抱歉,發生點錯誤。
重新載入
多彩皇宮 Wonder Land Seafood Restaurant:多姿多采團年飯
山區麵包王
2014-01-30
1588
0
分享
收藏
之前幾餐同一大班親戚食嘅節日飯都喺晌深水埗德興,貪佢嘅全包宴一圍12人千七蚊都唔到,本來今年嘅團年飯都打算再去德興,不過,團年飯就做得無咁平,較低嘅一款都要成$2,881。講質素,德興只屬於中中等等,所以,團年飯繼上年之後,今年再次翻兜多彩皇宮,一來份量比德興更多更足,二來質素上亦比德興高少少。
團年套餐主要有兩款:團聚宴($2,630 / 圍)及鴻運宴($3,180 / 圍),兩者都喺全包宴,即喺包茶芥12位、酸菜、加一服務費,仲有每席啤酒汽水共12罐。最終我哋揀咗貴嗰款,因為有龍蝦,一年一次,貴啲都無所謂。個鴻運宴包8道菜、一個糯米飯、糖水、果盤,特別鍾意揀全包宴,價錢好預算啲。不過,今年遲咗先定實地點,要食第二輪8:00pm。
bowl上湯波士頓龍蝦(2隻,伊麵底)
睇佢成大碟,碟面滿滿龍蝦就知無呃秤,足兩大隻啦,而且睇埋隻鉗,大得無比,蝦身亦好厚肉。大廚處理得隻龍蝦好好,以上湯燴熟,鮮爽入味兼且啖啖肉,而底下伊麵亦份量超多,又無煮得太散太爛嘅問題。
bowl鴻運乳豬大拼盆
除乳豬件以外,個大拼盆仲有叉燒、燒鴨、油雞、海蜇拌筍菜,跟上年個鴻運燒味拼盤差唔多。幾款燒味質素唔錯,個人較鍾意燒鴨同油雞,因為前者特別油香,後者皮爽肉嫩。海蜇拌筍菜,兩者本身口感都喺爽爽哋,所以拍埋一齊都幾夾。
bowl碧綠炒花枝蚌片
碧綠用上西蘭花,無他嘅,西蘭花勝在平,又易處理,炒菜還是伴碟外觀都喺好睇。而花枝片又大又薄,口感柔韌清甜,桂花蚌則鮮甜爽脆,兩者混和,相得益彰。
bowl發財好市添大利
一道既傳統、又好意頭嘅賀年菜式,碩大嘅蠔豉配牛脷,再襯以柔嫩嘅菜苗。菜式本身唔花巧,但可見用料靚,烹煮功夫紮實。蠔豉蠔味濃郁,口感鬆化,牛脷柔韌入味,主要都喺貪其好意頭,所以,依道菜豈止意頭,實在好好食。
bowl紅燒竹笙海皇翅
一大窩翅可以分得成13、14碗,碗碗九乘幾滿,足夠份量,而且料多,尤其花膠、竹笙,又有啲蝦肉、斑塊,魚翅就少啲。而個翅湯底味道不俗,圓滑,杰度啱啱好。
bowl蠔皇海鮑片玉掌
跟之前一日晌石硤尾嘅好日子所食嘅鵝掌,真喺有少少差天共地嘅感覺。鵝掌炆得夠晒腍,極之入味,淨喺睇佢色澤都感覺對辦好多。而海鮑片食落真喺幾有鮑片嘅感覺,軟滑而口感帶點煙韌,據親友解說,海鮑片應該喺啲大螺嘅一種,切片處理後有幾分似鮑片,食神滔做代言嘅美味棧都有罐頭海鮑片賣,英文用上Gaint Topshell,而唔喺用Abalone,咁就更加易辨明啦。至於墊底嘅玻璃生菜,索盡蠔皇汁,亦都唔好錯過。
bowl清蒸沙巴龍躉
條沙巴龍躉好大條,好夠斤兩,我哋仲估吓佢有幾重,愛好釣魚嘅親友話無三斤,都兩斤九呀!雖然都喺搞氣氛吹吓水,不過,睇落就杷差唔遠。簡單簡單以薑蔥清蒸,再淋上熟油、豉油,真喺食鮮魚嘅最佳方法,魚肉嫩滑,連較入近魚骨位都無話唔熟,魚鮮味盡出,確喺蒸得有水準。
bowl金牌一品燒雞
去到酒席尾都梗有燒雞,不過,名稱就五花八門,越改越高檔,查實都喺炸子雞一隻。依隻一品燒雞燒得色澤金黃,外皮極之香脆,又唔油膩,雖然喺冰鮮雞,但雞肉都做得嫩滑。老實講,冰鮮雞只要唔喺做白切,個人覺得跟新鮮雞真喺分別唔會太大。
bowl臘味糯米飯
舊年嗰圍有糯米飯,又有炆伊麵,今年依圍就只得臘味糯米飯,可見價錢貴咗,菜式就少咗,真喺出街食嘢只會越食越貴。還好嘅喺,今次個臘味糯米飯比上年改進咗好多,飯粒黏糯,又有少少臘味提味。
bowl鴻運團圓
舊年有紅豆沙,亦加埋蟠桃蓮蓉包,今年就變成湯圓紅豆沙,又喺另一縮成本例證。個紅豆沙比舊年差少少,雖則果皮香幽幽,但入口未夠起沙,唯一讚喺少甜,較健康。湯圓喺芝麻餡,可惜每碗得一粒,未免少得滯。同枱有親友唔好糖水,咁小弟都唔客氣食多碗先啦!
bowl合時生果盆
最後嘅合時果盆,只喺西瓜同橙,同往年一樣,志在有啲飯後果俾大家落肚啫。
前後兩年幫襯多彩皇宮,感覺都好唔錯,食物份量十足,質素整體中上,咁忙都保持到個服務,而且雖然全包宴講明每席只包茶芥12位,但我哋兩圍枱共27人,都無收番足,埋單時俾番個全包宴價就搞掂晒。相比起早一個星期前同太太家人晌荃灣城市中心嘅稻香食年夜飯,我哋7個人叫咗半圍,要成千五鬆啲,唔單止要補多一個人嘅茶錢,一枝藍妹啤只可以換一罐汽水,臨尾食剩嘢打包要兩個外賣盒都要逐個計番錢,感覺認真小家!

個人評分
味道:8/10
環境:7/10
服務:8/10
抵食:8/10
平均每人消費:HK$255

餐廳資料:
多彩皇宮 Wonder Land Seafood Restaurant
石硤尾南昌街美彩樓地下
2778 0622


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $255.00
商店 多彩皇宮 Wonder Land Seafood Restaurant