由於小店定位清晰，開晌平民眾多嘅深水埗區，絕對合適，因為依區人口多，而鋪租又未至幾個旺區咁「乸脷」。再者，小店位處欽州街及福榮街交界，食正角落位，對面有高登同黃金電腦中心，行落少少又有長沙灣政府合署及西九龍中心，附近更有多所學校添，人流絕無問題。

鋪面側邊，印有一個有關「豆花妹」同「泡菜仔」開店的故事，雖然無考究其真偽，不過，隱若都道出老闆之一阿超嘅開鋪始末，但最後一句「故事待續……」，唔知會唁會就喺講到兩位年輕老闆參加電視節目呢？

現時店鋪主要以3款米線應戰：豆花米線（$15）、喜樂牛肉米線（$17）、牛尾米線（$20），再輔以小食（猶如車仔餸形式）作配搭（每款$5）。鋪仔細細，都喺以外賣同立食為主。

小食方面不得不讚一讚兩位老闆有賣點、有頭腦，除了已計劃好創作出108款小食（暫時只會詳列其中54款）之外，小食都唔喺咩豬皮魚蛋、雞尖蘿蔔咁一般大路。雖然試食當日未有機會一試，但單睇名字，例如：話梅辣筍片、腐乳雞翼、韓燒墨魚圈、地獄肉丸、香檳蕃茄仔……等等，已具有一定吸引力；但聰明在於每星期只會推出其中4款，除吸引多心客人想多試嘅心態之外，又可加快客人點餸速度，以及，亦可減少食材損耗、存貨屯積。聽老闆講，待店鋪運作上軌道，小食更會以小菜形式登場，到時街坊街里大打買外賣當加餸！

豆花米線 $15

喺小店主打嘅米線，亦喺最基本嘅口味，碗內餡料有豆腐花、豬肉碎、豬皮粒、豆腐乾、花生、醃菜、蔥花、芫茜。因為喺撈米線，所以，食法喺要先撈勻，等各項配料跟米線融和先食。此外，為方便唔同人士，可以揀唔辣、少辣或中辣，小弟所試嘅喺少辣，辣度同花椒嘅辣屬溫和，唔會食到你冒汗，但又有點辣勁嘅刺激。配合上多樣化嘅配料，口感豐富，醬汁惹味，米線又夠晒滑溜，不過，既為豆花撈米線，建議加多少少豆腐花，令主題更突出。

因為試食當日，店主話個牛肉做得未夠理想，所以，唔好意思俾我哋試，實在有啲可惜，因為，聽佢講，個喜樂牛肉喺加咗七喜同可樂去煮，味道酸酸甜甜，聽起嚟可以喺幾有趣嘅出品。

牛尾米線 $20
可以視為跨界嘅混和菜式，牛尾喺以西式煮法處理，極有紅酒燴牛尾嘅影子，再撈入米線當中。不過，實際開售嘅牛尾米線會只有兩件牛尾，沒有我哋眼前碗咁多。牛尾燴得入味鬆化，肉質非常軟腍。因為個汁做得香濃，所以，連配菜嘅西芹同紅蘿蔔都變得好食。

如果單靠平，質素唔得，真喺生意唔長久，以前晌灣仔有間雲南石林米線都有賣過豆花米線，最終結業收場。不過，經過今日嘅試食，雖然只喺一小碗米線，但小弟絕唔會睇小佢兩位嘅野心。因為，唔單所試嘅兩款米線有水準，仲有，佢哋對食物質素嘅堅持，以及過百款小食嘅創意，值得褒獎，絕對有成功嘅條件。繼續支持兩位熱血好兄弟，支持不斷努力嘅小店！

個人評分
味道：8/10
環境：6/10
服務：7/10
抵食：8/10
平均每人消費：HK$0（試食邀請）

餐廳資料：
豆花妹撈米線
深水埗欽州街57-63號冠奇大廈4號地鋪
5114 4077