呢日又係遊客之旅, 今次我去左中環, 其實我幾鍾意去中區行下, 每次番 HK 都會去中/上環一帶行下影下相, 今次呢我就純粹想去中環食下野, 影下一些非常有英國殖民地色彩的建築物, 打算帶番 UK 同同事們分享下 !! 

我係英國咁多年, 問過好多本地人, 發現佢地好多都只係聽過 HK 呢個地方, 但就唔係咁多人真係去過喎 (即使到過, 都可能係匆匆而過, 只用作中轉站去其他國家) , 而我的同事就對我呢個出生地好有興趣, 成日問我 HK 係點 (佢地唔明我地點可以住到 20 幾 30 層樓咁高, 又唔明 1 梯 8 or 16 伙究竟係點), 咁今次借住番 HK 放假, 就影多 D 相俾佢地睇下啦 ~

呢一日的行程係出東隧, 經東區走廊到中環 IFC, 沿途都唔係我駕車 (番黎唔夠幾日, 叫我中區開車, 咪即係要我蕩失路 !!), 所以我好 Free 咁羅住相機係咁影相, 只係沿途呢 d 高樓大廈的相, 我地由細睇到大可能冇乜感覺, 但外國人見到就會覺 "你地仲有冇起得密 D 呀 ! ", 不過某程度都係一個特色黎的, 鍾唔鍾意就真係見仁見智啦 ~

話時話, 呢日的天氣都算唔錯, 藍天白雲, 比起我印象中成日被野罩住的 HK, 真係有 D 喜出望外喎 ! 而最後我地泊左係 IFC 香港站, 因為呢度有轉乘泊車優惠, 可以半價 per hr 泊車.    

我地放低架車, 就行入去電車路, 第一件事係去醫肚 ! 我地去左羅富記, 出名粥同鯪魚球, 但我唔係咁好粥就叫左個雲吞撈, 結果個撈真係有 D 令人失望, 冇食晒就走左啦 ! 我跟住迫老表同我去左永樂園度食熱狗, 細個時老豆已經成日帶我地去食架啦, 已經好一陣子冇黎, 唔知係咪記憶已模糊, 餐廳外賣部好似裝修過, 香腸機亦已經消失, 我以前只係買開單腸, 而家好多人都會要雙腸啦, 但冇變的係佢的熱狗醬依舊咁好味, 酸酸甜甜, 而且佢仲行緊餐券制, 真係好有趣架 ~

食飽就係開始活動 – "自由行" 啦 !! 我地先去立法會 & HSBC 總行, 之後沿皇后大道中經雪廠街, 見到都爹利街的煤氣路燈, 仲有外國記者會呢個咁英式的 Logo 同埋藝穗會. 轉上雲咸街, 我地的目的地其實係中環警署同域多利監獄. 自從警署 Close down 左之後, 我一直都想去參觀架啦, 但一直都冇番 HK, 咁o岩睇 Magazine 見到佢係呢度搞左一個同深圳合作的 Exhibition 叫 "再織城市 – Refabricating City", 就決定黎呢度睇睇, 呢個 visit 唔單止可以睇古蹟, Exhibition 的內容亦相當吸引, 影相影過不停, 係度玩左大半日都似未行晒咁, 只係有點走馬看花的感覺, 有時間絕對值得再來一次架 ! 由於相太多, 未有時間整理, 就唔放上黎住啦 ~