汪汪～汪汪～汪汪汪～～～～～～

拿, 我並唔係一隻狗, 亦都唔係走去食狗糧！

話說上次食完餐平平嘅韓國野[漢城]後, 係就真係勁平, 但身為一個月巴仔, 我又點會夠飽呢?

所以一行人就諗住去食糖水, 點知行下行下行到去佳佳糖水, 見到門口堆人仲多過放工時嘅金鐘站

咁就擰轉個頭一望, 咦？！十八座狗仔粉？聽個名就知係地道特式風味野

平時最鐘意去大排檔、茶仔同掃街嘅我就緊係要即刻deal deal 佢睇下係咪good deal 啦！

話說呢間十八座狗仔粉真係舖仔細細 (嚴格黎講其實間舖只係得個廚房, 要坐低食就全部都係坐街邊的, 唔介意先好呀 !)

而且人流都勁多, 外賣嘅長期keep住都有十個八個人係度等, 而即使坐街邊, 都總係有幾條友企係度要等位

等左大概十分鐘, 終於有張吉台坐得, 唔駛諗, 即整個細狗先！ (佢嘅狗仔粉有分大同細, 大好似$29, 細就$19, 唔多記得了)

而同行朋友就叫左個辣魚蛋, 我都再加多個豬腸拼豬肚

由於地方淺窄加上心急為食, 所以都冇乜點影到相就即刻起筷喇

當然, 作為主角嘅狗仔粉就點都要有返張相嘅

下圖: 理想與現實的分別

講返味道, 我覺得係OK, 但係咪好食到會心思思掛住同埋值得等太耐黎食呢? 咁就有所保留喇！

反而佢張相上面，紅色果Ｄ辣菜脯，我地都有試少少

一放入口，即刻.........媽聲四起！

放心，我唔係係度講粗口，而係想話同行人都爆出一句：「媽，好辣呀！」

而且腦海中仲彷彿出現一句：「怕辣就食原味啦」

不過認真Ｄ辣菜脯真係好食同惹味的

落左碗粉度真係即刻聲價十倍

(佢果度係有唔辣嘅菜脯, 但味道對比上黎就麻麻地了)

後話：

係我地差唔多食晒碗粉之時，Ｄ辣魚蛋先黎到，味道冇乜特別，辣就好夠辣

我嘅評語係：係街邊求其搵檔篤魚蛋都得，可以唔駛係度食

同時，我碗豬腸拼豬肚呢？雖然得幾張台，但其實張張台都有極嚴重嘅漏單同追單情況

由我等位到埋單果刻，都係得一位姨姨係度傳菜，落單，執台抹台

雖然超級極嚴重漏單，但我都理解同體諒 (最後我碗豬腸拼豬肚都係無黎到, 而我地都埋單走了)

人地一個女人做到一頭煙, 眼見好多人都算忍讓, 即使漏單都無大爆發,

但亦有小部份人會俾面色同大喝個呀姐

我會覺得....見到咁多人, 又得一個樓面, 而且個格局分明係咁上下頹, 有D野就互相體諒下啦！

雖然我都覺間舖嘅人手係有問題，廚房細細但竟然塞左４個人係度

但樓面就得一個呀姐，咁理論上廚房係咪應該可以好快起到菜同跟到Ｄ單？

事實卻係得個呀姐兩頭騰，而廚房又甩單又冇貨交喎！咁不如廚房果度分多個人出黎幫個呀姐受下靶啦 :P

結論：我覺得呢間狗仔粉一試係無妨, 但最好睇返唔好咁多人嘅時候先去試

又長篇大論廢up完一論, 如果你有睇到呢度, 小弟感激你嘅支持！　:)