又到星期日, 唔使飲茶, 當然就要出動搵嘢食啦, 近來晚晚都會睇小儀同金剛既"街坊廚神", 啱啱睇正一集介紹九龍城, heehee, 不如就去九龍城食泰國菜啦!!!

餐廳環境一般, 好街坊鋪既格局, 檯上有啲公雞細碗仔, 原來係啲泰式調味料!!全部都係辣辣, 啱晒我!!

今次就去呢間昌發泰國炒麵屋啦, 係openrice度九龍城區既泰國菜, 佢係排第二位架!

二個人就叫咗, 冬蔭功湯, 遊船河, 海南雞飯, 炸蝦餅.

遊船河($23) 呢個名好正, 咁其實遊船河呢咩東東呢, 咪就係雜錦湯河, 內裡有豬膶,肉片,豬肉丸(呢個肉丸好正), 配上濃濃既湯底. 可能自己係一個鐘意食粉麵既人, 所以覺得好食呀!!

而個海南雞飯($30)都唔錯, 雞好滑而啲飯有淡淡既雞油香味, 唔肥膩, 唔似有啲鋪頭啲飯咁油.

個炸蝦餅($48)好味呀, 件件都大大舊, 又彈牙, 正呀!!!平時食開啲蝦餅, 好多時同朋友食飯都係每人1-2件, wakaka, 今次一個人都食咗4件, 瘋狂勁食呀!!

個冬蔭功($45)湯係正常質素, 沒有太大驚喜 但就越飲越辣呢!

講真雖然呢間餐廳無咩裝修, 但係咁既價錢, 真係好抵食, 真係一個唔錯既食lunch地方. 下次再去一定要食多次個 炸蝦餅先得!!!