 終於的起心肝, 早少少去, 咁就唔駛排隊啦, yes!!!!

前: 希靈魚籽壽司($14), 尼款我好鐘意食架, 唔係間間都食到, 咁就梗係要點啦.

後: 鰻魚壽司($16), 條長長既鰻魚上加左好多好多鰻魚汁, 正.

鱈場蟹柳波子($14), 我第一次食乍, 無諗過會係甜添, 幾特別丫.

花之戀($25), 同外面食開果的無咩分別, 材料尚算新鮮啦.

芥辣蟹卷($20), 的蟹又炸得幾脆喎, 出面又多芝麻, 好香口.

左: 三文魚刺身($35), 右: 油甘魚刺身($45), 又係果二個字啦"新鮮".

豬軟骨拉麵($38), 睇個價錢仲以為一人份量添, 點知送到黎原來夠三個人食架, 幾低喎.

立魚刺身($20), 尼款比起之前既更加超新鮮勒, 點解.........原因係係我地食食下嘢既途中, 有位侍應走過來, 問有冇人order師傅從魚缸拿上來即切魚生呀, 之前都未試過, 咪試下囉, 其實每小時都會有一款新鮮切既, 魚種由師傅揀, 今次就揀來立魚. 唔知係咪錯覺呢, 食落口又真係有的特別喎, 口感幾好丫.

三文魚壽司($9), 食完第一輪order既食物, 再叫既都想食返好的之前幾靚既三文魚, 但唔知係咪因為價錢關係, 總比較之前食開既好似無咁肥美咁既.

左: 韓式海蜇軍艦壽司($14), 韓式???好似怪怪地咁, 又係甜既, 我就麻麻地咁勒.

右: 海膽軍艦壽司($25), 的海膽幾靚架, 唔會一pat pat咁, 一片片好分明咁放係上面.

前: 海膽魷魚軍艦壽司($14), 的紫菜又脆, 的魷魚又好滑咁.

總括黎講幾ok架, 以藍田區都食到尼種貨色, 算係咁啦.

地址 : 藍田啟田道51-67C號啟田大廈地下10號舖
電話 : 3188 2544

感謝飲食二打六提供以上資料
個人日誌: http://eaternote.blogspot.hk/

~END~

商店	(已結業)羽壽司 Ha-Ne-Sushi


抱歉，發生點錯誤。重新載入


(0)	(0)	(0)