甫入到餐廳，皮椅、雲石餐枱，以黑、深啡為主色系，簡約夠酷，空間感足。此外，感覺都唔算細，點知頭尾兩側仲有3個貴賓廂房，原來大廳賣串燒，而幾個房就主打私房菜，食乜都有商有量，又中又西都得，絕對創意先行，當然叫番串燒都可以啦，絕對靈活非常。

以黑、深啡為主色系，簡約夠酷。 

 貴賓廂房 

貴賓廂房

細看點菜紙，又真喺選擇多多。原來，串燒以外，仲有啲小食類、炸物類、小炒類；至於串燒，分為燒海鮮、燒蔬菜、烤肉幾大類別；而較特別則有一組名為「香香五寶」嘅特別系列，以及「真空低溫烹調法」嘅烤肉。店家註明所有燒烤均採用喜瑪拉雅山岩鹽調製，可見有誠意之餘，亦視為另一亮點。

食串燒唔止熱氣，亦較易口渴，所以飲品自不然唔少得。香香燒會收番$10茶水費，不過如果有點嘢飲就自動免收啦。汽水、啤酒當然必定有供應，仲有唔少日本清酒添，但係「香香特飲」第一眼就瞄上其中嘅「香香杞子桂圓特飲」，一向都鍾意龍眼朕味，加上個特飲頗養生，所以就成為小弟不二之選，自家製嘅特飲內有杞子、龍眼、海底椰、紅棗，甚足料，入口少甜，滋潤解渴，更啱秋冬季。而其他朋友所揀嘅柚子梳打 / 巨峰提子梳打，均以韓國柚子蜜或日本巨峰提子糖漿溝梳打水，據講味道都唔錯，但都喺覺得天然嘅杞子桂圓特飲正啲。

 香香杞子桂圓特飲（左）、巨峰提子梳打（右）

今晚嘅食物，店主已為我哋安排好晒，所以省卻諗乜食乜嘅麻煩，嘩！似乎今晚都幾豐富，一於快快去片，開始串燒之旅。

火雞牛舌沙律 $??
小食類中有一項牛舌沙律，賣$32，而依個加強版，多加入火雞肉絲，有啲襯番個聖誕節，不過試菜時未知定價如何？據解釋牛舌幾過炆煮，怪不得挺入味，而火雞絲亦無想像中咁嚡，配以沙律菜、紫洋蔥、車厘茄，拌黑醋汁，作為一道前菜，酸香醒胃。

麻醬凍豆腐 $26

第二道前菜，亦喺小食類之一，糝滿木魚絲嘅凍豆腐，睇落份量大大有睇頭。由於麻醬喺自家製，做得少甜，而味道清香，不過，豆腐嘅質感唔算好滑，但冰涼透心。如果作為食串燒中段一個間場，藉凍豆腐等大家涼快一下，可能效果更好。

刺身拼盤（售價待定）

喺老細嘅最新搞作，既然賣唔少日式串燒，就試試賣埋刺身反應又如何。 雖然依個刺身拼盤喺「兼營」，但都做得有板有眼，3刺身款式包括：油甘魚、南非粉紅蝦、帶子；油甘質素個人覺得比較一般，雖然厚切，但鮮味及魚脂未見突出；反而粉紅蝦果然不俗，入口有肉地又爽口；而最滿意就應該數到啲帶子，既大且嫩，一咬軟滑無比。至於抵唔抵食，還要睇睇將來價位定幾多。此外，南非粉紅蝦刺身亦有散叫，分別為$48 / 2隻及$126 / 6隻兩個份量。

味噌雜菇煮蜆 $88

以麵豉、昆布煮出嘅湯底，較傳統嘅清淡和風口味，湯內除咗蜆隻，仲有粉絲、金菇及雞脾菇，雖然蜆隻唔大，但還算清甜。

明顯就喺西式做法，加入咗檸檬，令個白酒煮蜆多份幽香清新，比起味噌做法，亦相對更突出，無怪乎放晌「香香五寶」之列，作為店主嘅特別推介！

老火例湯（免費）

晌香香燒有個奇趣現象，就喺有免費例湯送，雖然有啲怪怪嘅感覺，不過感受到老細個誠意。佢話知道大家打工仔事務忙，佢本人亦好喜歡飲湯，有碗湯水對身體好緊要，所以佢話唔幫襯上嚟就咁飲碗老火例湯都得，絕對唔收錢，雖然佢講得好認真，不過相信真喺上嚟「淨飲」嘅人應該無乜。今晚個老火例湯喺無味精添加嘅三色蘿蔔湯，主要以青蘿蔔、紅蘿蔔、白蘿蔔煲成，又唔差喎！

跟住會食一啲炸物、串燒……等等，所以店方都早已為大家預備咗幾款醬汁，包括：醬油、泰式香草汁、辣椒乾及芝麻醬，分別用作蘸點唔同食材，當然，亦可隨個人喜好。

雜菜八味天婦羅 $88

何謂「八味」，包括辣尖椒、草菇、茄子、蕃薯、金針菇、冬菇、秀珍菇及火龍果，中間一紮炸麵條做裝飾幾有趣。粉漿蠻薄，入口不膩，而且估唔到火龍果天婦羅又夾到喎，不過略嫌菇類太多，若加入一兩款其他蔬菜，如南瓜，感覺會更好。

試完個天婦羅，另一個炸物類喺椒鹽炸BB海魚，墊底有炸米粉，唔知改用炸菠菜麵會唔會有種小黃花魚晌度碧波暢泳嘅感覺呢！每尾小黃花魚大概手掌般大細，酥炸後原條入口連骨食，感覺皮脆骨酥，大可作為佐酒小食哩。

穀飼他他牛肉 $128

前文分享過屬於「香香五寶」嘅南非粉紅蝦刺身及檸檬白酒煮蜆，再嚟又喺「香香五寶」之一嘅穀飼他他牛肉，採用咗安格斯牛肋骨，肉味不俗，輕灸之後再薄切，表面仍略帶粉紅，出嚟嘅效果都夠軟腍，混和自家製醬汁、乾蔥蓉，再糝上芝麻，一道唔錯嘅冷盤。

本身條台灣腸喺蒜味，所以拌生蒜片有點多此一舉。口感其實有啲啲似臘腸咁，腸衣有種煙韌感，而味道方面甜得嚟覺得有少許偏甜，變得香腸嘅蒜味唔突出。

伊比利亞黑豚肉眼扒 $108

以西班牙伊比利亞黑豚嚟做串燒，都算夠晒矜貴，選取肉眼位切以細件，只簡單以岩鹽及黑椒調味，自然己令人有所期待。再者，個肉眼另一亮點，採用「真空低溫烹調法」，即喺將食材先放入真空膠袋中以低溫長時間嘅方式煮熟，令肉汁完好保存，然後再以高溫火烤爐「速燒」做出焦香效果。不過，未知是否肉眼太薄，或串燒燒過籠，肉質稍乾，未及預期，個人覺得依個烹調法較適合厚切嘅肉類，咁樣會更容易保留肉汁。

燒蒙古羊肉串 $29/串

據介紹，羊肉串跟足蒙古方法，以孜然粉去醃製，再加上岩鹽調味，黑漆漆嘅羊肉串其實味道唔錯，很羶香，唔太霸道，孜然粉香味突出，而肉質都挺軟腍，不過，弊在下鹽應該重手咗，以致出現過鹹情況，希望都喺個別例子。

燒蒜蓉茄子 $39/條

原條厚身茄子，開半後搽上牛油，再加埋生、熟蒜及醬油烤焗，入口茄子似乎未燒得透，茄子心感覺有點點生硬，未夠軟腍，不過，味道都仲可以嘅！

一口燒雞翼 $26/2隻

店主夠膽一句話啲燒雞翼唔脆唔收錢，嗰份自信絕對唔喺靠吹。一客有兩件雞翼，每隻雞翼又經過「剪裁」，做到一口一啖，方便易食；而脆唔脆嘅問題，真喺無得呃，亦好認同店主嘅自信，果然香脆非常，值得推介。

桑拿BB海蝦 $148

「桑拿」一詞好特別，好想知佢咩葫蘆賣咩葯？海蝦採用手指尾大小嘅BB呎碼，目的細嫩外，仲同個烹調法有關，太大隻焗完個「桑拿」可能熟唔透。海蝦挑腸後先以5種酒醉暈佢哋，包括花彫、雙蒸、玫瑰露、清酒及威士忌，之後，燒熱一兜火山石，將海蝦放入火山石之中，靠其熱力及所散發嘅蒸汽好似「焗桑拿」咁焗熟佢，一般會做到9乘熟，所以蝦肉幾鮮嫩，又帶有酒香，蘸點綠色嘅泰式香草汁幾襯，不愧被列為「香香五寶」之一，值得一試！

整體服務唔錯，適時換碟，又主動介紹食物嘅特色，環境亦讓人感到舒服唔侷促，部份菜式頗有心思，不過，可惜有幾道菜水準稍為回落，否則絕對值得俾個笑佢，但相信店子有能力做得更好。

個人評分
味道：7/10
環境：8/10
服務：8/10
抵食：7/10
平均每人消費：HK$0（試食邀請）

餐廳資料：

香香燒 Pop Bar & Grill
尖沙咀山林道17至19號山林中心3樓
2302 0943