一向都好少出旺角，人多車多，若非有需要都好少出依區，講都有啲出奇，連跟朋友嘅飯局都甚少揀旺角。今晚出嚟辦點私人事，就順道晌度搵搵食，由於「丼丼屋食堂」以傳統日式丼飯專門店自居，以質優嘅秋田小町米炮製，又喺美心集團旗下特約品牌食肆，所以對其出品頗感吸引。
丼丼屋為樓上鋪，窄窄嘅樓梯堆滿幾多人，仲諗住打退堂鼓，不過拎咗「飛仔」之後原來都只喺輪幾張枱，而且幫襯丼丼屋嘅客快上快落，食完就走，都只喺等咗10分鐘左右，樓梯咁多人有啲喺等對面鋪同集團嘅元氣啫。
踏進店內，感覺有啲古怪，左邊對住半開放式廚房，廚房前喺一列吧位，再對出就喺一堆二人 / 四人散枱；而另一邊有屏風間住，都喺啲二人 / 四人枱；奇怪在中間空咗出嚟？一張枱都無，以香港地盡其用大原則之下，擺得一張得一張嘛！裝修方面，以樸實無華嘅日本食堂格局為概念，所以，無乜太多多餘裝飾。整體嚟講，空間感足，感覺暖和！
將餐牌一字長形咁打開，有咩食一目了然。面頁喺共20款嘅丼物（蓋澆飯，我就成日打趣叫和風碟頭飯），全部單點，+$15可升級為套餐，多配小食、沙律及麵豉湯）；底頁就有咖喱、稻庭烏冬、吉列、燒物、前菜小食、飲品、甜品等各類別，而咖喱、稻庭烏冬同樣+$15可升級為套餐，但吉列、燒物則要+$18先可以升級，因為升級內容唔同，喺有漬物、小食、白飯及麵豉湯。雖然嚟到「丼丼屋」，但我哋就無叫丼物，老婆想食得濕潤啲，就先點一個稻庭烏冬，而小弟就想食啲香口嘢，就朝吉列類進發，並且加錢轉套餐。
餐牌面頁，20款丼物。
餐牌底頁，有咖喱、稻庭烏冬、吉列、燒物……等等。
咖喱、稻庭烏冬+$15可升級為套餐
吉列、燒物則要+$18先可以升級
![bowl]() 牛肉烏冬 $58
稻庭烏冬總共有6款：腐皮、咖喱牛肉、咖喱吉列豬扒、和風冷烏冬、胡麻冷烏冬及牛肉烏冬。揀咗牛肉烏冬，主因都喺列明店長推介，所以大膽一試。牛肉烏冬呈上枱時，半生熟嘅牛肉有啲似越式生牛河，以湯溫浸熟，部分牛肉仍見到鮮嫩嘅粉紅色，而且牛肉有別一般肥牛，油脂唔太多，更啱老婆口味，入口腍滑有肉香，兼且份量唔少。據介紹，烏冬以地道手法打製，用上上等小麥粉製作，烏冬食起嚟又真喺幾滑溜，又帶點柔韌，配料有金菇碎、蔥、大蔥，加埋清甜湯底襯托，認真唔錯！
![bowl]() 吉列廣島蠔，豬柳 $80
吉列類有7款，都不外乎豬扒、雞扒、炸蝦之類，見佢有一款廣島蠔仲要拼豬柳，又喺推介嚟，所以好感興趣。一客有兩件吉列廣島蠔及兩件吉列豬柳，配以大量椰菜絲，廣島蠔都叫幾大隻，炸後都唔太縮水，蠔味不俗，可惜油咗啲，唧啲檸汁感覺會好番啲；反而豬柳炸得唔錯，外層好鬆脆，丹麥豬柳果然鬆化。枱上已備有豬扒醬、柚子醋、七味粉、醬油，又附加一小碗芝麻，以研碎後加豬扒醬蘸豬柳食用，味道當然得以提升。柚子醋本身添加落椰菜絲度，但豬柳配柚子醋又OK喎。跟爽口嘅椰菜絲同食，又出到唔同嘅效果，總之食法隨你意啦！
左起：豬扒醬、柚子醋、七味粉、醬油
吉列廣島蠔
吉列豬柳
![bowl]() 日本新潟縣秋田小町米
枱上有張小簡介介紹店家所選用嘅米粒：「我們嚴選日本新潟縣的秋田小町米，以尖端RO System將水過濾，打散水的份子，當中的純水完全浸透飯中，令食物的原味真味得以保留，讓你品嚐正宗丼飯滋味。」RO System有個中文名，叫「逆浸透膜過濾系統」，不過聽咗都唔多會明，最重要出嚟效果喺點。飯粒飽滿有光澤，又有飯香，口感黏黏糯，又不失軟綿，相信淨喺醬油撈飯都可以搞掂一碗呀！
漬物、小食、麵豉湯
依個升級配套分別漬物喺醃蘿蔔，小食喺牛蒡蘿蔔絲，仲有一小碗麵豉湯。雖然醃蘿蔔毫不起眼，但食嚟爽脆，越食越開胃；而牛蒡蘿蔔絲添加咗白芝麻，又帶丁點麻油香，伴飯食其實都唔錯；只喺麵豉湯味道平淡啲，但湯中有幾粒油揚豆腐，算喺小小增值，屬平穩之作吧！
烏冬同吉列都唔錯，對依餐都滿意，略嫌服務一般，好似椰菜絲可免費添加，我哋都有要求添加一次，不過等咗好耐都未見有，張單都有打住，不過見食晒啲嘢都未嚟，結果就算數。此外，又無乜點解釋枱上醬汁食法。由於甜品都喺啲新地類，老婆唔多鍾意嘅千層蛋糕，以及唔太特別嘅朱古力軟餅班尼士，所以，今餐就此作結。下場就喺去咗附近嘅石磨坊食糖水！
個人評分
味道：8/10
環境：8/10
服務：6/10
抵食：8/10
平均每人消費：HK$86
餐廳資料：
丼丼屋食堂 Dondonya Shokudo
旺角花園街3-5號鴻威大厦1樓
2783 0789
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
