環境依然日本味濃，唔單因為裝潢極重和風味，因為眼見耳聽餐廳內大部份都喺日本人，只有少量港人食客，所以，真喺有幾分置身晌日本嘅感覺。就連侍應跟經理都一口流利日語，仲以為佢哋喺日本人，幾擔心唔知點溝通呀！一入門口右邊除有一列壽司吧位之外，亦有多張2或4人枱，最尾尾仲有個小個室；相反，入門口左邊，除4或6人卡位外，仲有3個大塌塌米廂房，兩者私隱度都相對高啲，門前已預備好拖鞋，入內需要除鞋，而每間房大概容納到6個人左右，最特別喺3間房可打通晒，可容納廿多人，搞個沖繩小派對氣氛定必熱鬧！由於環境雅致，燈光又柔和，令人輕易放鬆，更能好好把酒談歡，好好享受美食。

 入門口右邊

 對正入門口嘅酒架

 入門口左邊

塌塌米廂房

今次再嚟就無再做一夜干，據經理講，依家八吉將重點再加重放晌魚鮮之上。其實上次嚟都見佢有唔少新鮮捕釣嘅日本魚鮮，但今次似乎種類仲要多，而所有魚鮮就放晌對正門口個冰櫃之上，插上牌仔有啲咩魚獲，又標明價錢，有平有貴，真喺幾搶眼。當安座之後，經理亦會捧上整籃魚鮮逐一介紹，有咩特點，可以點煮……，大可按自己預算揀番條一試。依家仲貼心多啲，就喺一啲較大條嘅魚，可以半條半條咁點，如果想試嘅魚較貴，咁就可以點半條啦，彈性大咗，間接點嘅人多咗，魚嘅流量就更快，質素得以保持得更好！

明太子雜菇 $20

之前都知道要收「餐前小碟」費，不過依家做法好似唔同咗，無再拎一盤嚟任揀，而喺指定一款，但定價平咗喎，嗰時收$30，依家$20就可以嘞。一小碟的的骰骰，滑滑爽爽嘅菇仔，帶卜卜脆感嘅明太子，依個組合幾得意，味道鹹鹹鮮鮮咁。

翻翻餐牌，真喺有幾多選擇，類別分為刺身、壽司、前菜、沙律、燒物、揚物、煮炒蒸料理、飯麵、鍋物、甜品、套餐、日本酒、果汁、汽水。此外，仲有幾個特色餐牌，包括沖繩雞、沖繩牛、特色小食，一時間花多眼亂唔易揀。

講開餐牌上嘅酒類，確實陣容鼎盛，選擇多多，有啤酒、Chu-Hi（一種時下新興嘅果汁溝燒酎嘅雜飲）、梅酒、清酒、泡盛、燒酌……等多種。點知依家仲有個面書推廣，只要同枱有兩個客人晌官方面書專頁讚好及成為粉絲，就即可從3款指定清酒中免費獲贈180ml清酒。是日3款指定清酒就有（由左至右）山形縣麓井酒造嘅圓（純米本辛，酒精度55%）、山形縣嘅麓井（純米吟釀，酒精度50%）及福井縣嘅艷（純米大吟釀，酒精度38%），淺嚐過後，「圓」比較辛辣，「麓井」就入口較爽身，而「艷」厚身帶香味，加上酒精度相比起低，所以較易入口，以上都喺純粹個人感覺，講唔上咩見解。

 官方面書專頁

 山形縣麓井酒造嘅圓（左）、山形縣嘅麓井（中）及福井縣嘅艷（右）

火炙喉黑 $600（半條）

既然八吉主打喺新鮮捕獲嘅日本魚鮮，當然都希望唔好錯過，今晚我哋都有機會品嚐。所有魚鮮都喺取自多個日本漁市場，多喺一手時令靚魚，伊佐木、鰺、針魚、魴鮄、地鯖、喉黑、平目、木笠子……等，索價由平如針魚$200到最貴嘅喉黑、喜之次$1,200，可謂豐儉由人。做法多元化，可刺身、鹽燒、汁煮，甚至一魚幾食都得。店方為我哋安排咗半條喉黑，搽上秘製醬油再火炙，火炙後令油分更突出，入口滿口油香，因為只喺表面輕炙，肉質依然鮮味嫩滑！

沖繩雞拌水豆腐之水菜沙律 $98

聽朋友講「水菜」喺日本一種常用嚟做沙律嘅蔬菜，個樣有啲似火箭菜，不過眼前嘅沙律就似乎改用咗西式嘅沙律菜，再加上車厘茄、紫洋蔥，配以沖繩「手撕」雞肉及水豆腐粒，拌以和風芝麻醬汁，清爽好味。

汁燒沖繩雞軟骨肉餅 $72

以免治沖繩雞肉加軟骨做成肉餅，厚厚一個，一客三件，質感挺實而軟綿，略嫌雞軟骨唔明顯，但淋下濃郁汁燒醬汁，都幾惹味。

沖繩炸雞伴特製島豆腐他他醬汁 $90

有別一般乾身嘅炸雞，望落反而有啲似我哋中式嘅咕嚕肉添。沖繩雞件炸後撈上酸香醋汁，雞肉頗嫩滑，佐以豆腐加他他醬做成嘅「汁」，質感似羊奶芝士咁，軟軟散散，味道富層次。

大葉梅子雞肉卷 $65

同樣一客有3件，串起嚟加埋其他擺設賣相別緻。大葉或許唔知喺乜，不過話喺紫蘇相信好多人聽過，以雞肉捲住紫蘇葉做成雞肉卷，串燒後再點上梅子所做嘅醬，紫蘇功效多多，抗菌、驅寒……，梅子醬酸香鮮活，令雞卷味道相得益彰。

沖繩苦瓜蔥頭炒雞絲 $88

沖繩苦瓜非常之出名，色澤深綠又較多凹凸坑，味道亦較為甘甜。依道菜比較簡單，主要都喺食番幾種食材嘅原味，個人認為可作為一道下酒小菜。

試咗5款沖繩雞料理，晌主餐牌以外，我哋又點咗4款推介特色小食。雖然話小食，有啲都唔平，但甚具質素，尤其當中嘅帶子及八爪魚，真喺相當好食。

小河蝦以小竹籮呈上，頗別緻，炸得唔油膩，仲喺怕嘅，大可唧啲鮮檸汁，相信油膩感盡除，小河蝦連殼食，食落香脆甘香，伴酒佳品。

半生熟帶子 $138

與其講半生熟，小弟就覺得喺全生咁滯，但切成薄片後，撈上香草油醋，入口鮮甜清嫩，搞到墊底嘅甘筍青瓜粒都好味啲，哈哈！

涼伴蕃茄八爪魚 $128

依道涼伴小食喺小弟極力推介，賣相幾耀目，一黃一白一紅，薄薄嘅檸檬片，夾住薄切八爪魚，再夾一薄片解蕃茄，跟半生熟帶子有少少相似，加咗啲啲香草油醋，同時將三者放入口，口感、味道都有層次，冰涼鮮香，所以點可以唔推介吖！

沖繩苦瓜煎薄餅 $88

另一道沖繩苦瓜菜式，有啲似中式嘅煎薄罉，不過個煎薄餅較厚身，而且質感好粉，個人覺得好一般啫。

落到介紹主餐牌，種類、款式非常之多，前篇已講過，主餐牌分為刺身、壽司、前菜、沙律、燒物、揚物、煮炒蒸料理、飯麵、鍋物、甜品等多類別，我哋大致樣樣都要啲，希望試到大廚晌唔同範疇嘅手勢。

特選九點刺身拼盤 $598
主餐牌首頁就喺以刺身掛帥，刺身除散點之外，亦有拼盤可選，分為九品盛（$598）、六品盛（$398）、四品盛（$268），全部都會喺精選季節性刺身，可謂不時不食。所謂「特選九點刺身拼盤」（即喺九品盛）意思指拼盤當中包含9款刺身，原本喺每款3件（牡丹蝦除外，以一對對計），但由於試食關係又加上人多，所以我哋個拼盤先至會有每款4件嘅情況。

一大份刺身拼盤以日本陶瓷盆盛載，加上盆上唔同嘅擺設，配以唔同色彩嘅刺身，未食淨睇都已叫人賞心悅目啦。9款刺身包括：油甘、拖羅（左側小碗上）、加拿大海膽、日本三文魚、赤貝、北海道帶子、日本吞拿（前排左至右）、牡丹蝦（後排）、鱆紅魚（右側）。雖然因為人多關係，並唔喺每款刺身都有機會試，但所食到嘅都鮮甜味美，尤以拖羅、海膽、帶子、吞拿最得小弟歡心，鮮美度爆燈，拖羅油潤、海膽綿香、帶子鮮甜、吞拿味濃，真喺好滿足。

沖繩AGU豬肉沙律 $88
雖然之前揀咗個「沖繩雞拌水豆腐之水菜沙律」，但一碟沙律對咁多人而言又豈能盡興，所以就晌主餐牌內多點一客沙律。共有4款沙律，當中應以沖繩AGU豬肉沙律喺大家最想試嘅一款，因為AGU豬實屬沖繩名物，以味濃見稱。以沙律菜襯托，仲見到有少少水菜添，配以日式芝麻醬汁，AGU豬肉薄切，富油香，肉味確喺濃郁，不過有少少韌喺有啲美中不足。

跟住想分享嘅喺燒物，因為燒物晌主餐牌中都佔幾重比例，一共有14款之多，相對其他種類只有三數款，或六七樣，明顯有更多選擇。所以，我哋是晚都揀咗其中3款嚟試試。

仙台風味厚燒牛舌 $88

其實上次嚟八吉都試過依道菜，評價喺牛舌燒得香，又有啲焦香位，牛舌嘅獨有味道亦頗濃郁，今次再食，意見一致；而份量及伴碟漬物，都跟上次一樣。一客7件，唧啲鮮檸汁去油膩又更提味。

生海膽伴芝士脆多士 $118

用「無得頂」大概喺我想到對依件多士嘅感受，竹炭法包加上芝士烤烘後，伴上兩大瓣海膽，好似牛油咁搽落啲麵包度，入口麵包香脆，芝士配海膽，味道豐腴香濃，令人回味，絕對喺小弟誠意推介！

以明太子做成嘅香腸，所以燒過後腸內全喺魚卵，鹹香惹味，又喺另一伴酒好拍檔。

厚炸沖繩豆腐 $58

屬揚物類別，即喺炸嘢，咪睇佢一客6件，其實佢喺長形一大件，炸後先切成6小件，佐以蔥花、海鹽。外皮炸至酥脆不油，內裡卻喺軟滑豆香，簡單而考火喉嘅菜式。

北陸冰見烏冬 $75
冷烏冬以方形木盒盛載，伴以醬油、芝麻、蔥花、薑蓉，冷烏比較偏身，但入口滑溜煙韌，冰涼清爽，沾點醬油，再蘸啲芝麻、蔥花，簡單中見心思。

熱食又如何呢？賣相跟一般湯烏冬無乜兩樣，簡簡單單附上冬菇、日式魚蛋，烏冬同樣滑溜煙韌，配以清甜湯底，溫暖而窩心。

墨魚汁炒麵 $85

比起年初，加咗少少價喇，由$78升到$85，不過質素依然有水準。麵條註明喺沖繩麵，加入墨魚汁製作，所以烏卒卒，但帶光澤，有咬口又帶點鹹味。以墨魚、豚肉、韮菜同炒，餸料落得唔少，鋪滿晌炒麵上之餘，豚肉一樣用上AGU豬肉，肉味自不然濃郁富油香，真喺值得一食再食。

日本漬物拼盤 $88

晌飯麵類最底下，有一道菜叫「日本漬物拼盤」，感覺有點奇怪，又唔喺晌前菜度出現，而喺晌飯麵類度出現。待烏冬同炒麵上過之後，仍在疑惑之際，經理就送上一碟漬物拼盤，啊！佢解釋原來日本人有習慣飯後食點漬物嚟幫助消化。碟上5款漬物做得的骰精巧，有蕎頭、茄子、牛蒡、蘿蔔及蒜頭（左至右），以茄子外貌最估佢唔到，爽脆鹹酸，的確醒胃。

什錦海鮮鍋 $498

最後登場嘅主餐牌項目就喺眼前依份盛大有份量嘅雜錦海鮮鍋，砂窩之上蔬菜、海鮮鋪得滿滿，賣相十分之有睇頭。蔬菜有黃牙白、金菇、大蔥、大冬菇、豆腐等等，而海鮮則有生蠔、鮮蟹、三文魚、油甘魚、帶子、大蜆等等，食材喺咪非常之豐富，而且食落真喺頗鮮味，不過，記住啲魚類同帶子就唔好滾太耐，否則唔好食。雖則話喺2人份量，但相信5、6個人都夠食。最後個湯底都唔會嘥，因為每個鍋物都包一份烏冬或粥，絕對夠使飽肚之餘，撈勻個湯底同食，滋味暖意在心中喎。

原以為喺輪到甜品時間，點知經理再多為我哋安排一道晌餐牌都摷唔見有嘅菜式「汁煮鮑魚」，喺大廚特別炮製，熟客先識點。份量唔喺好多，但鮑魚好入味，肉質爽甜柔韌，原來喺要煮兩日先可以賣，再伴以汁煮蘿蔔及海帶，真喺食到尾都咁滿足。

沖繩黑糖雪糕 $40

甜品方面，以雪糕為（$40）主打，有是日精選、綠茶、芝麻、沖繩鹽味曲奇、沖繩紅芋、沖繩黑糖，另有一個綠茶布甸（$50）。小弟一向偏好黑糖，所以再次揀番沖繩黑糖雪糕，話晒黑糖又喺沖繩名物。黑糖味道非常之突出，香甜而原始，唔做作，口感柔滑！

如果人少少又想試多啲嘢，又或唔想諗嚟諗去，套餐絕對喺省時之選，4款一人前套餐「八吉」（$460）、「和琉」（$550）、「鍋」（$550）、「旬鮮」（$630），每個套餐已包有8-10道菜，大都喺店內揀手菜式，相對有保證，不過，溫馨提示一下，點套餐最少要兩位起計。

或許嚟食個晚餐確實唔平，但店方推出午市定食，相信甚有吸引力。因為類別選擇多，包括：新鮮魚生系列、沖繩風味、一品料理、丼飯、烏冬、蕎麥麵……等等，約$90-$130，真喺相對實惠！

個人評分
味道：9/10
環境：9/10
服務：9/10
抵食：8/10
平均每人消費：HK$0（試食邀請）

餐廳資料：
八吉 Yakichi
尖沙咀亞士厘道27號2樓
3105 8950