8度海逸酒店位處土瓜灣九龍城道，可以話喺晌土瓜灣嘅篤篤邊，對區外人位置頗隔涉，不過，小弟家住美孚，有小巴直達酒店附近，咁又變得都幾方便。見佢做緊個團購：「$88 歎【8度海逸酒店】精選高級午餐！美國生蠔2隻或選泰式柚子沙律 + 是日餐湯 + 炭燒肉眼扒或選汁燒三文魚柳 + 咖啡或茶！星期一至六適用！」第一，心諗海逸酒店依個品牌都唔太差，前後都幫襯過幾間海逸系嘅酒店，如九龍海逸君綽、嘉湖海逸、都會海逸，印象都唔錯，尤其都會海逸個自助午餐好食到仲念念不忘；第二，既為4星酒店內嘅西餐廳，水準差整都有個譜；第三，$88就有齊前菜、餐湯、主菜、啡茶，仲無話收加一，加上餐廳一向食埋環境同服務，所以有信心個團購買得過。
酒店餐廳一向主打各時段嘅自助餐，不過8度餐廳除一早一晚提供自助餐外，星期一至六都只喺做午餐精選，去到週日及公眾假期先推出假日自助午餐，相信都喺跟位置、人流關係。正因個團購星期六都可以用，所以趁星期六唔使再返工，可以同老婆嚟一齊輕輕鬆鬆嘆番吓！
由於個團購大致都定晌一定範圍嘅選擇，所以唔使花太多時間考慮食乜，反而就好奇餐廳仲有咩午餐供應，就問侍應拎咗個餐牌研究一番。套餐形式嘅有「特式午餐精選」（12:00-2:30pm），包括是日餐湯或雜菜沙律、自選主菜（4揀1，蒙古式燒春雞、燒牛扒配黑椒汁、汁燒龍脷柳及咕嚕斑球配香苗白飯）、果碟或自家製甜品、咖啡或茶，售價$128加一；而另一款較彈性、款式又多元化嘅「推廣優惠」套餐（12:00-5:00pm），一共有16款選擇，例如：漢堡、雜錦壽司、焗飯、闊條麵、三文治……等等，價錢由$68-$118，加$12有是日餐湯或啡茶，加$18有果碟或甜品，可因應個人食量再配搭，而且供應時間長，當下午茶都可以。至於散點餐牌就概略講講，包括有沙律餐湯、意粉薄餅、西式主菜、中式菜餚、東方特色、甜品，既為酒店級數，散點就唔會點便宜，好似一客餐湯索價$58-$78，西式主菜索價$168-$208，中式菜餚就$108-$128……。
「特式午餐精選」套餐餐牌
「推廣優惠」套餐餐牌
散點餐牌
今次個「精選高級午餐」標示原價$198，現在半價都唔使就食到，當然性格比極高。再者，餐廳環境和諧雅致，深啡木牆牆身，啡色雲石枱面，配以杏色皮梳化櫈，天花掛上有點似松果嘅鋼片吊燈，稍稍留意嘅話會發覺部份牆身或柱體稍微傾斜，而最顯而易見就喺枱上打側嘅水杯，都幾有趣。而今午人客又唔多，感覺安逸寧靜，令人更覺休閒。服務一環，可圈可點，可能正因午市客少，對侍應嘅負擔少，所以有點似作為培訓員工嘅時段，睇見好幾位侍應都非常生手，很多對菜式嘅問題都答不上，又或其動作都顯得有點緊張，不過，笑容、禮貌都無咩點失分。
![bowl]() 泰式柚子沙律
前菜2揀1，唔喺沙律就喺生蠔，我哋有兩個配額當然各樣一款試勻佢啦。個柚子沙律賣相不俗，酒店即係酒店，賣相方面始終執到正。柚子相當清甜，汁醬酸甜清爽，再唧埋啲青檸汁落去，就更清新，面面嘅花生碎，添加一份脆粒咬口感，可惜當中嘅甜蝦就唔多爽彈喇，有啲美中不足。晌散叫餐牌都有賣依道菜，仲收成$98一客，當然份量會好唔同啦。
![bowl]() 美國生蠔
2隻生蠔絕無將貨就價，既大隻，又新鮮，以冰粒鎮住上枱，老婆對生蠔唔好，益晒我一人食晒兩隻。生蠔好飽滿，口感很滑，帶著海水嘅鹹鮮，而佐料嘅檸檬及茄汁都不缺。
![bowl]() 麵包籃及是日餐湯
以麵包籃呈上，並用餐巾包裹住，自然感覺比一般西餐廳勝一籌。麵包籃內有兩件法包、兩件餐包，兩款麵包口感各有不同，而牛油仲要用上法國總統牌，可見餐廳用料唔手緊，好軟滑，最怕雪到啲牛油「硬掘掘」。而是日餐湯喺南瓜忌廉湯，散叫要成$58一客架，個湯南瓜味頗濃郁，又夠滑身，最驚喜喺所加嘅唔喺普通麵包粒，而喺蒜蓉包粒，正。
![bowl]() 汁燒三文魚柳
魚柳菜式一向最得老婆歡心，無論中式定西式，依道汁燒三文魚柳自不然啱晒佢口味。個主菜上場，就更肯定佢哋無將貨就價，推出依個團購純粹當做宣傳，兩大件燒三文魚柳，配以日式鐵板燒汁，汁醬香濃惹味，而三文魚柳香脆嫩滑，橫切出嚟仍見肉色帶嫩紅，非常好食。下面墊有法邊豆（kenya bean，都喺從餐牌圖片先識依種豆嘅名字）及忌廉薯蓉，前者口感腍身啲，而後者做得挺滑，又帶點牛油香。
![bowl]() 炭燒肉眼扒
肉眼扒同樣有兩件，不過，件頭更大，配菜一樣喺法邊豆及忌廉薯蓉。肉眼扒配以黑椒汁，另一惹味醬汁，而扒塊雖名為炭燒，但就唔見任何炭燒坑紋，不過肉質不錯，入口軟腍，又富肉味，蘸點芥辣，肉味就更突出，真喺叫人感到好滿足。
雖然唔包甜品，亦問過有無得以優惠價嚟點甜品，回覆喺無嘅，但最後以一杯香濃馥郁新鮮即磨咖啡作結，感覺依舊開心。
依個晏晝除咗過嚟食晏，都無安排有咩特別嘢搞，所以輕鬆自在，無拘無束。餐後，都喺隨意閒逛，感受吓寫意人生！
個人評分
味道：8/10
環境：8/10
服務：7/10
抵食：9/10
平均每人消費：HK$88（團購）
餐廳資料：
8度餐廳 Café 8 Degrees
土瓜灣九龍城道199 號8度海逸酒店地下
2126 1960
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
