2 FEBRUARY 2014(SUN)

離開左林村之後，我地向流浮山出發，準備我地下一個活動，就係去摘士多啤梨啦~

其實依個羅氏士多啤梨場，我地上年都有嚟玩過，原本都打算試吓去其他場。不過上網睇啲朋友仔介紹，佢地話今年依個場嘅士多啤梨又大又紅，所以我地最後決定都係嚟返依個場摘啦！

除左士多啤梨之外，原來依度都有蘿蔔摘，不過同士多啤梨一樣都要$60一磅，所以我地都唔敢摘，扮吓嘢影吓相就當摘左啦~

好啦...我地開始摘士多啤梨啦，睇吓個小小豬幾興奮~

上年小小豬都有摘過士多啤梨，但就唔多識，只係負責拎住個小籃跟住我地行。不過今年唔同晒，教左小小豬一次要摘啲又紅又大嘅士多啤梨之後，就見佢負責摘十粒(因為怕小小豬亂摘，所以限一限佢數量，等佢慢慢摘)。

由於小小豬只可以摘十粒，所以開頭都唔係太敢摘，所以跟住小豬媽一齊，睇吓個情況先~

睇左小豬媽摘幾次，小小豬已經有晒信心，所以就開始著手摘士多啤梨啦~

摘一粒又一粒，周圍行吓睇吓邊粒靚先~

好專心呀~

摘到粒靚士多啤梨幾開心~

當然十粒又點足夠我地咁多人食呀？其餘嗰啲就交由小豬媽同嘉汶表姊佢地負責啦~

我地加加埋埋都摘左大幾兩磅，小小豬嗰幾粒就即場洗左嚟食，其他嗰啲就留嚟作今日嘅飯後甜品。

唔知係唔係新鮮摘，所以真係好甜，又有好香士多啤梨味，轉眼就食晒。所以話...雖然係比街市買嗰啲係貴啲，不過可以自己摘又好味，所以都值得呀~

我地都大大話話係度摘左成個幾鐘士多啤梨，真係快幾不知時日過！

開心過後我地又向下一個目的地出發啦！