成日都覺得意粉屋同必勝客都喺同一個級別，諗住都唔會太多人，點知一樣滿，好彩喺唔喺都訂咗位先，高峰時都見門外有三幾批人晌度等位，但望落多數都喺遊客。成間餐廳以紅、白、黑配襯，牆身及天花有好多有趣繪畫，以梳化卡位最好坐，其他都喺木椅加軟墊。晌依間意粉屋我覺得有樣嘢都算喺奇景，就喺翻枱轉數快而密，好似小弟坐咗成晚近兩個半鐘，隔離張枱已翻咗3轉，原因主要都喺遊客嚟，啲人好似食快餐咁，坐低、落單、上菜、食完、走人，唔喺個環境，真喺以為自己去咗隔離鋪大家樂呀！

多款套餐

夏日甜蜜套餐

蘇格蘭煙三文魚、帶子、法式洋蔥忌廉湯（非單點菜式）
湯色較一般忌廉湯深而帶淺啡色，主因加入咗法式洋蔥湯嘅概念，味道多份洋蔥香，雖然唔喺好重，但已算唔錯，而質感估唔到頗為滑溜。而煙三文魚及帶子都算得上足料，尤其煙三文魚都幾大舊，帶子又有好幾粒。但喺最奇怪喺小弟碗湯就夠晒熱，友人嗰碗只喺微暖，實在諗唔明箇中原因，總之向店員反映，最終都即時換過一碗滾熱辣嘅嚟。

第一道主菜二選一：「手造新鮮蕃茄闊條麵配龍蝦」或「星級醬燒珍寶豬肋骨（半份）配洋蔥圈及美國瘋薯條」，我哋揀個闊條麵，都喺因為「手造新鮮」4字。其實手造新鮮意大利麵推出咗兩款，除蕃茄闊條麵之外，另一個叫「手造新鮮墨魚汁闊條麵配香煎帶子（甜椒汁）」，兩者單價賣到$148一客。」

第二道主菜則三選一，有「夏威夷Pop Up Pizza」（$128）、「意式焗豬扒飯」（$88）及「脆巴馬火腿、芥末芝麻雞沙律」（$98），諗住個薄餅喺最貴，應該好嘢嚟啩，所以揀咗佢。

個薄餅果然做得的確薄，一咬真喺pop pop聲，而茄汁、芝士都非常夠晒份量，只喺略嫌主材料較普通，啲加拿大煙肉入口似一般火腿咁。再次奇怪就喺連個薄餅送到上枱時都喺唔熱，理應新鮮焗製，應該好熱辣先啱。

 甜品選項

套餐多加$20可以加配6款指定自家製甜品

法式焗檸檬班戟‧雪糕 $38
散叫價要$38，依家跟餐就包埋。首先個法式班戟幾重牛油香，而檸檬汁非常清新清香，甜度啱啱好，而雪糕可揀士多啤梨、朱古力、雲呢嗱，班戟配合埋士多啤梨雪糕，蘸滿鮮檸檬汁，我就好滿意個味道嘞！

散叫價都喺賣$38，但依家套餐優惠多$20就可以食到，真划算。賣相幾別緻，一件君度橙酒朱古力餅搭上兩個馬卡龍，前者奧利奧餅底，加橙酒朱古力慕絲，而加上面層朱古力軟漿，整體朱古力味頗濃郁，橙味亦都非常突出，反而酒香欠奉。至於啲馬卡龍，感覺流流地，一紅一綠兩小件馬卡龍，睇樣似模似樣，一入口就現晒影，口感好實淨，一啲煙韌感都無，仲要無餡嘅，完全唔得。

店家標明採用illy優質咖啡豆，即磨即沖，應該甚有保證。杯咖啡賣相幾大體，味道好好，鮮奶咖啡香滑之餘，跟朱古力味道都幾平衡，唔會太過側重一邊。不過杯底墊咗張花餅紙，個人覺得多此一舉，依家人人講環保，可以唔使啦。

依杯黑鑽石，笑謂買一送一，點解？餐牌註明杯凍飲有紅豆同涼粉，第一杯嚟嘅時候，有紅豆，但涼粉一條都撈唔到，而且杯面嘅忌廉溶溶哋，所以向店員反應再換過另一杯。第二杯就對板好多，至少紅豆、涼粉有齊，杯面忌廉都唧得似番個樣，不過，老友話個綠茶味啖口，甜度太弱，涼粉跟綠茶覺得唔太夾。

  第一杯抹茶黑鑽石

  第二杯抹茶黑鑽石

服務幾好，好似有啲嘢我哋要求更換，好爽快即做，不過，可能人多，人客流量快，出菜比預期慢。雖然啲嘢食認真麻麻，但我哋就傾得投契開心！今次總分有啲難俾，介乎OK與喊之間，思前想後最後落手俾個喊，原因覺得出菜唔熱真喺一個大問題，此外，兩個主菜都喺重點推廣，但質素一般，絕對唔多成功嘅表現，再者，個抹茶黑鑽石第一次嚟竟然無加涼粉，亦喺一個挺大過失，雖則兩個甜品好食（唔計個馬卡龍），杯咖啡亦好飲，但仍太多不足之處喇！

個人評分

味道：5/10
環境：8/10
服務：8/10
抵食：6/10
平均每人消費：HK$190

餐廳資料：
意粉屋 Spaghetti House
尖沙咀梳士巴利道3號星光行星光廣場地庫23B號舖
2377 2703