茶市套餐，一向都喺茶餐廳、快餐店嘅搶攻市場，好似今次晌大家樂所見，真喺茶餐選擇多過午市、晚市，形形式式，真喺各具特色。不過，嚟得依度食下午茶，一切都講求平宜、抵食、夠快，要嘆好嘢就過主啦。

尤其屋村、屋苑依類地方，下午茶嘅市況確喺其門如市。就好似美孚依區，美孚大屋苑唔在講，再入啲有公屋、又有居屋、規模細少少嘅私樓屋苑亦有好幾個，家庭主婦、學生多，老人家就更多，所以，有啲為咗慳多個錢，下午茶當午餐食，往往都坐到庭無虛席。

細叉燒飯 + 雙重朱古力熱飲 $24

大家樂成日賣廣告有咩「天天超值選」，定價平啲，又包嘢飲，下午茶餐一樣有，依個「細叉飯」都喺天天超值選之一，只賣$24，已包一杯紅豆冰或雙重朱古力熱飲。個餐有趣在於個細叉飯應該實名叫少叉飯，因為飯嘅份量一啲唔少，跟正常嘅相差無幾，只不過叉燒只得6小片，勉強夠餸一碗飯，還好嘅喺半肥瘦叉燒唔錯，燒得鬆化，又有少少燶邊。而最想知喺杯雙重朱古力熱飲，唔知點雙重法。原來，杯朱古力以朱古力粉加朱古力漿開沖，朱古力味的確平常普通嘅熱朱古力濃郁一啲！天寒地凍，一碗熱辣辣叉飯，一杯燙熱朱古力，雖然唔喺要講咩質素，但只喺廿零蚊餐，夠晒飽，絕對喺糧尾救星。

燒味三寶瀨粉 + 餐飲 $26

燒味類嘅下午茶佔茶餐不少比重，燒味雙拼瀨粉或米粉都喺一向熱賣，依個所有「新產品」一啲都唔喺咩新嘢，只喺晌大家樂未曾有過？三寶喺乜？包括：鹵水牛肚、紅腸、雞翼，仲配埋即磨咖啡、茶或汽水，都只喺賣$26，牛肚鹵得不俗，又好爽，紅腸唔喺用啲好差嘅大陸貨，溝好多粉嚟整，食落「腍滋滋」咁。最想講喺份量一啲都唔少，比起我個細叉飯，真喺多餸好多，盛得滿滿，而瀨粉一樣唔少，同樣又喺糧尾救星，大碗抵食。老婆照例要熱檸水，俾我就要即磨咖啡，心理上著數啲嘛。

晌大家樂食下午茶餐用咗15分鐘，算hea架嘞，睇住隔離張枱遲過我哋坐低，都喺食細叉燒飯，轉眼食完仲快過我哋走咗。真喺一張枱可以一個鐘內返枱4-5轉，但依然見收銀位短短人龍不絕，雖然一個茶餐扣除埋成本、人工、燈油口蠟，毛利唔多，但都不要小覷下午茶嘅生意利潤，薄利多銷嘛。

個人評分
味道：7/10
環境：7/10
服務：6/10
抵食：8/10
平均每人消費：HK$25

餐廳資料：
大家樂 Café de Coral
美孚美孚新村萬事達廣場1樓N95(B)
2785 5821