抱歉,發生點錯誤。
重新載入
友樂亭爐端燒居酒屋 Yu Raku Tei Japanese Restaurant:友樂,有樂不停!
山區麵包王
2013-08-25
1221
0
分享
收藏
雖然搬嚟美孚已經有4年,友樂亭一直只放晌待試名單,諸多原因拖吓拖吓一直未有幫襯,今次卒之趁個好胏妹生日,佢又喺哈日一族,一於拉隊我哋一班美孚街坊之友晌處食番餐,一邊食就一邊講番早前一齊去旅行嘅軼事。我哋一行7人,雖然老早訂咗位,仲提早嚟攞位,都要等成半粒鐘先至俾到位,只喺有人走咪俾枱嗰隻,根本訂位都有啲多餘。
其實店內枱櫈排得頗逼,不過,裝潢上又確實幾有氣氛,尤其店內正中央天花,一大盞巨型日式燈籠吊燈,甚搶眼。此外,近玄關嘅酒櫃,一排又一排掛有熟客名嘅清酒,可見小店甚受歡迎。
翻一轉餐牌,不愁無選擇,由刺身、壽司、手卷、卷物、佐酒小食、串燒、燒烤魚類、一品料理、炸類、鍋物、沙律、日本風味、飯類、麵類,到飲品、甜品過百款選擇,款式繁多,而定價屬中等價位。我哋依班「美孚街坊」唔算好揀飲擇食,口味亦唔多「奄尖」,所以全交由小弟發板,為咗一試師傅晌各領域嘅手勢,盡量各種類都點啲。
順帶一提,服務方面個人覺得好一般,由等位、點菜到上菜,唔可以話差,個人覺得只喺缺少份做日本飲食對待客人嘅熱誠啫。好似等位期間,啲店員都無理過我哋,只喺掛住招呼阿乜生乜太熟客,就算我哋問都只喺話叫我哋等多陣,好彩老友唔介意咋。或許店家生意好,熟客都夠晒做,我哋依啲生客,可有可無吧!

bowl前菜 $10
只喺一小兜吞拿魚,唔喺刺身嗰啲呀,感覺喺罐頭貨嚟,無咩特色可言。因為個前菜喺規矩嚟,依十蚊想慳番都唔得。
除有個特選4人套餐($950)外,餐牌第一版就喺「刺身、壽司、手卷、卷物」類,不過,我哋就無點淨刺身或壽司咁,反而點咗底下嘅刺身飯,仲要起雙添。
特選4人套餐(左)、刺身、壽司、手卷、卷物(右)
bowl雜錦刺身飯 $135
問會有咩刺身,只喺答由師傅決定,有三數款。賣相討好,色彩繽紛,只喺覺得加埋日式魚蛋、玉子等等有啲抽水之嫌,不過飯粒黏糯,幾款刺身如牡丹蝦、油甘魚都鮮甜味美,令整個刺身飯仍具質素。如對你嚟講,錢唔喺問題,可以揀食特選刺身飯,賣$350,刺身當然會較時令及貴價貨。
bowl三文魚海膽飯 $138
對比起個雜錦刺身飯,小弟就覺得依個三文魚海膽飯抵食啲,7大片厚切三文魚,一葉扇形排開,油潤甜美,入口細滑,雖然海膽得嗰一小撮,但味道甘腴不俗。仲有,刺身飯會附送麵豉湯嘅。
串燒亦有唔少款式,數一數都有15款之多,不過就唔算好特別或有啲咩刁鑽位賣。簡單啲,點咗一客牛舌同一客雞腎。
佐酒小食(左)、串燒(右)
bowl牛舌串 $38
一客牛舌串有兩串,每串都有4件,燒得幾香,質感有咬口,牛舌嘅原味突出。
bowl雞腎串 $33
一客雞腎串同樣有兩串,不過,賣相奇差,理應可以斜切一片一片,依家個樣就切到個雞腎巖巖巉巉,此外,味道都唔喺好得,既乾且韌。
bowl銀雪魚照燒 $145
有11款燒烤魚類,都預咗老婆要求點依個,銀雪魚喺佢至愛。比起啲串燒,個銀雪魚真喺無得彈,一大件厚切嘅銀雪魚,不單燒得香,又油潤,又嫩滑,入口油香軟綿,真喺要俾個讚。另加$22可變為定食,多個麵豉湯同一碗白飯添。
除咗燒烤魚類,一品料理、炸類、鍋物依三大類,一樣可以加$22轉為定食。跟住要分享喺炸類,日本人稱之為揚物。
燒烤魚類(左)、一品料理(右)
炸類(左)、鍋物、沙律(右)
bowl日本南瓜天婦羅 $80
一客7件嘅南瓜天婦羅,感覺有啲唔平,不過南瓜取自日本貨,味道非常粉香清甜,脆漿又做得薄薄,沾點蘿蔔蓉解解熱,食完你就唔覺佢貴。
bowl炸軟殼蟹 $68
軟殼蟹炸得酥脆,除可唧啲鮮檸汁提味,亦附上芝麻沙律醬,蘸點一吓味道又有啲唔同喎。
bowl麵豉湯生蠔鍋 $148
睇到鍋物類,我哋幾個都情有獨鍾就揀依個麵豉湯生蠔鍋,不負眾望,個鍋無論賣相,抑或味道都認真唔錯。望向鍋中,已睇見肥大肉厚嘅生蠔,食落的確好肉地,都算幾夠蠔味。麵豉湯面之上再加一大撮日本麵豉醬,慌死怕你投訴佢唔夠香濃呀,哈哈!而鍋中仲有幾款野菜,如金菇、冬菇、娃娃菜、小棠菜……等等,頗為抵食。
bowl燒飯糰 $68
由於之前晌刺身類揀咗兩個飯,所以嚟到飯類就唔會再揀啲大份量嘅飯,所以點咗燒飯糰,貪其甘香脆口。燒飯糰一客有兩個,我哋點咗兩客共4個,有木魚絲、梅、三文魚共3款味道,就要咗後兩者。飯糰做得挺實唔鬆散,但入口可以食到外脆內軟,而且又有朕焦香味,個人覺得非常好食;不過,無論梅定三文魚,因為藏晌飯糰內,份量唔多,所以感覺唔喺太食出佢哋嘅味道,尤其個梅,跟期望有啲落差。如果唔想食燒嘅,飯糰會賣平啲,只喺$40一客,同樣指定3款味道。
 日本風味(左)、飯類(右)
麵類(左)、飲品(右)
 bowl鍋仔烏冬 $65
雖然今晚女士多過男士,食到臨尾都驚大家唔夠飽,所以追加一份屬於麵類嘅鍋仔烏冬,所有麵類都可以揀一款配料,選擇如下:天婦羅、吉列豬扒、牛肉、鮮菇雜菜、叉燒或辣肉泡菜。我哋揀咗海蝦天婦羅,其實有啲揀錯,因為件天婦羅喺浸向湯中,上枱時外層脆漿自然腍晒,而鍋仔仲有鳴門卷、溫泉蛋,可惜隻蛋已唔「溫泉」嘞。至於烏冬質素中規中矩,湯底要咗醬油味,都OK嘅。
bowl啫喱
甜品一欄都喺啲雪葩或雪糕,而且取價唔便宜啊,同枱老友又唔喺嗜甜之人,所以最後都無叫甜品。不過,餐廳會送上久違嘅啫喱作甜品,一人一粒,懷舊大於味道。
總結,友樂亭晌食物質素上頗上乘,價位雖然唔叫得平,但以其質素實屬合理、物有所值,只喺招呼一環較回落。當然一次幫襯,未足以立下結論,還望下次再嚟會待客好啲。

個人評分
味道:8/10
環境:8/10
服務:6/10
抵食:8/10
平均每人消費:HK$170

餐廳資料:
友樂亭爐端燒居酒屋 Yu Raku Tei Japanese Restaurant
美孚美孚新村恆柏道2-8號地舖
2745 9189


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $170.00
商店 友樂亭爐端燒居酒屋 Yu Raku Tei Japanese Restaurant