踏入秋季，都喺食大閘蟹同食蛇嘅好季節，適逢其會，有幸出席由U Food 同博藝會合辦嘅星級試食會「陽澄金黃蟹宴」，實在多謝晒大會嘅款待，令小弟大飽口福之餘，亦再次跟其他食家談談食，說說笑！
是次活動安排在貴賓房內進行，但未入去晌房門口已見擺咗座「蟹山」，目測略估數量豈止半百，幾有睇頭呀。再者，既有大閘蟹，又有蛇羮，仲可以嚐到多道以蟹入饌嘅菜式，真喺吸引，非常之期待。安排晌貴賓房有個好處，坐得舒服少受騷擾唔在講，我哋當中好多都喺拆蟹生手，小弟亦然，晌房拆得點肉酸都唔怕失禮嘛。
由UFood嘅同事跟博藝會嘅公關Winnie簡單介紹後，就揭開今晚拆蟹嘅序幕。
![bowl]() 蟹粉小籠包
第一道上場嘅菜式，以小蒸籠逐位上，頗別緻。小籠包體積比一般嘅為大，皮頗為薄，因為當夾起時見到湯汁晌小籠包底盪漾，泛出橙黃湯色，一咬湯汁瀉晒出嚟；蟹粉落得唔少，混和豬肉嘅肉餡嗒出蟹肉同蟹膏嘅鮮甜甘香味，最重要都喺要趁熱食。
![bowl]() 陽澄湖大閘蟹
題外話講少少資料嘢先，陽澄湖喺江蘇一帶大閘蟹產地嘅湖區之一，其次仲有太湖、固城湖等等。雄蟹由4.6兩至頂級嘅8兩，以食蟹肉為主，靚嘅肉質會結實鮮甜，膏較少；而雌蟹由3.4兩至頂級嘅6.5兩，以食膏為主，肉為次，靚嘅則會蟹膏多到爆，色澤金黃兼豐腴甘香。今晚店家為我哋預備咗每人兩隻4.5兩嘅雌蟹，一大長碟放咗10隻大閘蟹，場面何其壯觀，拿起熨手熱辣、足兩重秤。又較剪、又蟹簽，雖然食得頗為「論論盡盡」，但總算搞得掂。見到有啲蟹蒸到爆膏，而我揀到嗰隻，打開蟹蓋，蟹膏未算多到爆，色澤橙黃，但味道仍然甘香。蟹肉只有晌蟹肺下同蟹腳中，唔喺好多，細心嗒落都喺鮮甜，蘸點醋伴食就更鮮。
蟹胃、蟹肺、蟹心都喺唔食得嘅嘢，都喺不潔或寒涼之物，除咗蟹肺（打開蟹蓋內兩旁菊花瓣形灰白色嘅嘢）易認之外，蟹胃、蟹心真喺唔識搵，蟹胃晌蟹眼附近，應該無食到嘅，蟹心應該食咗都唔知，我依啲熱底嘅，應該無事嘅！不過，如果整番杯花彫酒或潽洱薑茶，驅驅寒，咁就更穩陣喇！
![bowl]() 太史五蛇羮
好多年前睇過香港話劇團嘅「南海十三郎」，劇中有一幕講江太史宴請老友食蛇羮（江太史咪南海十三郎個阿爸），所以太史五蛇羮嘅出處都知知哋。五蛇羮除咗蛇肉（網上資料：過山烏、飯鏟頭、白花蛇、金腳帶、三索線），仲混有雞絲、木耳、冬菇、冬筍，配以老雞、金華火腿、赤肉煲嘅上湯，個五蛇羮真喺材料十足，湯羮味道濃郁，質感不稠不稀，唯辣味比較霸道，有少少嗆喉，但感覺非常暖胃。
![bowl]() 生拆蟹粉玉簪蝦球、鳳凰卷伴
整晚所有菜式中，無論手功、賣相都做得最精巧嘅一道菜。生拆蟹粉玉簪蝦球，以菜心穿過蝦球做成玉簪，配以蟹粉、蛋白做獻汁，蝦球厚肉頗彈牙，蟹粉鮮甜滑溜，菜心亦嫩綠鮮甜，所以對依個配搭幾欣賞。另外鳳凰卷伴就有啲比下去嘅感覺，以類似米紙皮包住雞絲、蘿蔔絲、芋頭絲、芝士、洋蔥，再綑上麵粉絲酥炸，賣相花過心思，理應甘香可口、味道紛陳。不過，外層鬆脆，但內層有點軟腍，而內餡個個食家都食出不同組合，有啲人話無雞絲、無芋頭絲，有啲又話食唔出芝士味，似乎對一道菜唔喺一個好嘅結論。
![bowl]() 老虎斑兩食：XO白玉蒸球、椒鹽腩肉
白玉蒸球味道幾夾，魚肉比想像中較挺實，但就更突出個「白玉」（豆腐）嫩滑得要搵匙羹兜住食，面面放啲XO醬，就形成畫龍點睛之效；相反，椒鹽腩肉就過於普通，以魚腩肉蘸粉漿脆炸，伴上椒鹽汁，第一喺個粉漿做得厚身，其次魚腩帶骨，很易誤損口腔，再者椒鹽味唔重，欠缺個性，實有需要改善一下。
![bowl]() 濃湯肉丸津白
食咗好幾味濃烈嘅菜式，依刻嚟個濃湯津白，實在適時。湯底做得奶白濃香，味道鮮甜，配以大量磨菇、津白，都喺健康食材。而自家製嘅肉丸，以蝦肉、豬肉、冬菇打成，簡單但味香，肉質爽。
![bowl]() 堂做蟹粉炆烏冬
跟住嚟一個「大廚出馬」環節，由兩位師傅即場示範一道砂鍋蟹粉炆烏冬。烹煮過程唔多講，不外乎爆蟹、下烏冬、添蟹粉，但由於整個過程都晌貴賓房內進行，香味四溢，未煮好都已經引死人。日本入口嘅手打烏冬軟腍，佔滿蟹粉鮮味，一啲都唔腥，估唔到咁正，只可惜每人分得一小碗，絕對喺唔夠喉。此時大廚問對今晚嘅餸菜有咩意見，真想講佢知個烏冬想添食。
![bowl]() 薑茶湯丸．蘆薈椰汁紫米糕
原本菜單喺薑茶湯丸配馬豆糕，臨時改咗招牌甜品：蘆薈椰汁紫米糕，名字聽嚟高檔啲。薑茶湯丸，雖然薑茶可驅大閘蟹嘅寒，但薑味未免過重，以致於有「揦」喉嘅感覺，而湯丸皮厚餡少亦叫人未能盡興。蘆薈椰汁紫米糕又如何？上層喺蘆薈大菜糕，味淡，都喺鍾意桂花嘅幽香多啲；下層喺椰汁紫米糕，椰汁味唔算強，紫米有咬口，不過，似乎椰汁搭馬豆合拍多啲。對兩道甜品未太滿意，有感未能有一個完美作結。
因為試食，實際唔知餐飯要幾錢，但店方都俾咗個零售參考價，約$338一位，不過未知包埋茶芥加一未呢？總結成餐飯，用料、心思喺感受得出，亦有多款菜式好睇又好食，不過，純以小弟個人口味，有些少地方喺可以做得更好。
個人評分
味道：7/10
環境：8/10
服務：8/10
抵食：8/10
平均每人消費：HK$338（ufood試食活動）
餐廳資料：
博藝會 Spotlight Recreational Club
紅磡黃埔花園第8期螢幕圈4樓
2766 9703
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
